ABAKHOKHELI 21 - IsiNdebele 2012 Translation

Ama-Israyeli avusela amaBhenjamini imizi

¹ Amadoda wakwa-Israyeli afunga eMitsipha athi: “Akukho noyedwa phakathi kwethu ozakwendisela indodakazakhe kumBhenjamini.”

² Nje-ke abantu baya eBhethe-Eli, bahlala lapho bekwahlwa baphambi kwakaZimu. Barhahlawula babibitheka

³ bathi: “Maye Somnini, Zimu wakwa-Israyeli! Kubayini sehlelwe yinto enje kobanyana namhlanje silahlekelwe yikoro enye kwa-Israyelapha na?”

⁴ Kwathi ekuseni ngakusasa abantu bavuka ngovivi bakha i-aldari lapho, benza umhlabelo wokutjhiswa newetjhebiswano.

⁵ Yeke ama-Israyeli athi: “Ngubani phakathi kwazo zoke iinkoro zakwa-Israyeli ongazange eze ehlanganweni phambi kwakaSomnini?” Bebafunge ngokuqinisileko bonyana ongeze eza phambi kwakaSomnini eMitsipha, uzakubulawa.

⁶ Ama-Israyeli adabuka ngoBhenjamini umfowawo, athi: “Ikoro enye isuliwe kwa-Israyeli namhlanjesi.

⁷ Sizokwenzani ngalabo abaseleko bakwaBhenjamini? Bazobathathaphi abafazi ngombana safunga phambi kwakaSomnini bonyana angeze sabendisela amadodakazethu?”

⁸ Kungebangelo abuza athi: “Ngiyiphi yeenkoro zakwa-Israyeli engazange ize phambi kwakaSomnini eMitsipha?” Afumana bonyana azange kuze namunye weJabetjhi yeGiliyadi ehlanganweni,

⁹ ngombana kwathi nakubalwa abantu, azange kufunyanwe namunye umhlali weJabetjhi yeGiliyadi.

¹⁰ Yeke umkhambathi wathumela iinkulungwana ezilitjhumi nambili zamadoda anesibindi ukudlula woke, wawalayela wathi: “Khambani nifese nimadlhe abahlali beJabetjhi yeGiliyadi ngesabula, ningatjhiyi mfazi namntwana.

¹¹ kodwana yenzani ngalendlela: Bulalani nya woke omduna nabo boke besifazana asele bazi indoda.”

¹² Phakathi kwabahlali beJabetjhi yeGiliyadi amadoda lawo afumana amakhulu amane wamatlawana angazange alale nendoda. Eza nawo ekampeni eTjhilo esenarheni yeKanana.

¹³ Nje-ke umkhambathi woke wathumela ilizwi kumaBhenjamini agade asemadwaleni weRimoni, wamemezela ukuthula kiwo.

¹⁴ AmaBhenjamini abuya-ke ngesikhatheso, ama-Israyeli awanikela amatlawana ebegade awasindise eJabetjhi yeGiliyadi, kodwana azange abanele.

¹⁵ Abantu bakhathazeka ngoBhenjamini ngombana uSomnini gade enze isikhala eenkorweni zakwa-Israyeli.

¹⁶ Yeke abaphathi bomkhambathi bathi: “Alo, sizokuthini ngalabo abangakafumani abafazi ngombana babulewe boke abafazi kwaBhenjamini?”

¹⁷ Godu bathi: “Ilifa labasindileko kufanele lidlulele eenzukulwaneni zakwaBhenjamini. U-Israyeli akakwazi ukulahlekelwa yikoro enye.

¹⁸ Nanyana kunjalo, asikwazi ukubanikela amadodakazethu bona abe bafazi babo ngombana thina bantu bakwa-Israyeli safunga sathi akanikelelwe ozakunikela umBhenjamini umfazi.”

¹⁹ Yeke bakhumbula bonyana kunomnyanya kaSomnini qobe mnyaka eTjhilo engetlhagwini yeBhethe-Eli, ngepumalanga yendlela ekulu esuka eBhethe-Eli eya eTjhekemu nangesewula yeLebona.

²⁰ Bayala amaBhenjamini bathi: “Nina khambani niyokubadalala esidiribeni,

²¹ nilinde lapho, kuzakuthi lokha amadodakazi weTjhilo naphumako bona ayogida emnyanyeni lo, nina-ke nivumbuke esidiribenapho enye nenye indoda izibambele umfazi emadodakazini weTjhilo bese niya enarhenenu kwaBhenjamini.

²² Kuzakuthi abomayise namkha abomnakwabo nabazonghonghoyila kithi, sizakuthi kibo: ‘Sibawa nibe nomusa kithi ngombana azange sibamuke abafazi lokha nasilwa namaBhenjamini. Nani azange nibanikele amadodakazenu, ngalokho aninamlandu wamanikelela lawo.’ ”

²³ Yeke amaBhenjamini enza njalo, azithathela abafazi emadodakazini agade agida ukuya ngesibalo sawo. Abuyela enarhenawo, afese avuselela amadorobhawo, ahlala lapho.

²⁴ Ama-Israyeli aphadlhalala, kwaba ngiloyo naloyo waya ekorweni yekhabo nemndenini wekhabo. Iye, omunye nomunye waziyela endawenakhe.

²⁵ Emihleni leyo gade kunganakosi kwa-Israyeli. Omunye nomunye umuntu gade azenzela umathanda.