AMARHUBO 103 - IsiNdebele 2012 Translation

Isimemezelo sokudumisa uSomnini

¹ Irhubo lakaDavida. Dumisa uSomnini mphefumulwami! Iye, koke okuphakathi kwami akudumise ibizo lakhe elicwengileko.

² Dumisa uSomnini mphefumulwami! Soke isirhawu sakhe ungasikhohlwa!

³ Yena olibalela woke amacalakho, elaphe zoke izifo zakho,

⁴ okuhlenga uphephe emgodini wokufa, akubusise ngokwethembeka nangomusa,

⁵ okuzalisa ngokuhle, kufikela lapha waneliseka khona; ubutjha bakho buvuseleleke njengekhozi.

⁶ USomnini wenza okulungileko, boke abagandelelweko ubenzela ubulungiswa.

⁷ Wazisa uMosi iindlela zakhe, iye, nama-Israyeli izenzo zakhe.

⁸ USomnini unomusa nesirhawu, ubuthaka ekusilingekeni, uzele ukwethembeka.

⁹ Akahlali asola; akanghaleli kwasafuthi.

¹⁰ Akasiphathi njengokufanele izono zethu; akasibuyiseleli ngokulingene amacalethu.

¹¹ Njengokuphakama kwezulu ngehla kwephasi, kungako ukwethembeka kwakhe kwabamesabako.

¹² Njengepumalanga idedelene netjingalanga, ngokunjalo ususa iimphambeko zethu kithi.

¹³ Njengoyise onesirhawu ebantwaneni bakhe noSomnini unesirhawu kangako kwabamesabako.

¹⁴ Yena uyazi bona sibunjwe ngani, uyakhumbula bonyana silithuli nje.

¹⁵ Amalanga wobhubhako anjengotjani: Uqhakaza njengelikhwa lommango,

¹⁶ kodwana lokha ummoya nawulibethako, liyaphela, indawalo lingasayazi.

¹⁷ Nokho ukwethembeka kwakaSomnini kungokwanini nanini kwabamesabako nokulunga kwakhe kungokweenzukulwana

¹⁸ kilabo abalonda isivumelwano sakhe, iye, labo abakhumbula ukulandela ifundiswakhe.

¹⁹ USomnini unzinzise isihlalo sakhe sobukhosi ezulwini; ubukhosi bakhe bengamele koke.

²⁰ Dumisani uSomnini nina ngilozi zakhe, iye, nina ngorho ezinamandla eziphelelisa imilaywakhe ngokulalela amezwi wephimbo lakhe!

²¹ Dumisani uSomnini nina noke mabuthwakhe, iye, nina nceku zakhe enenza intandwakhe!

²² Dumisani uSomnini nina noke mbunjwa zakhe eendaweni zoke azibusako. Dumisa uSomnini mphefumulwami!