AMAHEBHERU 5 - IsiNdebele 2012 Translation

¹ Ngiloyo naloyo umphristi omkhulu okhethwe hlangana nabantu ubekelwe bona abajamele kuZimu, ukunikela iminikelo nemihlabelo yezono.

² Uyakwazi ukunyamezelela ngesisa labo abanganalwazi nabaphambukako njengombana naye ngokwakhe uyabazi ubuthakathaka;

³ kungalokho kufanele bona anikele umhlabelo ngenca yezono zakhe nangenca yezono zabantu.

⁴ Akakho ozikhethela ukuba sesikhundlenesi, kodwana uba kiso ngokubizwa nguZimu njengo-Aroni.

⁵ Ngokunjalo noKrestu azange azinikele idumo ngokuba muphristi omkhulu kodwana waphakanyiswa ngiloyo owathi kuye: “Wena uyiNdodanami, namhlanje ngikubelethile,”

⁶ njengombana atjho kwenye indawo wathi: “Wena umphristi ngokungapheliko ngokwendlela yakaMalkitsedekhi.”

⁷ Ngesikhathi uJesu asesephasinapha bephele enze imithandazo nokubawela abanye ngesililo esikhulu nangeenyembezi kiloyo ogade anamandla wokumsindisa ekufeni. Begodu bekalalelwa ngombana bekazinikela ngokuzithoba.

⁸ Sengitjho nanyana bekayiNdodana, wafunda ukulalela ngalokho ahlupheka ngakho

⁹ begodu nalapho sele aphelelisiwe, waba mthombo wesindiso wabo boke abamlalelako,

¹⁰ bewabekwa nguZimu bona abe mphristi omkhulu ngokwendlela yakaMalkitsedekhi.

Ukuyelelisa ngokuhlubuka ekukholweni

¹¹ Kusesenokunengi esingakutjho mayelana nalokhu, kodwana kulikhuni ukunihlathululela ngombana nithathela kude ukuzwa.

¹² Nanyana ngesikhathesi bekufanele ngathana senibafundisi, kodwana nisadinga omunye ozokubuya anifundise godu, anitatayise anithomise phasi kancani eemfundisweni zelizwi lakaZimu. Nisadinga ibisi kunokudla okuqinileko.

¹³ Loyo omunyako usuka asesemntwana, nje-ke akakalemuki ilizwi lokulunga.

¹⁴ Kodwana ukudla okuqinileko kungokwabakhulileko, asebajayele ukusebenzisa umkhumbulwabo, iye, labo asebanakho ukuhlukanisa okuhle nokumbi.