AMARHUBO 10 - IsiNdebele 2012 Translation

Umthandazo wokutjhatjhululwa eenkhohlakalini

¹ Somnini, kubayini ujamele kude na? Ufihlelani ubuso ngeenkhathi zokubandezelwa?

² Ngokuzigqaja iinkhohlakali zizumana nabadududu! Inga zingabanjwa emaqhingenazo eziwalukileko.

³ Isikhohlakali sikhuzela iimfiso zaso, sibongelele inzuzwaso, sinyefule uSomnini.

⁴ Isikhohlakali siyazitjhaya, asinandaba noSomnini; woke amahlelwaso akanaZimu.

⁵ Iindlela zaso ziyabambelela ngesikhathi soke, siqoqomele, iingwebo zakho zikude naso, sitsakela boke abajamelani baso amathe.

⁶ Sithi ehliziywenaso: “Angeze ngasikinywa; ngesikhathi soke angisoze ngehlelwa yingozi.”

⁷ Umlomaso ugcwele ukuthukana, ikohliso nenturhu; ngaphasi kwelimu laso kukhona ukonakala nekohlakalo.

⁸ Sizifihla emizaneni ukuze sikhukhuthele, sibulale onganacala eendaweni ezisithekileko. Amehlwaso ahlala aqaphele ungazimbi;

⁹ sibadalala njengebhubezi nalithiyelela emphandwinalo, sibadalala bona sibambe ohluphekileko. Iye, sibamba ohluphekileko ngokumyengela ngenedenaso.

¹⁰ Sisunduza besiwise abanganamenyeli ngamandlaso;

¹¹ nanyana kunjalo sithi ehliziywenaso: “UZimu ukhohliwe, ubuso bakhe ubusithezile, yeke akasoze akubone lokhu.”

¹² Sikima Somnini! Phakamisa isandla sakho, Zimu! Ungabakhohlwa abahluphekileko!

¹³ Kuyangani bonyana isikhohlakali sinyefule uZimu, ngokudlumbana bona wena awunaki na?

¹⁴ Kodwana wena Somnini, uyabona! Wena ngokwakho uyelela umonakalo nesizi ukuze lokho kube sesandleni sakho. Yeke ungazimbi uzinikela kuwe, iye, wena umsizi wentandani.

¹⁵ Yephula ingalo yesikhohlakali nesoni; urhubhulule iimphambeko zomoni kungasali litho!

¹⁶ Mbala, uZimu uyikosi nini nanini; izizwe zizakubhujiswa enarhenakhe.

¹⁷ Wena Somnini, ulalela ukulangazela kwabathobileko, iye, ihliziywabo uyayikhuthaza nendlebakho uyibeke kibo,

¹⁸ kobana wenze ukulunga entandaneni nakogandelelweko. Isikhohlakali asingahlali sihlukumeza onganabani ngokumqotjha enarheni.