ABAKHOKHELI 3 - IsiNdebele 2012 Translation

¹ Izizwe uSomnini azilisa kobana azizinye ngazo ama-Israyeli, okutjho lawo ebegade anganalwazi lepi eKanana

² nokuwafundisa ukwazi ipi njengombana bekangazange akhe ayibone ngaphambilini, ngilezi:

³ ababusi abahlanu beemfunda zamaFilista, woke amaKanana, amaTsidoni namaRhivi ebekahlala entabeni iLibhanoni, ukusuka entabeni eBhali-Rherimoni ukuyokufika eLebo-Rhamathi.

⁴ Izizwezo uSomnini bekazizinya ngazo ama-Israyeli ukubona bonyana azakulalela imiyalwakhe ayala ngayo aboyise ngoMosi na.

⁵ Yeke ama-Israyeli ahlala phakathi kwamaKanana, amaRhithi, ama-Amori, amaPerizi, amaRhivi namaJebusi.

⁶ Kodwana athatha amadodakazi wezizwezo njengabafazi bawo begodu anikela amadodana wezizwezo amadodakazawo bona abe bafazi bawo. Alotjha abosingazimu bezizwezo.

U-Otiniyeli, u-Ehudi noTjhamgari

⁷ Ama-Israyeli enza ubumbi phambi kwakaSomnini, akhohlwa uSomnini uZimawo, alotjha aboBhali nabo-Atjhera.

⁸ Ngalokho itukuthelo kaSomnini yavutha phezu kwama-Israyeli, wawathengisa ezandleni zakaKutjhana-Ritjhatayimu ikosi ye-Aramu-Naharayimu, asebenzela uKutjhana-Ritjhatayimu iminyaka ebunane.

⁹ Kodwana kwathi lokha ama-Israyeli nalilela uSomnini, uSomnini wawavusela umsindisi owawasindisako, ongu-Otiniyeli umsa kaKhenazi, umfowabo omncani kaKalebi.

¹⁰ UMoya kaSomnini wehlela phezu kwakhe, wakhokhela u-Israyeli. Waphuma ipi, uSomnini wanikela uKutjhana-Ritjhatayimu ikosi ye-Aramu esandleni sakhe. Wahlula uKutjhana-Ritjhatayimu ngokumeyisa.

¹¹ Inarha yaba nokuthula iminyaka ematjhumi amane. U-Otiniyeli umsa kaKhenazi wahlongakala.

¹² Godu ama-Israyeli enza ubumbi phambi kwakaSomnini. USomnini waqinisa u-Egiloni ikosi yakwaMowabi bona alwe nama-Israyeli ngombana enza ubumbi phambi kwakhe.

¹³ U-Egiloni wabuthelela kuye ama-Amoni nama-Amalekhi, waphuma wayokulwa nama-Israyeli, wawahlula. Bathumba idorobho lamasundu.

¹⁴ Ama-Israyeli asebenzela u-Egiloni ikosi yakwaMowabi iminyaka elitjhumi nabunane.

¹⁵ Kodwana kwathi lokha ama-Israyeli nalilela uSomnini, uSomnini wawavusela umsindisi, u-Ehudi umsa kaGera wakwaBhenjamini. U-Ehudi loyo gade asincele. Ama-Israyeli athumela isibiko ku-Egiloni ikosi yakwaMowabi ngo-Ehudi.

¹⁶ U-Ehudi wazenzela isabulana ebukhali mahlangothi woke nengaba masentimitha amatjhumi amathathu ubude, wayibophelela enyongenakhe yangesigomeni ngaphakathi kwezambatho zakhe.

¹⁷ Waletha isibiko ku-Egiloni ikosi yakwaMowabi. U-Egiloni lo kwakuyindoda ezimuke khulu.

¹⁸ Kwathi bona u-Ehudi aqede ukwethula isibiko, wajika nabantu ebebathwele isibikweso.

¹⁹ Kodwana yena wathi nafika ematjeni aseGiligali wabuyela emuva wafese wathi ku-Egiloni: “Nginomlayezwakho oyifihlo, kosi.” U-Egiloni wathi ku-Ehudi: “Akhe uyibambe kancani!” Nje-ke wayala iinsebenzi zakhe bona zimrhaduke.

²⁰ Njengombana u-Egiloni gade azipholele ngelawini lakhe elipholileko elingaphezulu, u-Ehudi watjhidela kuye wathi: “Nginomlayezwakho obuya kuZimu.” Wasikima lapha gade ahlezi khona.

²¹ U-Ehudi welula isandla sakhe sesincele wakhupha isabulana enyongakhe yangesigomeni wahlaba ngayo u-Egiloni esiswini.

²² Kwangena ngitjho nesibambo sesabulana esiswini, yacwila emafutheni. U-Ehudi azange akhuphe isabulana esiswini saka-Egiloni kodwana waphuma ngentunja,

²³ ngemva kobana avale iminyango yakhona wayilodlhela. Waphuma hlangana neensika zesigodlo.

²⁴ Ngemva kobana akhambe, iinsebenzi zaka-Egiloni zafika. Kuthe nazibona iminyango yelawu elingaphezulu ilodlhelwe zadlumbana zathi: “Awa, usazibangula ngelawini lakhe elipholileko.”

²⁵ Zalinda bezaphela amandla. Kwathi nakubonakala angavuli iminyango yelawu elingaphezulu zathatha isilodlhelo zayivula. Zafumana ikosazo idindilizile.

²⁶ U-Ehudi waphunyurha lokha iinsebenzezo nazisadidizelako, wadlula hlangana namatje aseGiligali wabalekela eSeyira.

²⁷ Kwathi nafikako wavuthela ipalapala ngeentatjaneni zakwa-Efrayimu. Ama-Israyeli asuka ngeentatjanenapho ehla naye, yena wakhamba phambi kwawo.

²⁸ Wathi kiwo: “Ngilandelani ngombana uSomnini unikele izitha zenu, amaMowabi, ezandleni zenu.” Ngambala amlandela, avimbezela amazibuko weJoridani ukuyela ngakwaMowabi. Azange avumela abantu ukudlula lapho.

²⁹ Ngesikhatheso abulala amaMowabi angaba ziinkulungwana ezilitjhumi. Woke njalo bekumadoda wepi ondlekileko kodwana azange kusinde nayinye.

³⁰ Yeke mhlokho amaMowabi eyiswa ma-Israyeli. Inarha yaba nokuthula iminyaka ematjhumi abunane.

³¹ U-Ehudi welanywa nguTjhamgari umsa ka-Anathi, owabulala amaFilista amakhulu asithandathu ngetlobo yokutlhorholoja iinkabi. Naye wasindisa ama-Israyeli.