ABAKHOKHELI 4 - IsiNdebele 2012 Translation

Ukusindiswa kwama-Israyeli esandleni sakaSisera

¹ Ama-Israyeli godu enza ubumbi phambi kwakaSomnini ngemva kokuhlongakala kwaka-Ehudi.

² USomnini wawathengisa esandleni sakaJabhini ikosi yeKanana ebeyibusa eRhatsori. Induna yamabuthwakhe gade kunguSisera obegade ahlala eRharotjhethi-Hagoyimu.

³ Abantu bakwa-Israyeli balilela uSomnini bona abasize ngombana uJabhini gade aneenkarana zepi zesimbi ezimakhulu alithoba begodu gade agandelele abantu bakwa-Israyeli ngesihluku iminyaka ematjhumi amabili.

⁴ UDibhora umphorofidikazi oyikosikazi kaLapidothi gade amkhokheli kwa-Israyeli ngesikhatheso.

⁵ Gade avame ukuhlala ngaphasi komuthi wamasundu okuthiwa ngewakaDibhora ogade uhlangana neRama neBhethe-Eli ngeentatjaneni zakwa-Efrayimu. Ama-Israyeli begade eza kuye kobana awahlahle.

⁶ Wathumela igama bona kubizwe uBharakhi umsa ka-Abinowamu weKhedetjhi eNafitali wathi kuye: “USomnini uZimu wakwa-Israyeli uyakuyala bonyana ukhambe namadoda aziinkulungwana ezilitjhumi ekorweni yakwaNafitali neyakwaZebuloni, nizihlele entabeni iTabori.

⁷ Ngizakwenza uSisera induna yebutho lakaJabhini kobana aphume anihlangabeze ngemlanjaneni iKhitjhoni ngeenkarana zakhe kanye nejima lakhe, ngimnikele esandleni sakho.”

⁸ UBharakhi wathi kuye: “Nakube uzakukhamba nami, kulungile ngizakhamba, kodwana nakube awukhambi nami, nami angiyi ndawo.”

⁹ UDibhora wathi: “Ngambala ngizakukhamba nawe, nokho indlela oyikhambako angeze yakulethela idumo ngombana uSomnini uzokunikela uSisera esandleni somfazi.” Yeke wasikima wakhamba noBharakhi eKhedetjhi.

¹⁰ UBharakhi wabizela uZebuloni noNafitali eKhedetjhi. Kwenyuka iinkulungwana ezilitjhumi zamadoda zamlandela noDibhora wakhamba naye.

¹¹ ETsananimu eseduze neKhedetjhi bekunomKheni okuthiwa nguRhebheri ogade ahlome itende lakhe emithini ye-owuku. Yena gade azihlukanisile namaKheni, okuziinzukulwana zakaRhobabi umkhwe kaMosi.

¹² Lokha uSisera natjelwa bonyana uBharakhi umsa ka-Abinowamu wenyukele entabeni iTabori,

¹³ wabutha zoke iinkarana zakhe zepi zesimbi, ezazimakhulu alithoba, nawo woke amadoda agade anaye ukusuka eRharotjhethi-Hagoyimu ukuya emlanjaneni iKhitjhoni.

¹⁴ UDibhora wathi kuBharakhi: “Ayiye! Leli lilanga uSomnini anikele ngalo uSisera esandleni sakho. Angithi uyazi bonyana uSomnini ukhamba phambi kwakho!” Yeke uBharakhi wehla ukusuka entabeni iTabori alandelwa madoda aziinkulungwana ezilitjhumi.

¹⁵ USomnini wahlangahlanganisa uSisera nazo zoke iinkarana zakhe zepi nebutho lakhe loke phambi kwakaBharakhi. USisera wehla ekaranenakhe wabhebhula iinthende.

¹⁶ UBharakhi wagijimisa iinkarana kanye nebutho lakaSisera ukuya eRhoretjhethi-Hagoyimu. Loke ibutho lakaSisera lafa ngesabula, azange kusinde namunye.

¹⁷ Kodwana uSisera wabaleka ngeenyawo waya etendeni lakaJayeli, ikosikazi kaRhebheri umKheni ngombana gade kunokuthula phakathi kwakaJabhini ikosi yeRhatsori kanye nekumba kaRhebheri umKheni.

¹⁸ UJayeli waphuma bona ahlangabeze uSisera, wathi kuye: “Ikosami ayiphambukele, iye, iphambukele kwamapha, ingesabi.” Yeke waphambukela kuye ngetendeni, wamembesa ngomkghadi.

¹⁹ USisera wathi kuJayeli: “Uthi ngomile na, akhese ungiphe amanzi wokusela.” Yeke wavula ikwana yesikhumba yebisi wamnikela bona asele, wamembesa.

²⁰ Godu uSisera wathi kuJayeli: “Yewujame emnyango wetende. Nakufika umuntu akubuze bona kunomuntu ngapha na, uthi, awa.”

²¹ Kodwana uJayeli ikosikazi kaRhebheri wathi angabona bonyana uSisera uyile ngobuthongo ngebanga lokudinwa, wathatha isikhonkhwani setende nenondo, wananabela kuye wabethelela isikhonkhwaneso ehlafunyweni samhlanganisa nehlabathi. Wafela khonapho.

²² Khonokho kwavela uBharakhi ogade agijimisana noSisera, uJayeli wamhlangabeza wathi kuye: “Yiza ngizokukhombisa umuntu omfunako loyo.” UBharakhi wangena ngetendeni lakaJayeli, wabona uSisera adindilizile. Isikhonkhwani setende sisehlafunywenakhe.

²³ Yeke mhlokho uZimu waguqisa uJabhini ikosi yeKanana phambi kwama-Israyeli.

²⁴ Isandla sama-Israyeli saya ngokuqina phezu kwakaJabhini ikosi yeKanana kufikela lapha ambhubhisa khona nya!