AMAHEBHERU 12 - IsiNdebele 2012 Translation

UZimu uBaba wethu

¹ Ngalokho, njengombana sizonjelezwe lilifu elingaka labofakazi, asilahleni koke okudisibezako, ngitjho nesono esisinamathele kangaka, sigijime ibanga esibekelwe lona ngokubekezela;

² siqale kuJesu umthomisi nomphelelisi wokukholwa kwethu, okwathi esikhundleni setokozo ebe ibekwe phambi kwakhe, wanyamezelela isiphambano angakhathaleli ukurhubutjhwa; uhlezi ngesidleni sesihlalo sobukhosi sakaZimu.

³ Myeleleni loyo owanyamezelela ukuphikiswa kangaka zizoni, khona iinhliziyo zenu zingazukudana namkha niphelelwe lithemba.

⁴ Ekujamelaneni kwenu nesono, anikalwi bekube sekuthulukeni kweengazi.

⁵ Kumbe senikhohlwe umyalo onikhuthaza njengabantwana, othi: “Ndodanami, unganyazi ukuyala kwakaSomnini, ungapheli amandla nakukhalimelako

⁶ ngombana uSomnini ubetha loyo amthandako, ahlunguphaze leyo naleyo indodana ayithandako.”

⁷ Nyamezelelani ukukhalinywa; uZimu uniphatha njengabantwana: Konje ukhona umntwana ongakhalinywa nguyise na?

⁸ Nakube anikhalinyelwa njengabo boke abakhalinywako, khona nimavezandlebe, anisibo abantwana bangekhaya.

⁹ Ngaphezu kwalokho, sibe nabobaba bephaseli abasikhalimeleko sabahlonipha; alo, kufuze sizithobe kangangani-ke kuBaba wemiphefumulwethu bona siphile na?

¹⁰ Abobaba bethu basikhalimela kwesikhatjhana njengombana babona kufanele, kodwana uZimu usikhalimela kobana kusizeke thina, iye, sihlanganyele naye ekucwengeni kwakhe.

¹¹ Okwanje ukukhalinywa kubonakala kubuhlungu kunokuthokoza, kodwana emva kwalokho kuhloma iinthelo zokulunga kilabo ababandulwe ngikho.

Imiyalo nokusolwa

¹² Ngalokho qinisani izandla zenu ezibuthakathaka namadolwenu agedlako,

¹³ nenzele iinyawo zenu imizila enqophileko ukuze nosigoga angatshinyeki kodwana aqinelele.

¹⁴ Phikelelani bona nihlalisane ngokuthula nabantu boke kanti godu nibe nokucwengeka ngombana onganakho lokho angeze ambona uSomnini.

¹⁵ Tjhejani bona kungabikhona osalelako ekufunyaneni umusa kaZimu ukuze kungamili umrabhu obabako obanga ukonakala begodu kusilaphale abanengi ngawo.

¹⁶ Godu tjhejani bona kungabikhona oziphatha kumbi namkha onganandaba njengo-Esewu, owathengisa ubuzibulo bakhe ngokudla kwesikhatjhana sinye.

¹⁷ Niyazi bona kwathi muva lokha nakafuna ukuba yindlalifa yokubusiswa, waphayelwa ngeqadi ngombana gade angekhe asaphendula umkhumbulo kayise, sengitjho nanyana gade afisa lokho ngokuchiphiza iinyembezi.

¹⁸ Anikezi kilokho eningakuthinta, okumlilo ovuthako, ubumnyama, isikhwitjhikhwitjhi nesiwuruwuru,

¹⁹ nalapho kulila khona ipalapala nelizwini ekuthi lokha nalikhulumako lenze abalizwako bancenge bona kungasabi nelinye elikhulunywa kibo

²⁰ ngombana gade bangekhe bakujamele ebekutjhiwo ngilo bona: “Ngitjho nanyana kungaba silwana esithinta intaba le, asikhandwe ngamatje sibulawe.”

²¹ Mbala, umbono loyo bewesabeka kangokuthi uMosi wabe wathi: “Ngiyahlengezela ngevalo.”

²² Kodwana nina nize entabeni yeZiyoni nemzini wakaZimu ophilako, iJerusalema lezulwini nemgidini wewoma leengilozi,

²³ iye, nize ebandleni lamazibulo atloliswe ezulwini, kumgwebi onguZimu wabo boke, emiphefumulweni yabantu abalungisisiweko,

²⁴ ngitjho nakuJesu omlamuleli wesivumelwano esitjha nekufafazweni kweengazi ezikhuluma amezwi womusa kunezaka-Abela.

²⁵ Tjhejani-ke bona ningamfulatheli okhulumako ngombana nakube azange baphunyurhe labo abafulathela loyo owabayelelisako asephasinapha, khulu kangangani nakube sidela loyo osiyelelisa asezulwini?

²⁶ Ngesikhatheso ilizwi lakhe lasikinya iphasi, kodwana kwanjesi uthembisile wathi: “Ngizokubuya godu ngisikinye kungabi liphasi nje kwaphela kodwana nezulu imbala.”

²⁷ Lokho kokuthi: “Ngizokubuya godu” kuphawula ukususa lokho okusikinywako, okutjho okudaliweko ukuze kuthi lokho okungekhe kwasikinywa kusale kujame njalo.

²⁸ Yeke asithokozeni ngokwamukeliswa umbuso ongekhe wasikinywa, ngalokho asinikeleni kuZimu ukulotjha okwamukelekako ngehlonipho nangokwesaba

²⁹ ngombana uZimethu umlilo oqothulako.