AMAHEBHERU 3 - IsiNdebele 2012 Translation

UJesu mkhulu kunoMosi

¹ Ngalokho-ke bazalwana abacwengileko, enibahlanganyeli ekubizweni kwezulwini, bekani umkhumbulwenu kuJesu ongumPostoli nomPhristi omkhulu wesivumo sethu.

² Wathembeka kiloyo owamkhethako wambeka njengoMosi owabegade anjalo kiyo yoke indlu kaZimu.

³ Nje-ke uJesu kufunyaneke bona ufanele idumo elikhulu kunoMosi; lokho kunjengombana umakhi wendlu anedumo elikhulu kunendlu ngokwayo.

⁴ Ngileyo naleyo indlu yakhiwe mumakhi wayo, kodwana uZimu umumakhi wakho koke okukhona.

⁵ UMosi bekathembeke njengenceku kiyo yoke indlu yakaZimu bekube bufakazi balokho ebekuzakukhulunywa ngakho esikhathini esizako.

⁶ UKrestu njengeNdodana bekathembekile endlini kaZimu. Thina-ke siyindlu yakhe nangabe sihlala njalo sibambelele ethembeni esizibuka ngalo.

Ukuphumula kwesizwe sakaZimu

⁷ Yeke, njengombana uMoya oCwengileko uthi: “Namhlanjesi nanizwa ilizwi lakhe,

⁸ ningaqinisi iinhliziyo zenu njengeMeriba nanjengelangeni lelo eMasa, erhalawumbeni,

⁹ lapha aboyihlomkhulu bangizizinya khona nanyana besele babone imisebenzami.

¹⁰ Iminyaka ematjhumi amane, isizukulwaneso sangikghabhudlha. Nje-ke ngathi, ‘Sibabantu abaphambene ngehliziyo neendlela zami asiziyeleli.’

¹¹ Ngalokho ngafunga elakeni lami ngathi, ‘Angeze bangene ekuphumuleni kwami.’ ”

¹² Nje-ke bazalwana, tjhejani bona kungabikhona noyedwa wenu onehliziyo embi engakholwako ebangela bonyana ahlubuke kuZimu ophilako.

¹³ Kodwana khuthazanani imihla ngemihla, ije kusathiwa “namhlanje” ukuze kungabikhona namunye wenu oqinileko ngebanga lesono esikhohlisako

¹⁴ ngombana sesibahlanganyeli noKrestu, nangabe kwaphela sibambelela ethembeni lethu bekube sekupheleni.

¹⁵ Njengombana kuthiwa: “Namhlanjesi nanizwa ilizwi lakhe, ningaqinisi iinhliziyo zenu njengeMeriba nanjengelangeni lelo eMasa.”

¹⁶ Bobani labo abezwa bebamhlubuka na? Angithi ngilabo boke abakhutjhwa nguMosi eGibhide na?

¹⁷ Bobani labo abathukuthelela iminyaka ematjhumi amane na? Angithi ngilabo abonako, iindumbu zabo zaradlhwa erhalawumbeni?

¹⁸ Wafunga kibobani bona angeze bangena ekuphumuleni kwakhe, nakungasi ngilabo ebebanganandlebe na?

¹⁹ Nje-ke sesiyabona bonyana bahluleka ukungena ngebanga lokungakholwa kwabo.