AMAHEBHERU 13 - IsiNdebele 2012 Translation

Ukulotjha uZimu ngendlela emthokozisako

¹ Aliragele phambili ithando lokuzwana.

² Ningalibali ukwamukela abayeni ngombana ngokwenza njalo abanye bangenisa iingilozi bangalemuki.

³ Khumbulani labo ababotjhiweko, kube sengathi nani nibotjhwe kanye nabo, iye, nalabo abaphethwe kumbi ngombana nani nisesemzimbeni lo.

⁴ Ukuthathana akuhlonitjhwe ngibo boke, umseme ungasilaphazwa ngombana iinhlobongi neengwadla uZimu uzozigweba.

⁵ Zilondeni ningabi marhamaru kodwana yaneliswani ngeninakho ngombana wathi: “Angekhe nganitjhiya namkha nganilahla.”

⁶ Ngalokho singatjho ngesibindi sithi: “USomnini umsizi wami, angeze ngesaba; umuntu angangenzani na?”

⁷ Khumbulani abarholi benu, okutjho labo abakhuluma ilizwi lakaZimu kini; nikhumbule isiphetho sepilo abayiphilileko, nilingise ukukholwa kwabo.

⁸ UJesu Krestu unguye izolo, namhlanje nanini nanini.

⁹ Ningaluthwa ziimfundiso ezingaziwako nezimihlobohlobo ngombana kuhle bona ihliziyo iqiniswe ngomusa ingasi ngokulandela imithetho yokudla, ekuyinto engazange ibasize ngalitho abayilandelako.

¹⁰ Thina sine-aldari, labo abalotjha etendeni lokuhlanganela abanalungelo lokudla kilo

¹¹ ngombana iindumbu zeenlwana lezo iingazi zazo ezingeniswa endaweni ecwengileko mphristi omkhulu njengomhlabelo wesono zitjhiselwa ngaphandle kwekampa.

¹² Ngokunjalo-ke noJesu naye wahlunguphazwa ngaphandle kwesango ukuze acwengise abantu ngeengazi zakhe.

¹³ Ngalokho asiye kuye ngaphandle komuzi, sifese sithwale ihlazo alinyamezelelako!

¹⁴ Lokho kungombana lapha asinawo umuzi ojame ngokungapheliko, kodwana siqale umuzi ozako.

¹⁵ Nje-ke ngaye, asinikeleni umhlabelo wokudumisa kuZimu, okutjho iinthelo zeembhena ezivuma ibizo lakaJesu.

¹⁶ Ningalibali kukwenza okuhle kwabanye nokwabelana ngombana iminikelo enjalo uZimu uyayithabela.

¹⁷ Lalelani abarholi benu nibathobele ngombana bahlala njalo beluse imiphefumulwenu njengabantu abazazilanda ngayo. Nje-ke abenze umsebenzabo ngokuthaba kungabi ngokunyama ngombana lokho angeze kwanisiza ngalitho.

¹⁸ Sithandazelani ngombana siyazi bona sinesazela esimsulwa begodu sithanda bona siphile ipilo ehloniphekileko kikho koke.

¹⁹ Nginibawa khulu bona nikwenze lokhu ukuze ngibuyiselwe kini msinyana.

Umthandazo wokulayelisa

²⁰ UZimu wokuthula, owavusa kwabafileko iKosethu uJesu Krestu, umalusi omkhulu wezimvu ngeengazi zesivumelwano esijame ngokungapheliko,

²¹ sengathi anganiphelelisa ngakho koke okuhle ukuze nenze intando yakhe; begodu kwanga angasebenza phakathi kwenu ngoJesu Krestu okuthandekako kuye. Akube kuye iphazimulo nini nanini. Amen.

Isiphetho

²² Ngiyabawa bazalwana, lamukeleni ngesineke ilizwi lami lokukhuthaza ngombana nginitlolele ngokufitjhani.

²³ Ngithanda nazi bonyana umzalwana wethu uThimothi sele akhutjhiwe ngesikhungweni. Nange angafika msinyana, ngizokuza naye sizonibona.

²⁴ Silotjhiselani kibo boke abaniphetheko nakibo boke abacwengileko. Bayalotjhisa kini abazalwana beTariyana.

²⁵ Sengathi umusa wakaZimu ungaba nani noke! Amen.