AMARHUBO 119 - IsiNdebele 2012 Translation

Ubuhle bomthetho kaZimu

¹ Babusisiwe abamsulwa eendleleni zabo, abakhamba ngokuya ngomthetho kaSomnini.

² Babusisiwe ababulunga ubufakazi bakhe, iye, abamfuna ngehliziyo epheleleko,

³ abangenzi litho elimbi, abakhamba eendleleni zakhe.

⁴ Somnini nguwe oyale ngeemfundiso zakho kobana zilondwe ngokupheleleko.

⁵ Kwanga ukukhamba kwami kunganzinza ukuze ngilonde iimiso zakho!

⁶ Angekhe ngaba neenhloni lokha nangitjheja yoke imiyalwakho.

⁷ Ngizakuthokoza ngehliziyo eqotho lokha nangifunda imithethwako elungileko.

⁸ Ngizakulonda iimiso zakho; yeke, ungangilahleli safuthi.

⁹ Omutjha angayihlambulula njani indlelakhe na? Ngokuyilonda ngokwelizwi lakho.

¹⁰ Ngikufuna ngehliziywami yoke; ungavumi ngiphambuke emiyalwenakho.

¹¹ Ngifihla amezwakho ehliziywenami ukuze ngingoni kuwe.

¹² Akudunyiswe wena Somnini! Ngifundise iimiso zakho.

¹³ Ngeembhena zami ngimemezela yoke imithetho yomlomakho.

¹⁴ Ukukhamba ngobufakazi bakho kungijabulisa ngaphezu komnotho woke.

¹⁵ Ngizindla ngeemfundiso zakho, ngiyelele iindlela zakho.

¹⁶ Ngiyathaba ngeemiso zakho, ilizwi lakho angeze ngalidela.

¹⁷ Phatha incekwakho kuhle, khona ngizakuphila, ngilonde amezwakho.

¹⁸ Vula amehlwami kobana ngibone iimangaliso ezisemthethwenakho.

¹⁹ Ngisikhonzi ephasini, ungayifihli imiyalwakho kimi.

²⁰ Umphefumulwami sewuphodlhekile ngokulangazelela imithethwakho ngesikhathi soke.

²¹ Uyazikhalimela iindeleli, okutjho abanikelelweko, labo abaphambuka emiyalwenakho.

²² Susa kimi isiphoqo nenyazo ngombana ngibubulungile ubufakazi bakho.

²³ Nanyana ababusi bahlangene, bahleba ngami, incekwakho izakuzindla ngeemiso zakho.

²⁴ Ubufakazi bakho bukuthaba kwami, iye, buziinluleko zami.

²⁵ Umphefumulwami unamathele ethulini, nje-ke vuselela ipilwami ngesithembiso sakho.

²⁶ Nganeka iindlela zami kuwe, wena wangiphendula, yeke ngifundise iimiso zakho.

²⁷ Ngiphe ukuzwisisa indlela yeemfundiso zakho, ngalokho ngizakuzindla ngeemangaliso zakho.

²⁸ Umphefumulwami ulisizi, nje-ke ngiqinise ngokwesithembiso sakho.

²⁹ Susa indlela yamala kimi, ungirhawukele ngokomthethwakho.

³⁰ Ngikhethe indlela yeqiniso, ngabeka imithethwakho phambi kwami.

³¹ Somnini, ngikakarele ebufakazini bakho, yeke ungavumi ngihlazeke.

³² Ngigijima endleleni yemiyalwakho ngombana welule umkhumbulwami.

³³ Somnini, ngifundise indlela yeemiso zakho, nje-ke ngizayibulunga bekube sekupheleni.

³⁴ Ngiphe ukuzwisisa ukuze ngibulunge umthethwakho, ngiwulonde ngehliziywami yoke.

³⁵ Ngihlahle emizileni yemiyalwakho ngombana ngiyathaba ngayo.

³⁶ Phendulela ihliziywami ebufakazini bakho, kungabi sekufuneni inzuzo.

³⁷ Fulatheza amehlwami ekuqaleni ilize; ungiphilise endlelenakho.

³⁸ Zalisa isithembiso sakho encekwinakho ukuze wesatjwe.

³⁹ Susa ihlazo kimi ngombana liyangilulaza; imithethwakho iyanganelisa.

⁴⁰ Maye, ngilangazelela iimfundiso zakho! Yeke yewungiphilise ngokulunga kwakho.

⁴¹ Somnini, kwanga ukwethembeka kwakho kungeza kimi, iye, isindiswakho ngokwesithembiso sakho;

⁴² nje-ke ngizakwazi ukuphendula abangithukako ngombana ngethemba ilizwi lakho.

⁴³ Ungalisuseli safuthi ilizwi leqiniso emlonyenami ngombana ngiqalelela imithethwakho.

⁴⁴ Ngizakulonda umthethwakho ngesikhathi soke, iye, ngizawulonda nini nanini.

⁴⁵ Ngizakukhamba petlege ngombana ngifunana neemfundiso zakho.

⁴⁶ Ngizakukhuluma ngobufakazi bakho phambi kwamakhosi, angekhe ngaba neenhloni.

⁴⁷ Ngiyathaba ngemiyalwakho ngombana ngiyayithanda.

⁴⁸ Ngikhongozela imiyalwakho ngombana ngiyayithanda begodu ngifuna ukuzindla ngeemiso zakho.

⁴⁹ Khumbula isithembiso sakho encekwinakho ongiphe ngaso ithemba.

⁵⁰ Nakhu ukutjhiriyeka kwami esizini lami: Isithembiso sakho sivuselela ipilwami.

⁵¹ Iindeleli zihlalele ukungiphoqa, kodwana angiphambuki emthethwenakho.

⁵² Ngikhumbula imithethwakho yakade, Somnini, ngiziduduza ngayo.

⁵³ Ngebanga leenkhohlakali ngiyanyenya, iye, ngalabo abalahla umthethwakho.

⁵⁴ Iimiso zakho zimuvumo kimi endlinami yokugogobala.

⁵⁵ Ebusuku ngikhumbula ibizo lakho, Somnini, ngilonda umthethwakho.

⁵⁶ Lokhu kusisabelo sami: ukubulunga iimfundiso zakho.

⁵⁷ Somnini, sabelo sami, ngiyathembisa bona ngizakulonda amezwakho.

⁵⁸ Ngincancabeza kuwe ngehliziywami yoke, yiba nomusa kimi ngokwesithembiso sakho.

⁵⁹ Iindlela zami ngizicabangisisile, yeke ngizokulandela ubufakazi bakho godu.

⁶⁰ Ngirhaba ngingariyadi ukulonda imiyalwakho.

⁶¹ Nanyana iintambo zeenkhohlakali zingirarejile, angeze ngawukhohlwa umthethwakho.

⁶² Naphakathi kobusuku ngiyavuka ngikuthokoze ngebanga lemithethwako elungileko.

⁶³ Ngisinini sabo boke abakwesabako, iye, boke abalonda iimfundiso zakho.

⁶⁴ Somnini, iphasi lizele ngokwethembeka kwakho; ngifundise iimiso zakho.

⁶⁵ Uphethe incekwakho kuhle ngokwelizwi lakho Somnini.

⁶⁶ Ngifundise ilemuko elihle kanye nelwazi ngombana ngikholelwa emiyalwenakho.

⁶⁷ Ngingakathotjiswa ngangivame ukuphosisa; kodwana kwanje, ngilonda ilizwi lakho.

⁶⁸ Wena ulungile nokwenzako kulungile, nje-ke ngifundise iimiso zakho.

⁶⁹ Iindeleli zingininda ngamala, kodwana ngibulunga iimfundiso zakho ngehliziywami yoke.

⁷⁰ Njengamafutha iinhliziyo zazo azinamizwa, kodwana nakungimi yena, ngithabela umthethwakho.

⁷¹ Kwaba kuhle kimi kobana ngithotjiswe ukuze ngifunde iimiso zakho.

⁷² Umthetho womlomakho muhle kimi, udlula amakhulukhulu weempaparwana zegolide nezesiliva.

⁷³ Izandla zakho zangenza begodu zangijamisa, nje-ke ngiphe ukuzwisisa ukuze ngifunde imiyalwakho.

⁷⁴ Abakwesabako bazangibona, bathabe ngombana ngiqalelela isithembiso sakho.

⁷⁵ Somnini, ngiyazi bona imithethwakho ilungile begodu ungithobise ngeqiniso.

⁷⁶ Ukwethembeka kwakho kube yinduduzwami ngokwesithembiso sakho encekwinakho.

⁷⁷ Kwanga umusakho ungeza kimi ukuze ngiphile ngombana umthethwakho ukuthaba kwami.

⁷⁸ Kwanga iindeleli zingaphoqeka ngombana zingidlelezela ngamala, kodwana nakungimi yena, ngizakuzindla ngeemfundiso zakho.

⁷⁹ Akuthi labo abekwesabako, baphendukele kimi ukuze bazi ubufakazi bakho.

⁸⁰ Ihliziywami ayingasoleki mayelana neemiso zakho ukuze ngingahlaziseki.

⁸¹ Umphefumulwami ufisa isindiswakho, ngiqalelela isithembiso sakho.

⁸² Amehlwami sele afiphele ngokurhuluphela isithembiso sakho, ngizibuza ngithi: “Uzongiduduza nini?”

⁸³ Nanyana nginjengesikhumba sewayini emuleni, angizikhohlwa iimiso zakho.

⁸⁴ Mangaki amalanga asalele incekwakho na? Uzabagweba nini abazumana nami?

⁸⁵ Iindeleli zingembele umgodi, zaphambana nomthethwakho.

⁸⁶ Yoke imiyalwakho iliqiniso; ngisize ngombana abantu bangizuma ngamala.

⁸⁷ Bapheze bangiqeda ephasini, kodwana mina angikazilahli iimfundiso zakho.

⁸⁸ Yewungiphilise ngokwethembeka kwakho ukuze ngilonde ubufakazi bomlomakho.

⁸⁹ Somnini, ilizwi lakho lingelanini nanini; lijame liqinile emazulwini.

⁹⁰ Ubuqotho bakho bungebeenzukulwana ngeenzukulwana; unzinzise iphasi lajama.

⁹¹ Imithethwakho iseliqiniso nanje, mbala, koke kulotjha wena.

⁹² Nangathana umthethwakho bewungasikho ukuthakasa kwami, ngabe sele ngabhubha esizini lami.

⁹³ Angeze ngazilibala iimfundiso zakho ngombana ngazo uyangiphilisa.

⁹⁴ Ngingowakho; ngisindise ngombana ngifunana neemfundiso zakho.

⁹⁵ Iinkhohlakali zilindele ukungibhubhisa, kodwana ngicabanga ngobufakazi bakho.

⁹⁶ Ngibonile kobana kunomkhawulo kikho koke okuphelelisiweko, kodwana umyalwakho wenabile.

⁹⁷ Maye, ngiyawuthanda umthethwakho! Ngizindla ngawo ilanga loke.

⁹⁸ Imiyalwakho ingenza ngihlakaniphe ngaphezu kwezitha zami ngombana ihlala ikimi.

⁹⁹ Nginelwazi ukudlula abafundisi bami ngombana ngizindla ngobufakazi bakho.

¹⁰⁰ Nginelemuko ukudlula abadala ngombana ngibulunga iimfundiso zakho.

¹⁰¹ Angibeki inyawo lami eendleleni zobumbi, ngalokho ngilonda ilizwi lakho.

¹⁰² Akhange ngiphambuke emithethwenakho, ngombana nguwe ongifundisileko.

¹⁰³ Maye, amezwakho anandipha kurhwalabhami! Amnandi ukudlula iliju emlonyenami!

¹⁰⁴ Ngeemfundiso zakho ngizuza ukuzwisisa; ngalokho ngizonda indlela yamala.

¹⁰⁵ Ilizwi lakho lisibani eenyaweni zami begodu likukhanya emzilenami.

¹⁰⁶ Ngenze isifungo ngasiqinisa kobana ngilonde imithethwakho yokulunga.

¹⁰⁷ Ngitlhage khulu; ngiphilise Somnini ngokwesithembiso sakho.

¹⁰⁸ Somnini, yamukela iminikelo yesihle yomlomami, ungifundise imithethwakho.

¹⁰⁹ Ipilwami isengozini ngesikhathi soke, nokho angiwukhohlwa umthethwakho.

¹¹⁰ Iinkhohlakali zingibekele isifu, kodwana akhange ngiphambuke eemfundisweni zakho.

¹¹¹ Nini nanini ubufakazi bakho bulilifa lami; mbala, bukuthaba kwehliziywami.

¹¹² Ihliziywami izimisele ukwenza iimiso zakho bekube sekupheleni.

¹¹³ Ngiyamzonda uhliziyombili, kodwana ngiyawuthanda umthethwakho.

¹¹⁴ Usiphephelo nesihlangu sami; ngiqalelela isithembiso sakho.

¹¹⁵ Sukani kimi nina benzi bobumbi ukuze ngibulunge imiyalo kaZimami!

¹¹⁶ Ngisingathe ngokwesithembiso sakho ukuze ngiphile; ungavumi ithemba lami lihlaziseke.

¹¹⁷ Ngisekele ukuze ngisinde; iimiso zakho ngizakuhlala ngizinakile.

¹¹⁸ Udela boke abahlubuka iimiso zakho: Ubukhohlisi babo bulilize.

¹¹⁹ Zoke iinkhohlakali zephasi, uzengula njengegwebu; ngalokho ngithanda ubufakazi bakho.

¹²⁰ Umzimbami uyathuthumela ngokukwesaba begodu nginevalo ngemithethwakho.

¹²¹ Ngenzile okufaneleko nokulungileko, yeke ungangiliseleli ebagandelelini.

¹²² Qinisekisa incekwakho ihlalohle; iindeleli zingangigandeleli.

¹²³ Amehlwami sele afiphele ngokurhuluphela isindiswakho, iye, ukulunga okuthembisileko.

¹²⁴ Phatha incekwakho ngokwethembeka kwakho, ungifundise iimiso zakho.

¹²⁵ Ngiyincekwakho, ngiphe ukuzwisisa ukuze ngazi ubufakazi bakho.

¹²⁶ Somnini, kusikhathi, hlanazela; abantu bephule umthethwakho.

¹²⁷ Njengombana ngithanda imiyalwakho, ukudlula igolide, ngitjho igolidembala,

¹²⁸ nokobana ngiyelela ngokupheleleko zoke iimfundiso zakho, ngizonda yoke indlela yamanga.

¹²⁹ Ubufakazi bakho buyakarisa; ngalokho ngiyabubulunga.

¹³⁰ Isambulo selizwi lakho sikukhanya; sinikela ukuzwisisa kwabanganalwazi.

¹³¹ Ngivula umlomo ngikhaluze, iye, ngikhanukela imiyalwakho.

¹³² Phendukela kimi, ungirhawukele, njengombana uvame ukwenza kwabathanda ibizo lakho.

¹³³ Nzinzisa amagadangwami njengokwesithembiso sakho; ungavumi bona ngibuswe nanyana ngibuphi ubumbi.

¹³⁴ Ngihlenge ekugandelelweni babantu ukuze ngikwazi ukulonda iimfundiso zakho.

¹³⁵ Khanyisela incekwakho; ungifundise iimiso zakho.

¹³⁶ Amehlwami ageleza iinyembezi, ngombana abantu abalondi umthethwakho.

¹³⁷ Somnini, wena ulungile nemithethwakho iqotho.

¹³⁸ Wayala ubufakazi bakho, iye, bulungile begodu buthembeke ngokupheleleko.

¹³⁹ Ukutjhisakalela kwami kuyangiqeda, lokha amanabami nadela amezwakho.

¹⁴⁰ Isithembiso sakho sihlolisisiwe, nje-ke incekwakho iyasithanda.

¹⁴¹ Nanyana ngiphasi ngidelelekile, angizikhohlwa iimfundiso zakho.

¹⁴² Ukulunga kwakho kulunge mlibe nomthethwakho uliqiniso.

¹⁴³ Ngehlelwe lisizi nobudisi, kodwana imiyalwakho ikuthaba kwami.

¹⁴⁴ Nini nanini iimfundiso zakho ziliqiniso; yeke ngiphe ukuzwisisa ukuze ngiphile.

¹⁴⁵ Ngilila ngehliziywami yoke, nje-ke ngiphendule Somnini, ngibulunge iimiso zakho.

¹⁴⁶ Ngilila kuwe, ngisindise ukuze ngilonde ubufakazi bakho.

¹⁴⁷ Ngivuka ngamasa, ngibawe isizo; ngiqalelele amezwakho.

¹⁴⁸ Ngemilindo yobusuku ngiyaphilelwa, ngizindle ngesithembiso sakho.

¹⁴⁹ Yizwa ilizwi lami ngokwethembeka kwakho; Somnini, ungiphilise ngokulunga kwakho.

¹⁵⁰ Labo abangizuma ngobumbi bayatjhidela, bakude nomthethwakho.

¹⁵¹ Kodwana wena Somnini, useduze nemiyalwakho yoke iliqiniso.

¹⁵² Bengiseze nginelemuko lobufakazi bakho kwakade: Wabunzinzisa bajama isiphelani.

¹⁵³ Yelela isizi lami, ungisindise ngombana akhange ngiwukhohlwe umthethwakho.

¹⁵⁴ Mela indabami, ungihlenge; ngiphilise ngokwesithembiso sakho.

¹⁵⁵ Ukusindiswa kukude neenkhohlakali, ngombana azifuni iimiso zakho.

¹⁵⁶ Maye, mkhulu umusakho Somnini! Ngiphilise ngokwemithethwakho.

¹⁵⁷ Banengi abangizumako kanye namanabami, kodwana akhange ngiphambuke ebufakazini bakho.

¹⁵⁸ Nangiqala abahlubuki, ngifikelwa kunyenya, ngombana abalondi isithembiso sakho.

¹⁵⁹ Qala, ngithanda iimfundiso zakho, Somnini, yeke yewungiphilise ngokwethembeka kwakho.

¹⁶⁰ Ummongo welizwi lakho kukwethembeka begodu zoke iimphetho zakho zijame isiphelani.

¹⁶¹ Ababusi bangizuma kunganabanga, kodwana ihliziywami inevalo ngamezwakho.

¹⁶² Ngiyathaba ngesithembiso sakho njengomuntu ofunyana ipango enengi.

¹⁶³ Ngiwazondile amala, iye, ngiyawanyenya; kodwana ngithanda umthethwakho.

¹⁶⁴ Ngikudumisa kalikhomba ngelanga ngebanga lemithethwakho elungileko.

¹⁶⁵ Abathanda umthethwakho banokuthula okukhulu, akukho okungabenza bakhutjwe.

¹⁶⁶ Somnini, ngilindele isindiswakho nemiyalwakho ngiyayilandela.

¹⁶⁷ Ngilonda ubufakazi bakho, iye, ngibuthanda khulu.

¹⁶⁸ Ngilonda iimfundiso nobufakazi bakho: Zoke iindlela zami ziphambi kwakho.

¹⁶⁹ Kwanga isibawo sami singatjhidela kuwe, Somnini; ungiphe ukuzwisisa ngokwelizwi lakho.

¹⁷⁰ Inga isibawo sami sesirhawu singafika phambi kwakho; ungisindise ngokwesithembiso sakho.

¹⁷¹ Iimbhena zami zizakuphuphuma ngokudumisa, ngombana ungifundisa iimiso zakho.

¹⁷² Ilimu lami lizakuvuma ngesithembiso sakho; mbala, yoke imiyalwakho ilungile.

¹⁷³ Kwanga isandla sakho singalungela ukungisiza, ngombana ngikhethe iimfundiso zakho.

¹⁷⁴ Somnini, ngilangazelela isindiswakho, iye, umthethwakho ukuthaba kwami.

¹⁷⁵ Angiphile ukuze ngikudumise nemithethwakho ingisize.

¹⁷⁶ Ngeduke njengemvu elahlekileko. Yewufune incekwakho ngombana angikayikhohlwa imiyalwakho.