AMARHUBO 104 - IsiNdebele 2012 Translation

UZimu ngumdali nomboneleli

¹ Dumisa uSomnini mphefumulwami! Somnini, Zimami, umkhulu khulu wena, wembethe ukuhlonitjhwa nobukhosi!

² Yena ozisonga ngokukhanya njengengubo; ondlala amazulu njengetende,

³ owakha amalawakhe angehla emanzini, amafu awenze ikaranakhe, akhambe phezu kwamaphiko wommoya.

⁴ Yena owenza imimoya iinthunywa zakhe, umlilo namalangabi kube ziinsebenzi zakhe.

⁵ Yena osekela iphasi phezu kweensekelo zalo ukuze lingasanyakaziswa nini nanini.

⁶ Wena Somnini, wagubuzesa iphasi ngamanzi amanengi njengengubo, njengombana amanzi ajama ngehla kweentaba.

⁷ Ngokukhalima kwakho abaleka, ngokuzwakala kokuduma kwakho asuka masinyana,

⁸ anyukela eentabeni, agelezela phasi emikghotheni, endaweni owawajamisela yona.

⁹ Wawabekela umkhawulo lapha angeze afahla khona; akhange asagubuzesa iphasi godu.

¹⁰ USomnini wenza iiyalo ziphundluke emirhobeni; zigeleze hlangana neentaba,

¹¹ ziseze zoke iimbadana zenarha: Abodumbana bommango basuse ukoma kwabo;

¹² iinyoni zesibanga zizakhele ngehla kwamanzi, zibethe imilozi hlangana namakari wemithi.

¹³ Uthelelela iintaba ngamanzi asemalawinakhe angehla, iphasi lanelisiwe ngeenthelo zemisebenzakhe.

¹⁴ Yena omilisela ifuyo utjani neentjalo kobana abantu bazilime ukuze bavune ukudla ehlabathini:

¹⁵ Iwayini elithokozisa ihliziyo yomuntu, amafutha we-oliva aphazimulisa ubuso nesikwa esiqinisa ihliziyo yobhubhako.

¹⁶ Imithi yakaSomnini isezelwa kuhle, ngitjho nemisedari yeLibhanoni ayitjalileko,

¹⁷ lapha iinyoni zakha khona iinhlakana; udoyi abe nendlwana emithini yomsayipurusi.

¹⁸ Iintaba eziphakamileko zingezeembuzi zeentaba; amadwala alirharha leembila.

¹⁹ Wenze inyezi kobana kuphawuleke iinkhathi nelanga elazi isikhathi sokutjhinga kwalo.

²⁰ Uletha ubumnyama kube busuku, khonapho kuphume zoke iinlwana zehlathi.

²¹ Amabhubezana ayabhodla afune inyama, abawe ukudla kwawo kuZimu.

²² Ilanga naliphumako, ayasithela, alale emadzabenawo.

²³ Umuntu uyaphuma aye emsebenzinakhe, iye, emtjhikatjhikeni bekuhlwe.

²⁴ Maye, minengi kangangani imisebenzakho Somnini! Yoke uyenze ngokuhlakanipha; iphasi ligcwele umnothwakho.

²⁵ Le, kunelwandle elikhulu begodu libanzi lendlalekile; ligcwele iwoma leemphili ezikhakhabako, iye, iindalwa ezinganakubalwa ezikulu nezincani.

²⁶ Kilo kukhamba iinthayamanzi nonomrhaso welwandle owamdalako; wamenza bona adlale kilo.

²⁷ Koke kuqalelele kuwe kobana ukuphe ukudla ngesikhathi.

²⁸ Lokha nawukunikela ukudla, kuyakudobha; nawuvula isandla sakho kwaneliswe ngokuhle.

²⁹ Lokha nawusitheza ubuso, kuyakakamala; nawususa ummoya wakho lokho, kuyafa, kubuyele ethulini lapha kubuya khona.

³⁰ Lokha nawuphefumulela kikho, kuyadaleka; ngendlela leyo uvuselela ubuso bephasi.

³¹ Kwanga iphazimulo yakaSomnini ingajama isiphelani! Kwanga uSomnini angathaba emsebenzinakhe;

³² iye, yena othi naqala iphasi, lidengezele; nathinta iintaba, zithunye intuthu.

³³ Ngizakukhalelela uSomnini ipilwami yoke, ngidumise uZimami qobe ngisekhona.

³⁴ Kwanga ukuzimisela kwami kungamukeleka kuye, njengombana ngenamile kuSomnini.

³⁵ Kwanga izoni zingapheliswa ephasini neenkhohlakali zingasabakhona. Dumisa uSomnini mphefumulwami! Haleluya!