ABAKHOKHELI 16 - IsiNdebele 2012 Translation

USamsoni noDelila

¹ USamsoni waya eGaza. Wafika lapho wabona ingwadla, wayingena.

² Abantu beGaza batjelwa kwathiwa: “Kazi uSamsoni ulapha.” Bazombeleza indawo leyo bamlalela ubusuku boke esangweni ledorobho. Bathula bathi du ubusuku boke bazitjela bathi: “Asilindeni bekuse bese siyambulala.”

³ Kodwana uSamsoni walala lapho bekwaba kuphakathi kobusuku. Wavuka khonokho, wabamba iminyango yesango ledorobho wayisiphula namagosenayo amabili kanye nesiqabo sakhona, wakutjatha koke lokho emahlombe, wakhamba nakho esiqongolweni sentaba ephambi kweRhebroni.

⁴ Ngemva kwalokho waba nelihlo emntazaneni wemrhobeni weSorekhi ebekuthiwa nguDelila.

⁵ Ababusi beemfunda zamaFilista beza kuDelila bathi kuye: “Msomasome ufumane bonyana amandlakhe akuphi. Khona-ke thina sizambamba, simbophe, simhlule. Omunye nomunye wethu uzokunikela iimpaparwana ezimakhulu alitjhumi nanye zesiliva.”

⁶ UDelila wathi kuSamsoni: “Ngiyakubawa, akhese ungitjele bonyana amandlakho amakhulu akuphi. Umuntu angakubopha njani ukuze akuhlule na?”

⁷ USamsoni wathi kuye: “Nange ngingabotjhwa ngemikhwepha elikhomba emitjha nengakonyiswa, ngiyakutjela ngizokuphela amandla ngibe njengaye woke umuntu.”

⁸ Yeke ababusi beemfunda zamaFilista balethela uDelila imikhwepha elikhomba emitjha nengakonyiswa, wambopha ngayo.

⁹ Gade asele abeke amadoda alalele uSamsoni ngelawini elinye. Warhuwelela wathi kuSamsoni: “Nako amaFilista phezu kwakho Samsoni!” Kodwana uSamsoni wavuthula imikhwepha leyo kwaba njengalokha umtiya welineni nawuzwa umlilo. Ngaleyondlela ifihlakalo yamandlakhe azange yaziwe.

¹⁰ UDelila wathi kuSamsoni: “Qala, ungenze ukeke, wangitjela amala. Akhese ungitjele bona ungabotjhwa njani.”

¹¹ USamsoni wathi kuye: “Nange bangibopha ngeentambo ezitja ezingazange zisetjenziswe, ngizokuphela amandla bese ngibe njengaye woke umuntu.”

¹² UDelila wathatha iintambo ezitja wambopha ngazo warhuwelela wathi kuye: “Nako amaFilista phezu kwakho Samsoni!” Amadoda gade amlalele ngelawini elinye. Kodwana wavuthula iintambezo emkhonwenakhe kwanga mumucwana.

¹³ UDelila wathi kuSamsoni: “Bekube gadesi usalokho ungenza ukeke, ungitjela amala. Ngitjela bona ungabotjhwa njani.” Yena wathi kuye: “Nawungalukelela imiyekwami elikhomba ehloko hlangana nemicu yeenkoteni bese uyiqinisa ngesikhonkhwani, khona-ke ngizakuphela amandla, ngibe njengaye woke umuntu.” Kwathi asalele, uDelila wathatha imiyeko elikhomba ehlokwakhe wayilukelela hlangana nemicu yeenkoteni

¹⁴ bese wayiqinisa ngesikhonkhwani. Warhuwelela wathi kuye: “Nako amaFilista phezu kwakho Samsoni!” Kodwana wavuka ebuthongweni, wasiphula isikhonkhwani somphekgho womluki kanye neenkoteni.

¹⁵ UDelila wathi kuSamsoni: “Ungatjho njani uthi uyangithanda khibe ihliziywakho ayikho kimapha? Sele ungenze ukeke bekwaba kathathu, awufuni ukungitjela bonyana akuphi amandlakho amakhulu!”

¹⁶ Kwathi uDelila nalokhu amngena ngendlebeni ngelizwi lakhelo, uSamsoni wadineka kokufa.

¹⁷ Wagcina amtjela soke isifuba sakhe wathi: “Azange khengithintwe ngotjhefana ehloko ngombana ngaba mnaziri kuZimu ngisese sesibelethweni sakamma. Nange ngingagudwa, amandlami azokhamba, ngiphelelwe bese ngibe njengaye woke umuntu.”

¹⁸ UDelila wathi angabona bonyana kwanjesi umtjele soke isifuba sakhe, wathumela igama bona kubizwe ababusi beemfunda zamaFilista, wathi: “Yenikhuphuke msinyana ngombana kwanje khona, uyikhuphe ngonina ifihlakalwakhe.” Yeke ababusi beemfunda zamaFilista bakhuphukela kuye, beza baphethe iimpaparwana.

¹⁹ UDelila wayenga uSamsoni bona alale emathangenakhe. Wabiza indoda ethileko bona agude imiyeko elikhomba ehloko kaSamsoni phambi kwayo. Ngaleyondlela uDelila wenza bona uSamsoni abe buthakathaka, amandlakhe amtjhiya.

²⁰ Nje-ke warhuwelela wathi kuye: “AmaFilista aphezu kwakho Samsoni!” USamsoni wavuka ebuthongweni wadlumbana bona uzakuphuma njengemhleni, azitjhaphulule. Gade angazi bonyana uSomnini sele amtjhiyile.

²¹ AmaFilista ambamba amgobhodlha amehlo. Ambopha ngeenketani zekoporo, amehlisela eGaza. Umsebenzakhe kwaba kugaya ikoroyi ejele.

²² Kodwana iinhluthu ehlokwakhe zathoma ukumila godu ngemva kokugudwa kwazo.

Ukuhlongakala kwakaSamsoni

²³ Ababusi beemfunda zamaFilista bahlangana ndawonye kobana benzele uDagoni usingazimabo umhlatjelo omkhulu begodu bajekezele ngombana bathi: “Uzimethu unikele uSamsoni isitha sethu esandleni sethu.”

²⁴ Lokha abantu nababona uSamsoni, badumisa usingazimabo ngombana bathi: “Uzimethu unikele esandleni sethu, isitha sethu okumbhubhisi wenarhethu obulele inengi lethu.”

²⁵ Kwathi nasele iinhliziyo zabo zithabile, bathi: “Bizani uSamsoni bona azosidlalela.” Yeke babiza uSamsoni ngejele. Bamjamisa hlangana neensika ezimbili zethempeli kobana abadlalele.

²⁶ USamsoni wathi emsaneni omdosako: “Yewungidosele eensikeni ezisekele ithempeleli bese ungithintisa zona ukuze ngizesame ngazo.”

²⁷ Ithempeli beligcwele amadoda nabafazi. Ephahleni lethempeli gade kunabantu abapheze babe ziinkulungwana ezintathu ebegade bazokubukela uSamsoni nadlalako. Nababusi beemfunda ezihlanu zamaFilista gade balapho.

²⁸ USamsoni wabiza uSomnini wathi: “Somnini Somandla, ngibawa bona uSomnini akhumbule abakwenza kimi. Zimu, ngibawa ungiphe amandla sekube namhlanjesi kwaphela ukuze ngizibuyiselele kumaFilista ngebanga lalinye lamehlwami.”

²⁹ USamsoni wabamba iinsika ezimbili ezisekele ithempeli. Isandla sakhe sokugoma saba kenye nesobuncele saba kenye.

³⁰ Wathi: “Angife namaFilista!” Wasunduza iinsikezo ngamandlakhe woke, ithempeli lawela phezu kwababusi naphezu kwabo boke abantu ebegade bangapho. Abantu ababulala nafako gade bangaphezu kwalabo ababulala nasaphilako.

³¹ Abafowabo nawo woke umndeni wekhabo beza, bamthatha banyuka naye bambulungela phakathi kweTsora ne-Etjhitawoli ethuneni lakaManowarhi uyise. Gade akhokhele ama-Israyeli iminyaka ematjhumi amabili.