AMARHUBO 107 - IsiNdebele 2012 Translation

USomnini usindisa ebujameni boke

¹ Bongani uSomnini ngombana ulungile nokwethembeka kwakhe kujame isiphelani.

² Abahlengiweko bakaSomnini abatjho njalo, labo abahlenge esandleni somjamelani,

³ iye, labo ababuthe emazweni, ukusuka epumalanga netjingalanga nokusuka etlhagwini nesewula.

⁴ Abanye bazula erhalawumbeni, ebhudwini bangafunyana indlela eya emzini, iye, indawo yokuhlala;

⁵ balambile begodu bomile, umphefumulwabo udambile.

⁶ Nje-ke esizini labo balila kuSomnini, wabatjhaphulula ematlhuwenabo;

⁷ wabarhola ngendlela enqophileko kobana baye emzini, iye, indawo yokuhlala.

⁸ Abathokoze uSomnini ngokwethembeka kwakhe nangeemangaliso zakhe ebantwini.

⁹ Mbala, wakholisa owomileko, wasuthisa onephango ngokuhle.

¹⁰ Abanye bahlala ebumnyameni, iye, ethunzini elesabekako; baziimbotjhwa ezisesizini, emakhamandeleni

¹¹ ngombana bahlubuka amezwi kaZimu, banyenya iinluleko zongoPhezulu.

¹² Badanjiswa kusebenza nzima; bakhutjwa kwangabikhona obasizako.

¹³ Nje-ke esizini labo balila kuSomnini, wabasindisa ematlhuwenabo;

¹⁴ wabakhupha ebumnyameni, iye, ethunzini elesabekako; wavuthula iimbopho zabo.

¹⁵ Abathokoze uSomnini ngokwethembeka kwakhe nangeemangaliso zakhe ebantwini.

¹⁶ Mbala, wafohloza iminyango yekoporo, wephula iinqabo zeensimbi zamasango.

¹⁷ Abanye baphila ngobudlhayela ngebanga lendlela yeemphambeko zabo, bahlupheka ngenca yamacalabo.

¹⁸ Imiphimbabo yanyenya koke ukudla, batjhidela emasangweni wokufa.

¹⁹ Nje-ke esizini labo balila kuSomnini, wabasindisa ematlhuwenabo;

²⁰ wathumela ilizwi lakhe wabaphilisa, wabaphephisa emgodini wokufa.

²¹ Abathokoze uSomnini ngokwethembeka kwakhe nangeemangaliso zakhe ebantwini.

²² Abanikele ngemihlabelo yokuthokoza, babike imisebenzakhe ngokuhlokoma.

²³ Abanye behlela elwandle ngeenthayamanzi kobana benze umsebenzi wangemihla emanzini amanengi.

²⁴ Bona babona imisebenzi kaSomnini, iye, iimangaliso zakhe ekuzikeni:

²⁵ Wakhuluma, wavusa isiwuruwuru, wasikimisa amadlambi welwandle.

²⁶ Abakhuphulela phezulu, abuya abaphosa ekuzikeni; engozini leyo baphakanyelwa ziimbindi,

²⁷ badiyazela, batherezela njengesidakwa, bafika kwamgodi uyagcina.

²⁸ Nje-ke esizini labo balila kuSomnini, wabakhupha ematlhuwenabo:

²⁹ Wathulisa isiwuruwuru namadlambi arhobha.

³⁰ Bathaba ngombana athula, wabaletha echwebeni abalifisako.

³¹ Abathokoze uSomnini ngokwethembeka kwakhe nangeemangaliso zakhe ebantwini.

³² Abamphakamise ebandleni elikhulu, bamdumise ehlanganweni yabaphathi.

³³ USomnini wenza imilambo ibe lirhalawumba, iiyalo zibe yihlabathi eyomileko,

³⁴ inarha enothileko ibe libhudu ngenca yobukhohlakali babahlali bayo.

³⁵ Uphendula irhalawumba libe midzwela, ihlabathi eyomileko ibe ziiyalo.

³⁶ Lapho-ke, waphilisa abanephango, bakha khona umuzi, iye, indawo yokuhlala.

³⁷ Barhatjha imbewu emasimini, batjala iindiribe, bafunyana isivuno esihle.

³⁸ Lokha nababusisako, banda khulu, akhange avume bona ifuywabo iphunguke.

³⁹ Kodwana nabangabusisiko bancipha ngesibalo, babhesa ngebanga lokugandelelwa, iinkinga nesizi.

⁴⁰ USomnini uthela amakhosana ngehlazo, awenze azulazule ebhudwini elinganandlela,

⁴¹ kodwana uvikela abadududu ekugandelelweni, andise imindenabo njengemihlambi.

⁴² Abaqotho bayakubona lokho bajabule; kodwana zoke iinkhohlakali zivala umlomo.

⁴³ Ohlakaniphileko uzaziyelela izintwezi; acabange ngokwethembeka kwakaSomnini.