AMAHEBHERU 8 - IsiNdebele 2012 Translation

Umphristi omkhulu wesivumelwano esingcono

¹ Ummongo walokho esikutjhoko ngilokhu: Sinomphristi omkhulu ohlezi ngesigomeni sesihlalo sobukhosi emazulwini,

² usikhonzi endaweni ecwengileko netendeni lamambala elajanyiswa nguSomnini ingasi mumuntu.

³ Ngiloyo naloyo umphristi omkhulu ubekelwe bona anikele ngeminikelo nangemihlabelo. Nje-ke bekufanele bona naye umphristi wethu omkhulu abe nelitho azokunikela ngalo.

⁴ Ngathana bekusephasinapha bekangekhe abe mphristi ngombana bakhona abaphristi abanikela ngeminikelo ngokomthetho.

⁵ Bona balotjha endaweni emfanekiso nesithunzi salokho okusezulwini. Kungakho uMosi ngesikhathi azakwakha itende lesivumelwano, wayalwa kwathiwa: “Qinisekisa bonyana wenza koke lokhu ngomfanekiso owakhonjiswa wona entabeni.”

⁶ Kodwana manjesi uJesu wamukela ukulotjha okusezingeni eliphezulu, begodu ngokudluleleko ungumlamuleli wesivumelwano esingcono nesisekelwe phezu kweenthembiso ezingcono.

⁷ Nangathana bekungekho okusolekako esivumelwaneni sokuthoma, kwamambala bekungekhe sisafuneka sesibili.

⁸ Kodwana uZimu uyasisola isizwe sakhe, nakasithi: “Qalani isikhathi siyeza, lapha ngizakwenza khona isivumelwano esitjha nendlu ka-Israyeli kanye neyakaJuda. Kutjho uSomnini.

⁹ Asizukufana nesivumelwano engasenza naboyise nangibabamba ngesandla kobana ngibakhuphe eGibhide ngombana bona bephula isivumelwano sami, lokha mina nangimphathi wabo. Kutjho uSomnini.

¹⁰ Nasi isivumelwano engizosenza nendlu ka-Israyeli ngemva kwesikhatheso. Kutjho uSomnini. Ngizakubeka umthethwami emikhumbulwenabo ngiwutlole eenhliziyweni zabo. Ngizakuba nguZimabo, bona babe babantu bami.

¹¹ Umuntu angeze asafundisa omunye womphakathi namkha umfowabo athi, ‘Yazi uSomnini’ ngombana boke bazabe bangazi, ukusukela komncani ukuya komkhulu. Kutjho uSomnini.

¹² Mbala ngizakucolela ubukhohlakali babo, ngingasakhumbula icala labo.”

¹³ Ngokukhuluma athi, “isivumelwano esitjha”, wenze bonyana sokuthoma sibe ngesidala; nje-ke okudala nokulupheleko kuseduze nokunyamalala.