AMARHUBO 102 - IsiNdebele 2012 Translation

Umthandazo kuSomnini wanini nanini

¹ Umthandazo wohluphekileko lokha abuthakathaka godu abubula phambi kwakaSomnini.

² Somnini, yizwa umthandazwami; ilizwi lesililo sami alifike kuwe.

³ Ungafihli ubuso bakho kimi elangeni lesizi lami; beka indlebakho kimi mhlana ngikubizako; ungiphendule masinyana!

⁴ Iye, amalangami aphela njengentuthu namathambami avutha njengomlilo eziko.

⁵ Ihliziywami iwohlokile begodu ibune njengotjani; sese ngibuthakathaka kobana ngingadla.

⁶ Ngebanga lokuquma kwami sese ngikhehlile, ngimathambo.

⁷ Nginjengegubulu lerhalawumba nanjengesirhulurhulu semarubhini.

⁸ Nangileleko ngiyaphilelwa, nginjengenyoni ehlezi yodwa ephahleni.

⁹ Ilanga loke izitha zami ziyangiphoqa; abangithukako bahlolozela ngami.

¹⁰ Ngikhuma umlotha inga ngidla isikwa, ngivange isiselo sami neenyembezi,

¹¹ ngebanga lobukhali nelaka lakho, iye, ungithethe wangifuthela eqadi.

¹² Amalangami anjengethunzi entambama, ngiyabuna njengotjani.

¹³ Kodwana wena Somnini, unobukhosi banini nanini, isinanazelo sakho ngeseenzukulwana ngeenzukulwana.

¹⁴ Yewusikime ngokwakho urhawukele iZiyoni! Kusikhathi somusa ngalo, iye, isikhathi esibekiweko sifikile

¹⁵ ngombana iinceku zakho ziyawabuka amatje walo begodu zitlhuwela ithuli leZiyonelo.

¹⁶ Izizwe zizalesaba ibizo lakaSomnini, idumo lakhe lihlonitjhwe makhosi woke wephasi

¹⁷ lokha navuselela iZiyoni. Uzazibonakalisa asephazimulwenakhe,

¹⁸ anake umthandazo wabahlubule begodu angekhe asinyaze isibawo sabo.

¹⁹ Mbala, lokhu kuzakutlolwa phasi kube ngokwesizukulwana esizako nesizwe esizakudaleka sizakudumisa uSomnini

²⁰ lokha nasele asiqalile aphezulu ekucwengeni, iye, lokha uSomnini nasele aqale phasi asezulwini,

²¹ ukuze alalele ukububula kweembotjhwa nokutjhaphulula labo esele benganyelwe kukufa.

²² Ibizo lakaSomnini lizakumenyezelwa eZiyoni nedumo lakhe eJerusalema,

²³ lokha abantu nababuthana ndawonye, ngitjho nemibuso ukuze balotjhe uSomnini.

²⁴ USomnini waqeda amandlami ngisesephakathi kwendlela yepilo, iye, warhunyeza amalangami.

²⁵ Ngebangelo ngiyancenga ngithi: “Zimami, ungangisusi ngisesephakathi kwamalangami.” Iminyakakho iseenzukulwaneni ngeenzukulwana.

²⁶ Wabeka iinsekelo zephasi emandulo namazulu amsebenzi wezandla zakho.

²⁷ Zona izintwezo zizakubhubha, kodwana wena ujamile. Iye, koke lokho kuzakuphela njengengubo; mbala, njengesambatho uzakukuphendulela, ngalokho kuzakuphela.

²⁸ Kodwana wena unguwe njalo, iminyakakho ayinamkhawulo.

²⁹ Abantwana beenceku zakho, bazakuhlala baphephile. Iinzukulwana zabo zizakunzinza phambi kwakho.