AMARHUBO 106 - IsiNdebele 2012 Translation

Umusa kaZimu emlandweni wakwa-Israyeli

¹ Haleluya! Dumisani uSomnini ngombana ulungile nokwethembeka kwakhe kujame isiphelani!

² Ngubani ongamemezela izenzo zakaSomnini zamandla, namkha azwakalise loke idumo lakhe na?

³ Babusisiwe abalonda okufaneleko, benze nokulungileko ngeenkhathi zoke!

⁴ Somnini, ungikhumbule lokha nawuba nomusa ebantwini bakho; ungitjheje nawubasindisako

⁵ ukuze ngibone okuhle kwabakhethiweko bakho, ngijabule ekwenameni kwesizwe sakho, ngizikhakhazise nabalilifa lakho.

⁶ Thina njengabobamkhulu sonile; siphambukile, nje-ke sonakele.

⁷ Lokha abobamkhulu nabaseseGibhide, akhange banake iimangaliso zakho; azange bakhumbule ukwethembeka kwakho okukhulu. Bahlubuka nabaselwandle, iye, elwandle lomGaba.

⁸ Nokho uSomnini wabasindisa ngenca yebizo lakhe, kobana azise amandlakhe amakhulu.

⁹ Wakhalimela ilwandle lomGaba, loma, wabayamisa ekuzikeni inga kuserhalawumbeni.

¹⁰ Wabasindisa esandleni sabanezondo, wabahlenga esandleni sezitha.

¹¹ Amanzi abhibha amanababo, akhange kusinde nelilodwa lawo.

¹² Nje-ke bakholwa amezwakhe, bavuma idumo lakhe.

¹³ Kodwana baba masinya ekukhohlweni imisebenzakhe; akhange baqalelele iseluleko sakhe.

¹⁴ Baba nokukhaluza okukhulu nabaserhalawumbeni, bazizinya uZimu khona enarheni elibhudu.

¹⁵ Wabapha abakubawako, kodwana wabehlisela ukugonyuluka.

¹⁶ Ekampeni bafela uMosi umona no-Aroni ocwengileko wakaSomnini.

¹⁷ Iphasi lavuleka laginya uDatani, ladibizesa nejima laka-Abiramu.

¹⁸ Hlangana nejimelo kwaqubuka nomlilo; iinkhohlakalezo zadliwa malangabi.

¹⁹ Benza ikunzana eRhorebe, balotjha isithombesibunjwa.

²⁰ Benana uZimu oyiphazimulwabo ngomfanekiso wekomo edla utjani!

²¹ Bakhohlwa uZimu omsindisabo owenza izinto ezikulu eGibhide,

²² iye, iimangaliso enarheni kaRhamu nezinto ezesabekako elwandle lomGaba.

²³ Yeke wathi gade azobabhubhisa, kodwana ngetjhudu uMosi, okhethiweko wakhe, wajama esikhaleni phambi kwakhe kobana adambise ilaka lakhe ekubhubhiseni.

²⁴ Godu banyaza nenarha ekhangako, akhange bakholwe iinthembiso zakaSomnini.

²⁵ Bakhonona ematendenabo, azange balalele ilizwi lakaSomnini.

²⁶ Ngalokho waphakamisa isandla, wafunga bona uzobawisa erhalawumbeni,

²⁷ nokobana uzokusabalalisa iinzukulwana zabo hlangana nezizwe, azihlakaze kizo zoke iinarha.

²⁸ Nje-ke bazibophelela kuBhali wePewori, badla okuhlatjelwe abafileko.

²⁹ Ngalokho bathukuthelisa uSomnini ngezenzo zabo, kwaqubuka isifo phakathi kwabo.

³⁰ UFiniyasi wasikima walamula, isifo saphela;

³¹ wabalelwa lokho njengokulunga, iinzukulwana ngeenzukulwana nini nanini.

³² Godu bathukuthelisa uSomnini emanzini weMeriba, uMosi wehlelwa zizehlo ngebanga labo:

³³ Lokha nabahlubuka uMoya kaSomnini, umlomo wakaMosi wakhuluma ngamawala.

³⁴ Godu akhange babhubhise izizwe njengombana uSomnini bekabayalile.

³⁵ Kodwana bakhozisana nazo bebafunda ukwenza imikhubazo.

³⁶ Balotjha abosingazimu bazo okwabuye kwaba sisifu kibo.

³⁷ Benzela imimoya emimbi imihlabelo ngamadodana namadodakazabo.

³⁸ Bathulula iingazi ezinganamlandu, iye, iingazi zamadodana namadodakazabo. Benzela ngawo abosingazimu beKanana imihlabelo; ngalokho inarha yasilaphazwa ziingazi ezinengi.

³⁹ Mbala, bazininda ngezenzo zabo, ngemikhubabo leyo bangwadla.

⁴⁰ Yeke ilaka lakaSomnini lavutha ngabantu bakhe, wanyenya ilifa lakhe.

⁴¹ Wabanikela esandleni sezizwe ukuze labo ababazondako bababuse.

⁴² Izitha zabo zabagandelela, baguqiswa ngaphasi kwesandla sazo.

⁴³ Wabasindisa kanengi uSomnini, kodwana bona baba namasu wokuhlubuka; ngalokho bacwila ngecala labo.

⁴⁴ Nokho wanaka isizi labo lokha nezwa isililo sabo.

⁴⁵ Wakhumbula isivumelwano sakhe ngenca yabo, waba nomusa ngokwethembeka kwakhe okukhulu.

⁴⁶ Wenza bona barhawukelwe kilabo egade babathumbile.

⁴⁷ Somnini, Zimethu, sisindise! Yewusibuthe hlangana nezizwe ukuze sazise ibizo lakho elicwengileko, sibabaze iphazimulwakho.

⁴⁸ Akudunyiswe uSomnini uZimu ka-Israyeli kusukela nini nanini bekube siphelani! Abantu abatjho bathi: “Amen!” Haleluya!