AMAHEBHERU 9 - IsiNdebele 2012 Translation

Ukulotjha kwephasinapha nekwezulwini

¹ Nje-ke nesivumelwano sokuthoma besinemithetjhwana obekulotjhwa ngayo ngendaweni ecwengileko.

² Kwakhiwa itende lokuhlanganela; ngaphakathi kwendawo yalo yokuthoma bekunelithi leembani, itafula nezikwa ezibekwa phambi kwakaZimu, leyo bekuyindawo ecwenge khulu.

³ Ngemva kwerharideni lesibili bekukhona indawo okuthiwa yindawo ecwenge khulu.

⁴ Ngaphakathi kwayo bekukhona i-aldari legolide lokutjhisela itjhwalo nomfaji wesivumelwano otshidzwe woke ngegolide. Ngaphakathi kwawo bekubulungwe umjeka ophethe imana, intonga ka-Aroni eyakhe yahluma amakari nomqebethu wesivumelwano.

⁵ Ngaphezu komfaji bekunamakerubhi wephazimulo engamele isihlalo somusa. Okwanje asikwazi ukukhuluma ngokugcweleko ngezintwezi.

⁶ Ngokunjalo, lokha koke sele kuhlelekile ngendlela le, abaphristi bangena njalonjalo ngengcenyeni yokuthoma yetende lokuhlanganela bona benze umsebenzabo wokulotjha.

⁷ Kodwana engcenyeni yesibili kungena kwaphela umphristi omkhulu kanye ngomnyaka; akangeni ngaphandle kokuthatha iingazi anikela ngazo mayelana naye nangenca yezono ezenziwe babantu ngephoso.

⁸ Ngalokhu uMoya oCwengileko utjengisa bona indlela yokungena endaweni ecwenge khulu ayikavuleki, mlunga ingcenye yokuthoma yetende isajamile.

⁹ Lokho kumfanekiso wesikhathesi, ekutjengiswa ngakho bona iminikelo nemihlabelo enikelweko azange iphelelise isazelo somlotjhi.

¹⁰ Kodwana beyiphathelene nokudla nokusela kanye nemihlobohlobo yokuhlambuluka ekuziimiso ezimalungana nomzimba bekube sikhathi sehlelo elitjha.

¹¹ UKrestu selafikile njengomphristi omkhulu wezinto ezihle esele zikhona, wangena ngetendeni elikhulu neliphelele ukudlula, elingakenziwa ngezandla okutjho elingasilo lalokhu okudaliweko.

¹² Wangena kwaba kanye kwaphela endaweni ecwenge khulu, kungasi ngeengazi zeembuzi namathole, kodwana ngeengazi zakhe ngokwazo wasizuzela ukuhlengwa okungapheliko.

¹³ Iingazi zeembuzi nezeenkomo kanye nokufafazwa ngomlotha wethokazi elitjhisiweko kuhlambulula labo abasilaphazweko ukuze babe ngabahlwengileko ngokomzimba.

¹⁴ Khulu kangangani-ke iingazi zakaKrestu owazinikela ngokwakhe kuZimu ngoMoya oCwengileko wesiphelani anganamphambo, zizakuhlanza isazelo sethu emisebenzini efileko ukuze silotjhe uZimu ophilako.

¹⁵ Ngalokho uKrestu umlamuleli wesivumelwano esitjha ukuze kuthi labo ababiziweko bamukele isithembiso selifa elingapheliko. Nje-ke ukufa kwakhe kwenzeke ukuze abahlenge eemphambekweni zesivumelwano sokuthoma.

¹⁶ Lapha kunencwadi yelifa, kufanele kube khona ubufakazi bokufa kwaloyo owayitlolako

¹⁷ ngombana incwadi yelifa isebenza kwaphela nasele kubhujiwe ngebanga lokobana ayisebenzi nakube loyo owayitlolako usaphila.

¹⁸ Kungalokho nesivumelwano sokuthoma singazange sajanyiswa kungakaphalazwa iingazi.

¹⁹ UMosi sele amemezele woke umyalo womthetho ebantwini boke, wathatha iingazi zamathole neembuzi, amanzi, uboya obububende nehisopi wafafaza umsongo wencwadi ngokwawo nabantu boke,

²⁰ asithi: “Qalani, lezi ziingazi zesivumelwano uZimu anijamisele sona.”

²¹ Ngokunjalo uMosi wafafaza iingazi etendeni lokuhlanganela nakizo zoke izinto ezisetjenziswa kilo.

²² Ukuya ngokomthetho pheze zoke izinto zihlanjululwa ngeengazi, ngaphandle kokuphalaka kweengazi akukho ukulitjalelwa kwezono.

Ukuzinikela kwakaKrestu kususa izono

²³ Ngokunjalo bekufanele bona imifanekiso yezinto zezulwini ihlanjululwe ngalokho. Kodwana izinto zezulwini zifuna imihlabelo engcono kunaleya

²⁴ ngombana uKrestu azange angene endaweni ecwengileko eyakhiwe ngezandla zabantu emfanekiso nje waleyo ekungiyo, kodwana wangena ezulwini ngokwalo, khona azasijamela phambi kwakaZimu.

²⁵ Yena azange azinikele kanenginengi njengomphristi omkhulu lokha nakangena endaweni ecwengileko iminyaka ngeminyaka neengazi ezingasizo zakhe.

²⁶ Ngathana bekunjalo bekufanele ahlupheke kanenginengi kusukela ekusekelweni kwephasi. Kodwana ubonakaliswe kanye kwaphela ekupheleni kwesikhathi bona asuse izono ngokuzinikela kwakhe.

²⁷ Njengombana kujanyisiwe bona abantu bafe kanye, emva kwalokho kube kugwetjwa,

²⁸ nje-ke noKrestu sele anikelwe kanye kobana athwale izono zabanengi, uzakubuye abonakale kwesibili, angakezi bonyana uzokuthwala isono kodwana ukusindisa labo abamlindeleko.