AMAHEBHERU 1 - IsiNdebele 2012 Translation

Ubukhulu beNdodana kaZimu

¹ UZimu wakhuluma ekadeni kibokhokho bethu ngabaphorofidi ngeenkhathi ezinengi nangeendlela ezahlukahlukeneko,

² kodwana ngemihla yokuphela le ukhulume nathi ngeNdodana ayibeke bona ibe yindlalifa yezinto zoke, yona abumba ngayo izulu nephasi.

³ Yona isibonakaliso sephazimulo kaZimu nomfuziselo wamambala wobuyena bakhe; iphethe izinto zoke ngelizwi layo elinamandla. Lapho sele ikwenzile ukuhlanjululwa kwezono, yahlala ngesigomeni sakaSomandla ezulwini.

⁴ Nje-ke yaba yikulu khulu kuneengilozi njengombana nebizo elizuzileko lilikhulu kunelazo

⁵ ngombana ngiyiphi yeengilozi uZimu akhe atjho kiyo athi: “Wena uyiNdodanami, namhlanje ngikubelethile,” namkha athi: “Ngizakuba nguYise yona izakuba yiNdodanami.”

⁶ Godu kwathi lokha uZimu nakaletha izibulo lakhe ephasinapha, wathi: “Zoke iingilozi zakaZimu azililotjhe.”

⁷ Nakakhuluma ngeengilozi, uthi: “Wenza iingilozi zakhe imimoya, iinsebenzi zakhe zibe malangabi womlilo.”

⁸ Kodwana ngeNdodana uthi: “Isihlalo sakho, Zimu, ngesanini nanini nokulunga kuzakuba yintonga yobukhosi bakho.

⁹ Uthande ukulunga, wazonda ikohlakalo. Ngalokho-ke Zimu, uZimakho ukuzese ngamafutha wethabo ngaphezu kwabalingani bakho.”

¹⁰ Godu uthi: “Somnini, ekuthomeni wabeka iinsekelo zephasi namazulu amsebenzi wezandla zakho.

¹¹ Zona izintwezo zizakubhubha, kodwana wena ujamile. Iye, zoke zizakuphela njengengubo;

¹² uzazibhinca njengesambatho, zitjhuguluke njengengubo. Kodwana wena uzakuhlala unjalo neminyakakho angeze yaphela.”

¹³ Kodwana ngiyiphi yeengilozi akhe atjho kiyo athi: “Hlala ngesigomeni sami, kufikela lapha ngenza khona amanabakho abe sinabelo seenyawo zakho” na?

¹⁴ “Kanti iingilozi azisiyo yoke imimoya elotjhako nethunyelwe bona isize labo abazokuzuza isindiso na?”