AMAHEBHERU 4 - IsiNdebele 2012 Translation

Ukuphumula kwabantu bakaZimu

¹ Yeke, njengombana isithembiso sokungena ekuphumuleni kwakhe sisesenjalo, asiyeleleni bonyana kungabikhona noyedwa wenu ozakufunyanwa abhalelwa kufikelela ekuphumuleni

² ngombana nathi satjhunyayezwa ivangeli njengabo. Kodwana ilizwi abalizwako akhange libasize ngombana akhange bakholwe labo ebegade balitjhumayela.

³ Nje-ke thina esikholwako siyangena ekuphumuleni njengombana yena uthe: “Ngafunga elakeni lami ngathi, ‘Angekhe bangena ekuphumuleni kwami.’ ” Wakutjho lokhu nanyana umsebenzakhe besele uphelelisiwe kwasekusekelweni kwephasi.

⁴ Kwenye indawo emitlolweni mayelana nelanga lekhomba kwathiwa: “Ngelanga lekhomba, waphumula kiwo woke umsebenzakhe.”

⁵ Kubuye kuthiwe: “Angekhe bangena enarheni leyo, inarha ebebayophumula kiyo.”

⁶ Kusabasalele abanye kobana bangene ekuphumuleni nalabo abatjhunyayelwa qangi ivangeli abangazange bangene ngebanga lokungalaleli.

⁷ Yeke usabeke elinye ilanga, ekuthiwa ngalo “namhlanje” okwathi ngemva kwesikhathi eside wakhuluma ngoDavida, njengombana besele kukhulunyiwe kwathiwa: “Namhlanje, nanizwa ilizwi lakhe, ningazenzi zibe likhuni iinhliziyo zenu.”

⁸ Iye, ngathana uJotjhuwa wabanikela ukuphumula, uZimu ubengekhe akhuluma muva ngelinye ilanga.

⁹ Nje-ke kusabasalele abantu bakaZimu ukuphumula kweSabatha

¹⁰ ngombana loyo osuke angene ekuphumuleni kwakaZimu, uyaphumula godu nemisebenzinakhe njengoZimu aphumula kweyakhe.

¹¹ Nje-ke asikhuthaleleni ukungena ekuphumulenokho ukuze kungabikhona namunye kithi owako ngokulandela isibonelo sokungalaleli kwabo.

¹² Mbala ilizwi lakaZimu liphilile, linamandla, libukhali kunesabula esika mahlangothi womabili. Lihlaba lingene beliyofika ehlanganweni yomphefumulo nommoya, amalungu nommongo; likwazi ukuhlukanisa imicabango nemizindlo yehliziyo.

¹³ Akukho nokukodwa okubunjiweko okusithekileko phambi kwakaZimu. Koke kwambuliwe phambi kobuso bakhe, kusemtarini emehlweni waloyo esizaziphendulela kuye.

UJesu umphristi omkhulu

¹⁴ Njengombana sinomphristi omkhulu owadabula amazulu, uJesu iNdodana kaZimu, asibambeleleni siqine ekukholweni kwethu esikuvumako

¹⁵ ngombana asinaye umphristi omkhulu ongakwazi ukuzwelana nobuthakathaka bethu, kodwana ozizinywe ngeendlela zoke njengathi.

¹⁶ Ngalokho-ke asitjhidele ngesibindi esihlalweni somusa, khona sizakwamukeliswa isirhawu, sizuze umusa, sisizeke ngesikhathi esifaneleko.