AMAHEBHERU 11 - IsiNdebele 2012 Translation

Ukukholwa

¹ Nje-ke ukukholwa kukuqiniseka ngezinto esinethemba ngazo, kuliqiniso ngalokho esingakuboniko.

² Ngakho abokhokho bamukela ubufakazi obuhle.

³ Iye, ngokukholwa sizwisisa bona iphasi labunjwa ngelizwi lakaZimu, nokobana lokho okubonwako kwabunjwa ngezinto ezingabonwako.

⁴ Ngokukholwa u-Abela wanikela kuZimu ngomhlabelo owamukelekako ukudlula wakaKayini. Ngalokho wafakazelwa bona ulungile noZimu ngokwakhe wafakaza ngokwamukela iminikelo yakhe; yeke ngokukholwa usakhuluma nanyana aselafa.

⁵ Ngokukholwa u-Inogo wenyuswa ukuze angaboni ukufa. Akazange asabonwa ngombana uZimu gade asele amthethe. Nje-ke ufakazelwa bonyana angakathathwa bekathokozise uZimu.

⁶ Kodwana ngaphandle kokukholwa akwenzeki ukumthokozisa uZimu ngombana loyo otjhidela kuZimu kufanele akholwe bona ukhona nokobanyana uyabavuza labo abamfunako.

⁷ Ngokukholwa uNowa asele ayeleliswe nguZimu mayelana nesehlakalo ebe singakabonakali, wamukela isiyeleliso wakha umkhumbi ukuze asindise indlu yakhe. Ngalokho wenza iphasi libe nomlandu, wabe waba yindlalifa yokulunga ngokukholwa.

⁸ Ngokukholwa u-Abrahamu walalela lokha nakabizwako bona aphume aye endaweni ebe azoyamukeliswa njengelifa; nje-ke waphuma angazi lapha aya khona.

⁹ Ngokukholwa wahlala isikhatjhana enarheni yesithembiso njengomqhamuka: Aphila ematendeni njengombana kwenza u-Isaka noJakopo ebebaziindlalifa zesithembisweso kanye naye

¹⁰ ngombana bekalindele umuzi oneensekelo, umakhi nomenzi wawo kunguZimu.

¹¹ Ngokukholwa u-Abrahamu wafumana amandla wokubeletha selaluphele nanyana uSara umkakhe bekayinyumba ngombana bekasazi bonyana wethembekile othembisako.

¹² Ngalokho, ngomuntu munye nanyana besele kumlunga afile, kwabelethwa iinzukulwana ezinengi njengeenkwekwezi zezulu nanjengetjhwabatjhwaba yelwandle engabalekiko.

¹³ Boke laba bafa basekukholweni bangazange bamukeliswe ebebakuthenjisiweko, kodwana bakubona bathokoza ngakho kusesekude nabo. Iye, bebavumile bona bamiqhamuka neenkhonzi ephasini.

¹⁴ Abantu abakhuluma ngendlela le, bayatjengisa bona bafuna iphasi elingelabo.

¹⁵ Nangathana bebahlala bakhumbula inarha abaphuma kiyo, bebazakuba nethuba lokubuyela emva.

¹⁶ Kunalokho bebakhanukela iphasi elingcono, okutjho lezulwini. Yeke uZimu akananhloni ukubizwa bona unguyisabo ngombana ubalungisele umuzi.

¹⁷ Ngokukholwa u-Abrahamu nakazizinywako, wanikela ngendodanakhe u-Isaka. Iye, loyo owamukela isithembiso walungela ukunikela indodanakhe ekukuphela kwayo,

¹⁸ loyo okwathiwa ngaye: “Iinzukulwana zakho zizokuthiyelelwa ngo-Isaka.”

¹⁹ U-Abrahamu bekasazi bona uZimu uyabavusa nabafileko, kungalokho ngokulinganisa ngekulumo, wamukela u-Isaka njengobuya ekufeni.

²⁰ Ngokukholwa u-Isaka wabusisa uJakopo no-Esewu mayelana nelikusasa labo.

²¹ Ngokukholwa uJakopo sele azokufa wabusisa leyo naleyo yamadodana kaJosefa; wakhothama ngokulotjha adzimelele ngedondolo lakhe ebekaliphethe.

²² Ngokukholwa uJosefa asele azakwenyuka, wakhuluma ngokufuduka kwaka-Israyeli eGibhide bewalayeza ngokungcwatjwa kwakhe.

²³ Ngokukholwa uMosi asele abelethiwe, wafihlwa babelethi bakhe iinyanga ezintathu ngombana babona bonyana umntwana obekamuhle; begodu azange bawesabe umyalo obekwe yikosi.

²⁴ Ngokukholwa uMosi aselakhulile wala bona kuthiwe uyindodana yendodakazi kaFaro,

²⁵ kunalokho wenyula ukuphathwa makghwakghwa nabantu bakaZimu kunobanyana athabe isikhatjhana esonweni.

²⁶ Bekasithi ukuthukwa ngebanga lakaKrestu kumnono omkhulu kunamafa weGibhide ngombana gade aqale umvuzo ozako ngaphambili.

²⁷ Ngokukholwa wayitjhiya iGibhide angesabi ilaka lekosi ngombana waphikelela sengathi uyambona ongabonwako.

²⁸ Ngokukholwa wajamisa iPhasika nokufafaza ngeengazi ukuze umbhubhisi angathinti amazibulo.

²⁹ Ngokukholwa bakwa-Israyeli beyama ilwandle loMgaba sengathi bakhamba ehlabathini eyomileko, okwathi lokha amaGibhide athi alinga ukweyama, atjhingela.

³⁰ Ngokukholwa imithangala yeJerikho yawa ngemva kobana isele izonjelezwe amalanga alikhomba.

³¹ Ngokukholwa ingwadla enguRarhabi ayizange ibhubhe nalabo abangakhange bakholwa ngombana yamukela kuhle iinhloli.

³² Ngingaraga ngithini? Asisekho isikhathi sokukhuluma ngoGidiyoni, uBharaki, uSamsoni, uJafta, uDavida, uSamyela nabaphorofidi,

³³ okwathi ngokukholwa bahlula imibuso, benza ukulunga, bamukela iinthembiso bavala imilomo yamabhubezi,

³⁴ bacima imililo evutha ngamandla, baphunyurha etlobeni yesabula, bazuza amandla ebuthakathakeni, baba ziingorho epini namabutho wabarhali abhebhula iinthende.

³⁵ Ngokukholwa besifazana babuye babuyiselwa iinhlobo ngokuvuswa ekufeni. Abanye bahlunguphazwa, akhange bavume ukuthukululwa ukuze bazuze ukuvuka okuhle.

³⁶ Abanye bahlunguphazwa ngokuphoqwa nokurithwa, iye, ngitjho nangokubotjhwa nokudlhunywa ngeenkhungweni.

³⁷ Bakghadlhwa ngamatje, baphadlhulwa kabili, babulawa ngesabula. Bazulazula bembethe iinkhumba zezimvu nezeembuzi. Bebahlubule, bazwiswa ubuhlungu, bahlukunyezwa.

³⁸ Iphasi belingakabafaneli; bandinda emarhalawumbeni neentabeni, emikghotheni nemadongeni wephasi.

³⁹ Boke labo nanyana kufakazwa kuhle ngabo ngokukholwa, azange bamukele ngesikhatheso lokho ebebathenjiswe khona

⁴⁰ ngombana uZimu gade sele asibonelele ngokuhle ukuze ngaphandle kwethu bangapheleliswa.