ABAKHOKHELI 2 - IsiNdebele 2012 Translation

Ama-Israyeli ayeleliswa bona angabi mahlongandlebe

¹ Ingilozi kaSomnini yakhuphuka isuka eGiligali yaya eBhokimu, yathi kuma-Israyeli: “Nganikhupha eGibhide nganisa enarheni engafunga bonyana ngizayipha aboyihlo. Ngathembisa bonyana angeze ngephula isivumelwano sami nani.

² Nina-ke ningenzi isikhozi nabahlali benarha le, ngalokho bhuruzani ama-aldarabo. Kodwana azange nilalele umyalwami. Nikwenzeleni lokho na?

³ Yeke, gadesi ngithi angeze ngaziqotjha izizwezi phambi kwenu kodwana zizakuba sithiyo kini, nabozinyana bazo babe sisifu.”

⁴ Lokha ingilozi kaSomnini nayikhuluma amezwi la kiwo woke ama-Israyeli, ama-Israyeli arhahlawula.

⁵ Athiya indawo leyo bona yiBhokimu. Enzela uSomnini umhlabelo khonapho.

⁶ Lokha uJotjhuwa natjhaphulula abantu bonyana bakhambe, omunye nomunye waya esabelweni sakhe kobana athumbe inarha ibe lilifa lakhe.

⁷ Abantu balotjha uSomnini emihleni yoke yokuphila kwakaJotjhuwa, nemihleni yoke yabaphathi abasala ngemva kwakaJotjhuwa, ababone yoke imisebenzi emikhulu uSomnini ayenzela ama-Israyeli.

⁸ UJotjhuwa umsa kaNuni, inceku kaSomnini, wahlongakala aneminyaka elikhulu netjhumi.

⁹ Bambulungela emkhawulweni welifa lakhe eTimnathi-Rheresi ngeentatjaneni zakwa-Efrayimu ngetlhagwini yentaba yeGatjhi.

¹⁰ Soke isizukulwaneso naso sahlongakala, kwavuka esinye ngemva kwaso ebesingamazi uSomnini namkha imisebenzi uSomnini ayenzela ama-Israyeli.

Izono zama-Israyeli ngemva kokuhlongakala kwakaJotjhuwa

¹¹ Ama-Israyeli enza ubumbi phambi kwakaSomnini ngokulotjha aboBhali.

¹² Afulathela uSomnini uZimu waboyisemkhulu owabakhupha enarheni yeGibhide, adlhemadlhema ngemva kwabosingazimu babantu ebebahlala hlangana nabo, abakhothamela. Ngokwenza njalo athukuthelisa uSomnini.

¹³ Iye, afulathela uSomnini, alotjha aboBhali nabo-Atjhitarothi.

¹⁴ Yeke itukuthelo kaSomnini yavutha phezu kwama-Israyeli, wawanikela esandleni sabaphangi, bawaphanga. Godu wawathengisela izitha zawo ebeziwazombelezile kangangobana azange akghone ukujamelana nazo.

¹⁵ Njalo lokha naya epini, isandla sakaSomnini besijamelana nawo siwehlisele ubumbi njengombana uSomnini bekawayelelisile bewafunga kiwo. Aba sembandezelekweni ekulu.

¹⁶ USomnini wavusa abakhokheli abasindisa ama-Israyeli ezandleni zalabo ebegade bawaphanga.

¹⁷ Khonapho ama-Israyeli azange alalele abakhokheli bawo ngombana adlhemadlhema ngemva kwabosingazimu abakhothamela. Aphambuka msinyana eendleleni ezakhanjwa boyisemkhulu ebegade balalela imiyalo kaSomnini, wona azange enze njalo.

¹⁸ Njalo lokha uSomnini navusela ama-Israyeli abakhokheli, bekasekela umkhokheli wesikhatheso. Umkhokheli loyo bekasindisa ama-Israyeli ezandleni zezitha zawo emihlenakhe yoke ngombana uSomnini bekarhawuka ngokububula kwawo ngebanga labagandeleli nabahlunguphazi bawo.

¹⁹ Kodwana njalo lokha nakuhlongakala umkhokheli, ama-Israyeli gade abuyela emuva aziphathe kumbi ukudlula aboyise, adlhemadlheme ngemva kwabosingazimu, abalotjhe abe abakhothamele. Azange alahle imikhuba namkha iindlela zawo zokudaza ikani.

²⁰ Yeke itukuthelo kaSomnini yavutha phezu kwaka-Israyeli, bewathi: “Ngebanga lokobana abantwaba baphambukile esivumelwaneni sami engayala ngaso aboyise, bangalalela ilizwi lami,

²¹ angeze bengisaqotjha phambi kwabo ngitjho nasinye sezizwe ezatjhiywa nguJotjhuwa nahlongakalako.”

^22-23 Ngebangelo uSomnini waliselela izizwezo wangaziqotjha khonokho, azange azinikele esandleni sakaJotjhuwa ukuze azizinye ama-Israyeli ukubona bonyana azakutjheja abe akhambe endlelenakhe njengombana kwenza aboyise, namkha njani.