AMARHUBO 105 - IsiNdebele 2012 Translation

Ukudunyiswa kwakaZimu osindise u-Israyeli

¹ Bongani uSomnini, nibize ibizo lakhe; nazise izenzo zakhe phakathi kwezizwe.

² Mvumeleni ingoma, nimdumise; babazani zoke iimangaliso zakhe.

³ Zikhakhaziseni ebizweni lakhe elicwengileko; azithabe iinhliziyo zabafuna uSomnini.

⁴ Rhuluphelani uSomnini namandlakhe; nifunisise ubuso bakhe njalonjalo.

⁵ Khumbulani iimangaliso zakhe azenzileko, imikarisomraro nemithetho ayikhulumileko,

⁶ iye, nina nzukulwana zaka-Abrahamu inceku yakaSomnini, nina bantwana bakaJakopo okhethiweko wakhe.

⁷ Yena unguSomnini uZimethu; imithethwakhe yembethe iphasi loke.

⁸ Ukhumbula isivumelwano sakhe nini nanini nesithembiso ayala ngaso iinkulungwana zeenzukulwana,

⁹ iye, isivumelwano asenza no-Abrahamu nesifungo sakhe ku-Isaka.

¹⁰ Wasiqinisa kuJakopo saba simiso nakuma-Israyeli saba sivumelwano isiphelani;

¹¹ wathi: “Wena Jakopo ngizakunikela inarha yeKanana, ibe sisabelo selifa lama-Israyeli.”

¹² Lokha ama-Israyeli nasesembalwa ngesibalo, aba ziinkhonzi kwesikhatjhana eKanana,

¹³ nalokha azulazula ezizweni ngezizwe, iye ukusuka emibusweni ukuya komunye,

¹⁴ uZimu akhange avumele noyedwa, bonyana awagandelele. Wabe wakhalima namakhosi ngebanga lawo,

¹⁵ ngokuthi: “Ningathinti abazesiweko bami, ningalimazi abaphorofidi bami.”

¹⁶ Lokha nawuthumele indlala ephasini, nalokha nawephula umphekgho wesikwa,

¹⁷ wathumela umuntu phambi kwawo: uJosefa owathengiswa njengekhoboka.

¹⁸ Baminyezela iinyawo zakhe ngamakhamandela, intamakhe yafakwa ikholoro yesimbi.

¹⁹ Ilizwi lakaSomnini lamzizinya ukufikela lapha isithembiso sakhe sizaliseka khona.

²⁰ Ikosi uFaro yathumela kobana athukululwe, umbusi wabantu loyo wamtjhaphulula.

²¹ Yena wamenza umengameli wesigodlo sakhe nombusi phezu kwepahlakhe yoke,

²² kobana ngelizwi nangokuthanda kwakhe abophe iinkhulu zakaFaro, abe afundise nabaphathi ukuhlakanipha.

²³ Ngalokho u-Israyeli weza eGibhide; uJakopo wahlala njengesikhonzi enarheni kaRhamu.

²⁴ USomnini wandisa abantu bakhe khulu, wabenza babanamandla ngaphezu kwabagandeleli babo.

²⁵ Waphendula iinhliziyo zabo kobana zizonde abantu bakhe, zibenzele ubukhwebetjhana.

²⁶ Wathumela uMosi incekwakhe kanye no-Aroni amkhethako.

²⁷ Benza iimbonakaliso kumaGibhide, iye, imikarisomraro enarheni kaRhamu.

²⁸ UMosi no-Aroni azange batjhugulule amezwakhe: Lokha uSomnini nathumela ubumnyama, mbala kwaba nzima tshu.

²⁹ Waphendula amanzawo aba ziingazi, ukuze iinhlambi zabo zife.

³⁰ Inarhawo yazala swi ngeenrhwarhwa, ngitjho nemalawini wamakhosanawo.

³¹ Wakhuluma kwavela iwoma leembawu, kwaba nemiyani emkhawulweni woke.

³² Wawehlisela isinanja esikhundleni sezulu, kwamanyaza umbani enarhenawo,

³³ waphohloza isidiribe namakhiwanawo, wephula nemithi yenarhawo.

³⁴ Wakhuluma kwavumbuka intethe, iye, isikhonyani esingangobaba.

³⁵ Sona sadla zoke iimila zenarhawo, sarhiribidela iinthelo zamasimawo.

³⁶ Wamadlha woke amazibulo enarhenawo, iye, isithelo sokuthoma sobudoda bawo.

³⁷ Wakhupha ama-Israyeli aphethe isiliva negolide, akakho noyedwa phakathi kweenkoro zakhe owararejekako.

³⁸ IGibhide yajabulela ukuphuma kwama-Israyeli ngombana besele yehlelwe kukwesaba.

³⁹ USomnini wendlala ilifu kobana libe mthunzi ngehla kwawo nomlilo wokuwakhanyisela ebusuku.

⁴⁰ Lokha nakhombelako, wawapha iinkwali, iye, wawasuthisa ngokudla okuvela ezulwini.

⁴¹ Wavula idwala, kwageleza amanzi, aba njengomlambo ebhudwini.

⁴² Mbala, wakhumbula isithembiso sakhe esicwengileko asinikela ku-Abrahamu incekwakhe.

⁴³ Wakhupha abantu bakhe ngokujabula, abakhethiweko bakhe ngokuhlokoma.

⁴⁴ Wabanikela iinarha zezizwe, iye, bazuza umjuluko wazo

⁴⁵ ukuze balonde iimiso zakhe, bagcine imithethwakhe. Haleluya!