AMARHUBO 128 - IsiNdebele 2012 Translation

Isibusiso sokwesaba uSomnini

¹ Ingoma yekhambo lokuya ethempelini. Ubusisiwe owesaba uSomnini, okhamba eendleleni zakhe.

² Wena uzakudla isithelo somsebenzi wezandla zakho; uzakubusiseka, koke kukukhambele kuhle:

³ Umkakho uzakuba njengesidiribe esithelako ngendlinakho. Abantwana bakho bazakuba njengamahlumela wemithi ye-oliva esithebeni sakho sokudlela.

⁴ Qala-ke, indoda eyesaba uSomnini izakubusiswa bunjalo.

⁵ Kwanga uSomnini angakubusisa aseZiyoni. Kwanga ungabona ubuhle beJerusalema imihla yoke yokuphila kwakho.

⁶ Kwanga ungabona iinzukulwana zakho. Ukuthula akube phezu kwaka-Israyeli.