AMAHEBHERU 2 - IsiNdebele 2012 Translation

Isiyeleliso

¹ Nje-ke kufuze siyelele khulu ngalokho esikuzwileko ukuze singatjhidi kikho.

² Nakube ilizwi elakhulunywa ngeengilozi laqiniseka nokobana esinye nesinye isiphambeko nokungalaleli kwamukela isibetho esifaneleko,

³ alo, thina sizakuphunyurha njani nasithembela isindiso ekulu kangaka na? Iye, isindiso eyathoma yamenyezelwa yiKosi, yaqiniswa kithi ngilabo abayizwako.

⁴ NoSomnini wafakazela isindiso leyo ngamatshwayo, ngeemangaliso nangemikarisomraro ehlukahlukeneko kanye nangezipho zakaMoya oCwengileko ezabiwe ngokwentando yakhe.

Loyo okwavela ngaye isindiso

⁵ UZimu azange abeke iphasi elizako nesikhuluma ngalo leli eengilozini.

⁶ Kodwana omunye ufakazile endaweni ethileko wathi: “Uyini-ke obhubhako bona ungabe umkhumbule, bekayini wephasi bona ungabe umbeke abe mphathi na?

⁷ Mbala umenze waba ngaphasana kweendalwa zezulu, wamthwesa ukuhlonitjhwa nobukhosi!

⁸ Wamenza waba mphathi womsebenzi wezandla zakho; wabeka koke ngaphasi kweenyawo zakhe.” Nje-ke ngokubeka koke ngaphasi komuntu, kutjho bona uZimu wanikela koke ngaphasi kwelawulo lomuntu. Nokho okwanje, asikaboni koke kungaphasi kwelawulo lomuntu.

⁹ Kodwana siyambona uJesu owenziwa waba mncani kuneengilozi kwesikhatjhana; njenganje sele athweswe isihlohlo esinephazimulo nedumo ngebanga lokubandezeleka kwakhe ngokufa.

¹⁰ Koke kukhona ngoZimu begodu kungokwakhe. Nje-ke lokha nakaqunta ukurholela inengi labantwana bakhe ephazimulwenakhe kwafaneleka bona enze umsindisi wabo abe ngopheleleko ngokuhlupheka.

¹¹ Iye, ngombana loyo ocwengisako nalabo abacwengiswako bamndeni munye. Kungesizathweso uJesu angananhloni zokubabiza bonyana bafowabo,

¹² asithi: “Nje-ke ngizakumemezela ibizo lakho kubafowethu, ngikudumise phakathi kwebandla lamakholwa.”

¹³ Godu uthi: “Ngizokuthembela njalo kuZimu.” Abuye athi: “Nakhu lapha ngikhona nabantwana engabaphiwa nguZimu.”

¹⁴ Njengombana abantwana bahlanganyela inyama neengazi, naye ngokwakhe wahlanganyela khona lokho ukuze kuthi ngokufa kwakhe amchithe loyo ogade anamandla wokufa, okutjho uSathana.

¹⁵ Wenza lokho bona athukulule boke labo abathi ngesikhathi soke sokuphila kwabo babotjhelelwa ebukhobokeni ngebanga lokwesaba ukufa.

¹⁶ Kwamambala kuyakhanya bonyana akakezi ukuzokusiza iingilozi, kodwana iinzukulwana zaka-Abrahamu.

¹⁷ Nje-ke kwamfanela ukuba njengabafowabo kikho koke, khona azakuba mphristi omkhulu onesirhawu nothembekileko emsebenzini kaZimu, abe yihlawulo yokubuyisana kwezono zabantu.

¹⁸ Njengombana naye ngokwakhe wazizinywa ngalokho ahlupheka ngakho, yeke unamandla wokusiza labo abazizinywako.