AMAHEBHERU 7 - IsiNdebele 2012 Translation

Umphristi onjengoMalkitsedekhi

¹ UMalkitsedekhi lo bekuyikosi yeSalema, amphristi wakaZimu ongoPhezulu. Nguye owahlangabeza u-Abrahamu lokha nakabuya ukuyokubulala amakhosi, bewambusisa;

² nje-ke u-Abrahamu wamabela kwetjhumi kwakho koke. Kokuthoma, ibizo lakhe litjho, “ikosi yokulunga”; nokuthi ikosi yeSalema okutjho, “ikosi yokuthula”.

³ Ubenganayise, angananina, anganamndeni, ngitjho namalanga wokuthoma namkha wokuphela kwepilo. UnjengeNdodana kaZimu, uhlala amphristi ngokungapheliko.

⁴ Akhese nibone-ke bonyana bekamkhulu kangangani: U-Abrahamu ukhokho wethu, wamabela okwetjhumi kwalokho akuthumbe epini.

⁵ Ngitjho nalabo abaziinzukulwana zakaLevi abamukela ubuphristi, banomyalo emthethweni wokuthatha kwetjhumi ebantwini, okutjho ebantwini bekhabo, iye, sengitjho nanyana abantu bekhababo baziinzukulwana zaka-Abrahamu.

⁶ Kodwana lo obengabalwa esizukulwaneni sabo, wathatha kwetjhumi ku-Abrahamu bewambusisa loyo owamukela iinthembiso.

⁷ Angekhe kwaphikwa bona omncani ubusiswa ngomkhulu.

⁸ Lapha-ke abamukela kwetjhumi kubabantu abafako, kodwana lapho wamukelwa ngiloyo ofakazelwa bonyana uyaphila.

⁹ Kuhlekuhle kungathiwa noLevi owamukela kwetjhumi, wakhokha kwetjhumi ngenca ka-Abrahamu

¹⁰ ngombana gade asese sedinini lakakhokho wakhe lokha nakahlangatjezwa nguMalkitsedekhi.

¹¹ Nangabe ukupheleliswa kwafunyaneka ngobuphristi bakaLevi njengombana isizwe samukela umthetho ngaphasi kobuphristobu; bekusadingeke ngani-ke ukukhuluma ngobuphristi obunye obuvuka ngokwendlela kaMalkitsedekhi, kunalobo bendlela ka-Aroni na?

¹² Ngombana nangabe kukhona ukuphendulwa kobuphristi, khona-ke kuyafuneka bona kuphendulwe nomthetho.

¹³ Kodwana loyo okukhulunywa izintwezi ngaye, ungowesinye isizwe ekungazange khekube khona noyedwa kiso owakhe walotjha e-aldarini

¹⁴ ngombana kuyaziwa bona iKosethu isizukulwana sakaJuda, begodu mayelana nesizweso uMosi akazange atjho ilitho ngobuphristi.

¹⁵ Nje-ke kusemtarini lokha nakuvuka omunye umphristi onjengoMalkitsedekhi,

¹⁶ iye, loyo obe mphristi ingasi ngokomyalo weenzukulwana zenyama kodwana ngamandla wepilo engabhubhiko.

¹⁷ Ngombana kufakazwa ngaye kuthiwa: “Wena umphristi ngokungapheliko ngokwendlela kaMalkitsedekhi.”

¹⁸ Umthetho omdala wenziwa ilize ngombana gade ubuthakathaka begodu ungasizi.

¹⁹ Njengombana umthetho ungazange uphelelise ilitho, ngakwelinye ihlangothi kunesingeniso sethemba elingcono ekungalo singatjhidela kuZimu.

²⁰ Nokho ithembelo azange libe ngaphandle kwesifungo ngombana abanye ababekwa emsebenzini wobuphristi bangena kiwo ngaphandle kwesifungo,

²¹ kodwana lo waba mphristi ngaphandle kwesifungo ngebanga laloyo owathi kuye: “USomnini ufungile begodu angeze azisole, wathi, ‘Wena umphristi ngokungapheliko.’ ”

²² Ngebanga lalokho uJesu waba siqiniseko sesivumelwano esingcono.

²³ Nje-ke abaphristabo baba banengi ngesibalo ngebanga lokobana bebaliywa kukufa bona baragele phambili ngomsebenzabo;

²⁴ kodwana uJesu unobuphristi obungapheliko ngombana uphila isiphelani.

²⁵ Ngalokho unamandla wokusindisa ngesikhathi soke labo abeza kuZimu ngaye ngombana uhlala njalo abancengela.

²⁶ Nje-ke mbala kwasifanela thina bona sibe nomphristi omkhulu onje, ocwengileko, ongasolekiko, onganamphambo, owahlukaniswe kwabazizoni bewaphakanyiswa ngaphezu kwamazulu.

²⁷ Ngokuhlukileko kunabanye abaphristi abakhulu, akadingi ukwenza imihlabelo ilanga nelanga, kokuthoma ngebanga lezono zakhe bese kube ngezono zabantu; yena wakwenza lokho kwaba kanye kibo boke mhlana anikela ukuphila kwakhe.

²⁸ Umthetho ubeka abantu ababuthakathaka bona ibe baphristi abakhulu, kodwana ilizwi lesifungo eleza ngemva komthetho, lijamisa iNdodana eyenziwa opheleleko ngokungapheliko.