AMARHUBO 115 - IsiNdebele 2012 Translation

UZimu mkhulu kunabosingazimu

¹ Akungabi kithi Somnini, iye, akungabi kithi ukuhlonitjhwa; kodwana akube sebizweni lakho ngebanga lokwethembeka nobuqotho bakho.

² Kubayini izizwe zithi uphi uZimabo,

³ khisibe usezulwini, wenza koke akuthandako na?

⁴ Abosingazimu babo balisiliva negolide, okumsebenzi wezandla zomuntu.

⁵ Banemilomo kodwana ayikhulumi; banamehlo kodwana akaboni.

⁶ Baneendlebe kodwana azizwa; baneempumulo kodwana azinukeleli.

⁷ Banezandla kodwana azinamizwa; baneenyawo kodwana azikhambi; imiphimbabo ayikwazi ukuhomuza.

⁸ Ababenzileko bafana nabo; banjalo-ke boke abathembela kibo.

⁹ Israyeli, thembani uSomnini! Mbala, ulisizo nesihlangu senu.

¹⁰ Ndlu ka-Aroni, thembani uSomnini! Mbala, ulisizo nesihlangu senu.

¹¹ Nina abesaba uSomnini, thembani kuye! Mbala, ulisizo nesihlangu senu.

¹² USomnini uyasikhumbula: Uyabusisa, iye, abusise indlu ka-Israyeli, abusise indlu ka-Aroni,

¹³ abusise labo abamesabako, abakhulu nabancani.

¹⁴ Kwanga uSomnini anganandisa, nina nabantwabenu.

¹⁵ Inga ningabusiswa nguSomnini owenza izulu nephasi!

¹⁶ Amazulu mazulu kaSomnini, iphasi walinikela abantu.

¹⁷ Abafileko abamdumisi uSomnini, iye, noyedwa owehlela kwabathulileko.

¹⁸ Kodwana thina sizamdumisa uSomnini, kusukela nje bekube nini nanini. Haleluya!