AMAHEBHERU 10 - IsiNdebele 2012 Translation

UKrestu waba yihlawulo kwaba kanye

¹ Njengombana umthetho unesithunzi sezinto ezihle ezizako, ungasibo ubujamo bamambala bazo izintwezo, angeze ngayo leyo mihlabelo enikelwa mlibe qobe mnyaka ilungisise labo abatjhidelako.

² Nangathana bekungasinjalo, beyingeze yaliswa bona ingasanikelwa na? Lokho kutjho bona abalotjhi bebazobe bahlanjululwe kwaba kanye bangasenaso isazelo sesono.

³ Kodwana kunalokho imihlabelo leyo isikhumbuzo sesono umnyaka nomnyaka

⁴ ngombana akwenzeki bona iingazi zeenkunzi nezeembuzi zisuse izono.

⁵ Ngesizathweso uKrestu nakafika ephasinapha wathi: “Imihlabelo neminikelo yeenthoro awuyithokozeli; kodwana ungilungisele umzimba;

⁶ iye, imihlabelo yokutjhiswa neyehlambululo awuyibizi.

⁷ Nje-ke ngithe, ‘Qala, ngizile njengombana ngitlolelwe njalo emsongweni. Ngiyathanda ukwenza intandwakho Zimami.’ ”

⁸ Kokuthoma uthe: “Imihlabelo neminikelo, iye, iminikelo yokutjhiswa neyesono azange uyibize namkha uthokoze ngayo.” Yona inikelwa ngokuya ngokomthetho.

⁹ Godu uthe: “Qala ngize bona ngizokwenza intando yakho.” Ususe kokuthoma kobana ajamise kwesibili.

¹⁰ Kungentando yakhe leyo sicwengisiwe kwaba kanye ngomnikelo womzimba kaJesu Krestu.

¹¹ Ngiloyo naloyo umphristi ujama emsebenzinakhe ilanga nelanga, anikela kanenginengi yona iminikelo leyo engasoze yasusa izono.

¹² Kodwana uKrestu sele anikele kwaba kanye ngomhlabelo owodwa ngebanga lezono, wahlala ngesidleni sakaZimu.

¹³ Kusukela kwangesikhatheso ulindele izitha zakhe bonyana zenziwe sinabelo seenyawo zakhe

¹⁴ ngombana ngomhlabelo owodwa uphelelise boke abahlanjululweko.

¹⁵ Godu uMoya oCwengileko ufakaza kithi ngalokho; kokuthoma uthi:

¹⁶ “Nasi isivumelwano engizasenza nabo ngemva kwesikhatheso; ngizakubeka umthethwami emikhumbulwenabo, ngiwutlole eenhliziyweni zabo. Kutjho uSomnini.”

¹⁷ Godu ungezelela ngokuthi: “Mbala ngizakucolela ubukhohlakali babo, ngingasakhumbula icala labo.”

¹⁸ Lapha kunokulitjalelwa kwalokho, akusekho umhlabelo wesono.

Asibandameleni kuZimu

¹⁹ Ngalokho bazalwana, njengombana sinesiqiniseko sokungangena endaweni ecwengileko ngeengazi zakaJesu,

²⁰ ngendlela etja nephilako asivulela yona ngetjhila elisithileko okutjho ngenyama yakhe,

²¹ begodu njengombana sinomphristi omkhulu wendlu kaZimu,

²² asibandameleni ngehliziyo eqinisileko, ngethemba elipheleleko lokukholwa; iinhliziyo zethu zifafaziwe esazelweni esimbi nemizimba yethu ihlanzwe ngamanzi ahlanzekileko.

²³ Nje-ke asibambisiseni ethembeni lokukholwa kwethu esikuvumako ngaphandle kokuzaza ngombana uthembekile loyo othembisileko.

²⁴ Asitjhejeni bona singakhuthazana njani ethandweni nemisebenzini emihle;

²⁵ singakudeli ukuhlangana njengombana kunjalo kwabanye; kodwana asikhuthazaneni omunye nomunye, khulukhulu njengombana nibona bonyana ilanga selitjhidele.

²⁶ Nakube siyakhunyalala siraga ngokona emva kokobana sesamukele ukwazi kweqiniso, awusekho umhlabelo wokuhlawulela izono,

²⁷ kwaphela ukulindela ukugwetjwa okusabekako nobukhali bomlilo obuzakuqothula amaphikakani.

²⁸ Odelela umthetho kaMosi uzakufa ngaphandle kokurhawukelwa ngabofakazi ababili namkha abathathu.

²⁹ Alo, ucabanga bona uzakuhlunguphazwa kangangani loyo oqalela phasi iNdodana kaZimu, athi iingazi zesivumelwano ezimcwengisako zisilaphele abuye ahlambalaze noMoya womusa na?

³⁰ Ngombana siyamazi loyo owathi: “Ukubuyiselela kungokwami; ngimi ozakubuyisela.” Wabuye wathi: “USomnini uzakugweba isizwe sakhe.”

³¹ Kuyinto esabekako ukuwela esandleni sakaZimu ophilako.

³² Khumbulani amalanga waphambilini, ekwathi senikhanyiselwe, naqinisela ebunzimeni obukhulu beenhlupheko.

³³ Ngesinye isikhathi vane phele kubukiswe ngani emtarini nibandezelekile; kesinye isikhathi nibahlanganyeli nalabo abaphathwa njalo.

³⁴ Nazwelana nalabo ababotjhiweko; nakhonapho navuma ukumukwa ipahla yenu ngokwazi bona nina ninepahla engcono ehlala unomphelo.

³⁵ Nje-ke ningaphelelwa lithemba lenu, linomvuzo omkhulu.

³⁶ Nidinga ukunyamezela khona kuzakuthi senenze intando kaZimu, namukele isithembiso:

³⁷ Ngombana sekusikhatjhana esifitjhani, “ozako uyeza, angekhe ariyade.

³⁸ Olungileko wami uzakuphila ngokukholwa; kodwana nangabe uhlehlela emuva; umphefumulwami awuzukuthokoza ngaye.”

³⁹ Kodwana thina asisibo abahlehlela emuva babhujiswe, kodwana sihlangana nalabo abakholwako basindiswe.