ABAKHOKHELI 18 - IsiNdebele 2012 Translation

Ukufuduka kwekoro yakwaDani

¹ Emihleni leyo gade kunganakosi kwa-Israyeli. Ikoro yakwaDani gade izifunela ilifa eliyinarha yokuhlala ngombana bekube ngesikhatheso beyingakabi ukuba nesabelo elifeni lakwa-Israyeli.

² Yeke amaDani akhetha iingorho ezihlanu kiso soke isibalo semindenawo, azithuma ukusukela eTsora ne-Etjhitawoli kobana ziyozihlolisa inarha bese ziyiqalisise, athi kizo: “Khambani niyozihlolisa inarha.” Zafika enarheni yeentatjaneni zakwa-Efrayimu emzini kaMikha zalala lapho.

³ Kwathi lokha nasele zisemzini kaMikha, zezwa ilizwi lesokana lomLevi, zajika zaya kilo zathi: “Ubekwa yini lapha? Yintobani oyenza endaweni le? Usebenzani lapha?”

⁴ Lona lathi kizo: “UMikha lo, ungenzele ukuthi nokuthi. Nje-ke ungiqatjhile, ngalokho sele ngimphristakhe.”

⁵ Zona zathi kilo: “Sibawa khewusibuzele kuZimu, sizwe bonyana indlelethu izakuba yipumelelo na.”

⁶ Umphristi loyo wathi kizo: “Khambani ngokuthula. Indlelenu itjhejwe nguSomnini.”

⁷ Yeke amadoda amahlanu lawo akhamba afika eLayitjhi, afese abona ukuthi abantu bomuzi lowo bahlala baphephile njengamaTsidoni. Bebazigedlile begodu bavikelekile ngombana bekunganakwethuselwa enarheni leyo, banepumelelo. Gade bakude namaTsidoni kanti godu bebanganabudlelwano nabanye abantu.

⁸ Athi nabuyela eTsora ne-Etjhitawoli, abafowawo bathi kiwo: “Nikhambe njani?”

⁹ Athi: “Madoda, lisani ukuriyada! Siyibonile inarha, heyi ayisikunona kwenarha! Musani ukuzibumba, rhabani sikhambeni senyukeleni khona siyokuthumba inarha leyo!

¹⁰ Lokha naniya khona, nizokufumana abantu bazigedlile nenarha yakhona isithabathaba. Ngambala uZimu uninikele inarha lapha kungaswelwa khona litho lephaseli.”

¹¹ Kwaphuma amadoda amakhulu asithandathu wekoro yakwaDani. Ahloma ngeenkhali zepi asuka eTsora ne-Etjhitawoli,

¹² akhuphuka, ahloma amatendawo eKhiriyathi-Jeyarimu kwaJuda. Ngalokho indawo leyo kuthiwa yiMarhane-Dani bekube kunamhlanje. Yona ingetjingalanga yeKhiriyathi-Jeyarimu.

¹³ Ukusuka lapho anqomba enarheni yangeentatjaneni zakwa-Efrayimu, afika emzini kaMikha.

¹⁴ Amadoda amahlanu ebegade ayozihlolisa inarha athi kubafowawo: “Nikhumbule bonyana kenye yeenkumba zomuzi lo kune-efodi, imihlalandlini nesithombesibazwa sesiliva. Nje-ke niyazi bona nizokwenza njani.”

¹⁵ Aphambukela-ke, angena ngekumbeni yesokana lomLevi emzini kaMikha, alibuza amavuko.

¹⁶ Kwathi lokha amadoda amakhulu asithandathu wamaDani agade ahlome ngeenkhali zepi najama ebungenweni besango lomuzi,

¹⁷ amadoda amahlanu ebegade ayozihlolisa inarha akhuphuka, angena bona athathe isithombesibazwa esinamekwe ngesiliva, i-efodi nemihlalandlini. Ngesikhatheso umphrisiti gade asajame ebungenweni besango namadoda amakhulu asithandathu lawo.

¹⁸ Lokha amadoda amahlanu nangena ngekumbeni kaMikha athatha isithombesibazwa, i-efodi nemihlalandlini, umphristi wawabuza wathi: “Heyi nina! Nenzani?”

¹⁹ Wona athi: “Thula wena, uvale umlonyanakho lowo! Khamba nathi, ube mfundisi nomphristethu. Akusigcono ukuba mphristi womndeni ngitjho nowekoro kwa-Israyeli kunokuba mphristi wekumba yomuntu oyedwa na?”

²⁰ Umphristi wajabula, wathatha i-efodi, imihlalandlini nesithombesibazwa wangena hlangana nabantu.

²¹ Bajika, baragela phambili ngendlelabo. Bakhambisa ngaphambili abantwana, imihlambi nezinto eziligugu.

²² Kwathi nasele bamlenzana ukusuka kwaMikha, kwahlatjwa umkhosi emadodeni agade akhelene noMikha. Agijima afunyana amaDani.

²³ Lokha narhuwelela abantu bakwaDani njalo, baphendukela kuMikha bathi: “Ulunywa yini bona ungabeze usilandele ngesiqubuthu esingaka?”

²⁴ Yena wathi: “Nithethe uzimami engizenzele yena benathatha nomphristami nangena indlela, nangitjhiya nginganalitho! Alo, ningibuza njani-ke bonyana ngilunywa yini?”

²⁵ AmaDani athi kuye: “Ungabi nomlomo omkhulu kithapha wena! Yelela! Nakungasinjalo amadoda aneenhliziywana azakuwalazela bese ulahlekelwa buphilo, wena nomzakho.”

²⁶ Ukusuka lapho amaDani azikhambela. UMikha wathi nabona bonyana bangambhedlha, wajika, wabuyela kwakhe.

²⁷ Ngaleyondlela amaDani athatha lokho okwenziwe nguMikha kanye nomphristakhe. Aya eLayitjhi, abhudungela abahlali bakhona ebebazigedlile begodu bavikelekile, abamadlha ngesabula abe atjhisa nomzabo.

²⁸ Azange babe nomenyeli ngombana umuzi lowo bewukude neTsidoni begodu abahlali bakhona gade banganabudlelwano nabo. Gade kungemrhobeni wakaBhethe-Rerhobu. AmaDani akha idorobho lapho, ahlala kilo.

²⁹ Athiya idorobhelo bona yiDani, alithiyelela ngoDani ukhokho wawo owabelethwa ngu-Israyeli, kodwana ekuthomeni umuzi lowo bekuyiLayitjhi.

³⁰ AmaDani azijamisela isithombesibazwa, kwathi uJonathani umsa kaGeritjhomu omsa kaMosi namadodanakhe baba baphristi bekoro yamaDani kufikela mhlana kuthunjwa inarha leyo.

³¹ Yeke amaDani ajamisa isithombesibazwa esenziwa nguMikha ngeenkhathi zoke lokha ithempeli lakaZimu naliseTjhilo.