AMARHUBO 111 - IsiNdebele 2012 Translation

Ukudumisa imisebenzi emangalisako kaZimu

¹ Haleluya! Ngizakuthokoza uSomnini ngehliziywami yoke ebandla labaqotho, iye ehlanganweni.

² Mikhulu imisebenzi kaSomnini, iphenywa ngibo boke abayijabulelako.

³ Umsebenzakhe unokuhlonitjhwa nobukhosi nokulunga kwakhe kujame isiphelani.

⁴ Iye, uzenzele ibizo ngeemangaliso zakhe. USomnini unomusa nesirhawu:

⁵ Wabela abamesabako ukudla; akhumbule isivumelwano sakhe nini nanini;

⁶ atjengise abantu bakhe amandla wemisebenzakhe, ngokubapha ilifa labezizwe.

⁷ Imisebenzi yezandla zakhe ithembekile begodu ilungile; yoke ifundiswakhe iliqiniso.

⁸ Mbala inzinzile nini nanini ngombana yenziwa ngeqiniso nangobuqotho.

⁹ Wathumela abantu bakhe isihlengo; wayala isivumelwano sakhe isiphelani. Ibizo lakhe licwengile beliyesabeka!

¹⁰ Ukwesaba uSomnini kukuthoma kokuhlakanipha; kunikela ukuzwisisa okuhle kibo boke abahlonipha isivumelwaneso. Idumo lakhe lijame isiphelani!