AMARHUBO 112 - IsiNdebele 2012 Translation

Ukubusiswa kwabalungileko

¹ Haleluya! Ubusisiwe loyo owesaba uSomnini, othokozela khulu imiyalwakhe!

² Iinzukulwana zakhe zizakuhlonitjhwa enarheni; iye, abantwana babaqotho bazakubusiswa.

³ Umnotho nobunjinga kusendlinakhe; nokulunga kwakhe kuzakujama isiphelani.

⁴ Umuntu loyo ufana nomkhanyo ebumnyameni kilabo abaqotho: unomusa, isirhawu nokulunga.

⁵ Kumkhambela kuhle umuntu ophanako nobolekisako, ophatha iindaba zakhe ngokwethembeka.

⁶ Mbala, angeze anyakaziswa; olungileko uzakubongwa ngesikhathi soke.

⁷ Angeze esaba umbiko omumbi; ihliziywakhe isekelekile, iqiniswe kuSomnini;

⁸ iye, ihliziywakhe inzinzile. Yeke angeze esaba, ekugcineni uzakuqalela phasi amanabakhe.

⁹ Wabela ngesihle, aphe abachakileko; ukulunga kwakhe kujame isiphelani; idumo lakhe liphakanyiswa ngehlonipho.

¹⁰ Isikhohlakali sibona lokho, sitjhibe, sigugude amazinyo, siphele amandla; isifiso seenkhohlakali siyanyelela.