AMARHUBO 108 - IsiNdebele 2012 Translation

Ukwethembela kuZimu

¹ Ingoma; irhubo lakaDavida.

² Zimu, ihliziywami inzinzile; ngizakuvuma, ngidumise. Mphefumulwami,

³ vuka! Ngeenara zamaharibha ngizakuphaphamisa ukusa.

⁴ Somnini, ngizakuthokoza hlangana nezizwe; ngikudumise phakathi kwabantu.

⁵ Ukwethembeka kwakho kuphakeme njengamazulu neqiniso lakho lilulekele emafini.

⁶ Zimu, phakama ngaphezu kwamazulu, iphazimulwakho ayibe ngaphezu kwephasi loke.

⁷ Sindisa ngesidla sakho ukuze abathandekako kuwe batjhaphuluke. Ngiphendule!

⁸ UZimu uthembisile endawenakhe ecwengileko wathi: “Ngokuthakasa ngizohlukanisa iTjhekemu, ngilinganise umrhoba weSukothi.

⁹ Ngeyami iGiliyadi, ngeyami iManase! I-Efrayimu iyingwanami, iJuda iyintongami yobukhosi.

¹⁰ IMowabi isisitja sami sokuhlambela; phezu kwe-Edomu ngiphosa ipatlagwana lami; Ngikuhlokomela ngokwenama wena Filistiya!”

¹¹ Ngubani ozangisa edorobheni elinemithangala? Ngubani ozangihlahla angise kwa-Edomu na?

¹² Angitjho nguwe, Zimu osilahlileko, wangasaphumi ipi namabuthwethu?

¹³ Akhese usisize esitheni ngombana isizo lomuntu lililize.

¹⁴ NgoZimu sizakuba nesibindi, uZimu ngokwakhe uzazigadangela phasi izitha zethu.