AMARHUBO 118 - IsiNdebele 2012 Translation

Ingoma yokudumisa

¹ Thokozani uSomnini ngombana ulungile; ukwethembeka kwakhe kujame isiphelani.

² U-Israyeli akathi: “Ukwethembeka kwakhe kujame isiphelani.”

³ Indlu ka-Aroni ayithi: “Ukwethembeka kwakhe kujame isiphelani.”

⁴ Abesaba uSomnini abathi: “Ukwethembeka kwakhe kujame isiphelani.”

⁵ Ekubandezelweni kwami ngalila kuSomnini, wangiphendula, wangibeka esibangeni.

⁶ USomnini ungakimi, yeke angesabi. Umuntu angangenzani na?

⁷ USomnini ungakimi, ungumsizami omkhulu; mina ngizakuqalela phasi abangizondako.

⁸ Kungcono ukuphephela kuSomnini, kunokwethembela emuntwini.

⁹ Kungcono ukuphephela kuSomnini, kunokwethembela emakhosaneni.

¹⁰ Zoke izizwe zingizombelezile! Ebizweni lakaSomnini ngiziphayile!

¹¹ Zingizombelezile, iye, zingizombelezile! Ebizweni lakaSomnini ngiziphayile!

¹² Zingizombelezile njengeenyosi, zapheliswa njengomlilo wameva! Ebizweni lakaSomnini ngiziphayile!

¹³ Nina nangidudula ngamandla kobana ngiwe, kodwana uSomnini wangisekela.

¹⁴ USomnini umamandlami neenkhwepha zami begodu ukusindiswa kwami.

¹⁵ Ematendeni wabalungileko kukhona ukuhlokoma kokuhlula ngokuthi: “Sokudla sakaSomnini senze izenzo ezinamandla!

¹⁶ Sokudla sakhe siphakamile, iye, sokudla sakaSomnini senze izenzo ezinamandla!”

¹⁷ Angeze ngafa kodwana ngizakuphila, ngizakukhuluma ngezenzo zakaSomnini:

¹⁸ USomnini wangihlunguphaza khulu, kodwana akhange anginikelele ekufeni.

¹⁹ Ngivulele amasango wokulunga ukuze ngingene ngawo, ngithokoze uSomnini.

²⁰ Leli lisango eliya kuSomnini, abalungileko bazakungena ngalo.

²¹ Somnini, ngikuthokoza ngombana ungiphendulile begodu ukusindiswa kwami.

²² Ilitje eladelwa babakhi libe ngeliqakathekileko ejikeni.

²³ Lokho kuzizenzo zakaSomnini; kusimangaliso emehlwenethu.

²⁴ Nanti ilanga uSomnini alenzileko; asithabeni sithakase kilo.

²⁵ Awu, Somnini, sindisa! Awu, Somnini, phumelelisa!

²⁶ Ubusisiwe ongenako ebizweni lakaSomnini. Siyanibusisa sisethempelini lakaSomnini.

²⁷ USomnini unguZimu, usiphe ukukhanya. Thomani umgidi, niphethe amatjhwaba ngezandla; niye eempondweni ze-aldari.

²⁸ Wena unguZimami, nje-ke ngizakuthokoza, unguZimami ngizakuphakamisa.

²⁹ Thokozani uSomnini ngombana ulungile; ukwethembeka kwakhe kujame isiphelani.