AMARHUBO 109 - IsiNdebele 2012 Translation

Ukubawa ukulanyulelwa nokubuyiselelwa

¹ Kumkhaleli; irhubo lakaDavida. Ungathuli Zimu wendumiswami

² ngombana imilomo ekhohlisako ivulekile ngokujamelana nami, ikhuluma amanga ngami.

³ Bangizombeleze ngamezwi wezondo, bangisahlela ngaphandle kwesizathu.

⁴ Ngenca yethando lami, bayangisola, ngitjho nanyana ngisemthandazweni.

⁵ Bangibuyisela okumbi esikhundleni sokuhle nezondo esikhundleni sethando lami.

⁶ Bathi: “Bekani isikhohlakali sifakaze ngokujamelana naye, iye, ummangaleli ajame ngesidleni sakhe.

⁷ Lokha nabangiswako, akafunyanwe amlandu; ngitjho nomthandazwakhe awuthathwe njengesono!

⁸ Amalangakhe akancitjhiswe, omunye athathe isikhundla sakhe.

⁹ Abantwabakhe ababe ziintandani nomkakhe abe mhlolokazi.

¹⁰ Abantwabakhe ababe bozulani, bakhombele, bafune ukudla emarubhini wekhabo.

¹¹ Umatjhonisa akamthathele koke anakho nemiqhamuka iphange umsebenzi wezandla zakhe!

¹² Akungabikhona oba nesisa kuye, namkha arhawukele abantwabakhe nabaziintandani.

¹³ Iinzukulwana zakhe azijutjwe, iye, amabizwazo asulwe esizukulwaneni esilandelako!

¹⁴ Icala laboyise beenzukulwanezo alikhumbuleke phambi kwakaSomnini nesono sabonina singasuleki.

¹⁵ Izono zazo azihlale ziphambi kwakaSomnini, yena aphelise ukukhunjulwa kwazo ephasini

¹⁶ ngombana umuntu loyo akhange akhumbule ukubonisa isisa, kodwana walandelela iinchaka nabadududu kanye nabanehliziyo eyaphukileko bekwaba sekufeni.

¹⁷ Wathanda ukuthuwelelisa ngamanikelela, yeke amanikelela akawele kuye; Akhange athande ukubusisa, nje-ke akube kude naye!

¹⁸ Iye, amanikelela akamembathe njengengubakhe, angene ngaphakathi kwakhe njengamanzi nanjengamafutha azeswe emzimbenakhe!

¹⁹ Kuye akabe njengesambatho esimphuthelako nanjengebhande alithekeleza mihla le.”

²⁰ Kodwana kwanga lokhu kungaba sibetho esivela kuSomnini, salabo abangisolako; iye, salabo abakhuluma okumbi ngepilwami!

²¹ Wena Somnini, Somandla, ngenzela lokho ngebanga lebizo lakho; iye, ungihlenge ngebanga lokwethembeka kwakho!

²² Mbala ngichakile, ngiswele nehliziywami ihlabekile ngaphakathi kwami.

²³ Ipilwami inyamalala njengethunzi entambama, ngithintithwa njengentethe.

²⁴ Amadolwami ayageba ngebanga lokuzila ukudla; umzimbami ukhehlile, ngimathambo.

²⁵ Sese ngisiphoqo kabangisolako lokha nabangibonako, banikina iinhloko.

²⁶ Ngisize Somnini, Zimami! Ngisindise ngokwethembeka kwakho!

²⁷ Benze bazi bona sisandla sakho, nokobana wena Somnini lokho ukwenzile!

²⁸ Bona banganikelela, wena uzakubusisa! Nabaphoqakalako ngemva kobana bangivukele, incekwakho izakuthaba.

²⁹ Abangisolako abembathwe ziinhloni, baphuthelwe lihlazo labo njengengubo!

³⁰ Ngomlomami ngizamthokoza khulu uSomnini; ngimdumise phakathi kwesiqubuthu

³¹ ngombana ujame ngesidleni soswelako, kobana amsindise kilabo abalahle ipilwakhe.