AMARHUBO 132 - IsiNdebele 2012 Translation

UZimu uhlala eZiyoni isiphelani

¹ Ingoma yekhambo lokuya ethempelini. Somnini, cabangela uDavida, ngazo zoke iinhlupheko abekezele kizo,

² nangalokho akufunga kuSomnini, iye, lokho akuthembisa kongonamandla kaJakopo,

³ ngokuthi: “Angisobe ngangena ngendlinami, namkha emalalwenami.

⁴ Angizukuvumela amehlwami alale, namkha iinkhopha zami zicimeze

⁵ bengifunyanele uSomnini indawo, iye, ubuhlalo bongonamandla kaJokopo.”

⁶ Qala, sezwa ngomfaji sise-Efrata; sawufunyana esifundeni seJeyarimu.

⁷ Ngalokho asiyeni endlinakhe, siguqe esinabelweni seenyawo zakhe.

⁸ Sikima Somnini! Yewuye endawenakho yokuphumula, wena nomfaji wamandlakho.

⁹ Inga abaphristi bakho bangembathiswa ukulunga nabathembekileko bakho bahlokome.

¹⁰ Ngebanga lencekwakho uDavida, ungafulatheli umzeswakho.

¹¹ Ngeqiniso uSomnini wafunga kuDavida isifungo angeze asiphendukela. Wathi: “Omunye wamadodana wedini lakho, ngizambeka esihlalweni sakho sobukhosi.

¹² Nangabe amadodanakho agcina isivumelwano sami neemfundiso engizawafundisa zona, khona-ke, amadodanawo, azakuhlala esihlalweni sakho sobukhosi mlibe.”

¹³ Mbala, uSomnini ukhethe iZiyoni; wathanda bona ibe sihlalo sakhe;

¹⁴ wathi: “Le yindawami yokuphumula isiphelani; lapha, ngizakuhlala khona, ngombana ngikuthandile.

¹⁵ Ngizakubusisa ukudla kwayo ngokuphuphumako; ngisuthise abachakileko bayo ngesikwa.

¹⁶ Abaphristi bayo ngizabembathisa isindiso, abathembekileko bayo bahlokome ngokwethaba.

¹⁷ Lapho-ke ngizakukhulisa amandla kaDavida; ngilungisele umzeswami isibani.

¹⁸ Izitha zakhe ngizazembathisa ihlazo, kodwana isihlohlo sakhe sihlale siqhakazile.”