AMARHUBO 11 - IsiNdebele 2012 Translation

USomnini usiphephelo nomvikeli

¹ Kumkhaleli; irhubo lakaDavida. Ngiphephela kuSomnini. Alo, ningatjho njani kimi nithi, “Balekela eentabeni njengenyoni,” na?

² Mbala iinkhohlakali ziqupha umsebe, zithiya umsubela emsebeni ukuze ebumnyameni zidumuze abaqotho ngehliziyo!

³ Nakube iinsekelo ziyasitjhulwa, olungileko angenzani na?

⁴ USomnini usethempelini lakhe elicwengileko, USomnini usezulwini esihlalweni sakhe sobukhosi; amehlwakhe ayaphenyisisa, ukuqala kwakhe kuqaphela abantu.

⁵ USomnini uqaphela olungileko nomumbi, uyamnyenya othanda inturhu.

⁶ Phezu kwabakhohlakeleko unisa amalahle avuthako, umlilo nesibabuli, iye, isivunguvungu sizakuba sisabelo sabo.

⁷ Njengombana uSomnini alungile, uthanda izenzo zokulunga. Oqotho uzakulemuka ubukhona bakhe.