ABAKHOKHELI 13 - IsiNdebele 2012 Translation

Ukubelethwa kwakaSamsoni

¹ Ama-Israyeli godu enza ubumbi phambi kwakaSomnini; ngalokho uSomnini wawanikela esandleni samaFilista iminyaka ematjhumi amane.

² Kwakunendoda ethileko yeTsora okwakuthiwa nguManowarhi yekoro yakwaDani. Umkayo gade ayinyumba, anganabantwana.

³ Ingilozi kaSomnini yazibonakalisa emfazini loyo yathi kuye: “Qala, uyinyumba, awunabantwana, kodwana uzazithwala bese ubeletha indodana.

⁴ Ngalokho-ke zitjheje, ungaseli iwayini namkha isiselo esidakako begodu ungagomi litho elingakahlambuluki

⁵ ngombana uzazithwala ubelethe indodana. Ingathintwa ehloko ngotjhefana ngombana imsana ozakuba mnaziri kuZimu kwasesibelethweni sakanina. Ngiyo ezakuthoma ukutjhaphulula ama-Israyeli esandleni samaFilista.”

⁶ Umfazi loyo wafese watjela ubaba wakwakhe wathi: “Kazi kufike umuntu kaZimu kimi. Uqaleka inga yingilozi kaZimu, wesabeka khulu. Azange bengisambuza nokobana ubuyaphi, naye azange angitjele ibizo lakhe.

⁷ Kodwana uthe kimi, ‘Qala, uzazithwala bese ubeletha indodana. Yeke zitjheje ungaseli iwayini namkha isiselo esidakako begodu ungagomi litho elingakahlambuluki ngombana umsana loyo uzakuba mnaziri kuZimu ukusukela esibelethweni sakanina bekube sekufeni kwakhe.’ ”

⁸ UManowarhi wancenga uSomnini wathi: “Awu Somnini, ngiyarabhela. Bengithi umuntu kaZimu, uSomnini ebegade amthume kithi loya, akasikhambele godu ukuze asifundise bonyana senzeni ngomsana ozokubelethwa lo.”

⁹ UZimu wamizwa uManowarhi, nje-ke ingilozi leyo yeza kumkaManowarhi yamfumana ahlezi esimini. Kodwana uManowarhi gade angasi naye.

¹⁰ Umfazi wagijima msinyana wayokutjela ubaba wakwakhe wathi: “Qala, umuntu oweza kimi mhlokha, uzibonakalisile godu.”

¹¹ UManowarhi wasikima walandela umkakhe, wafika emuntwini loyo wathi: “Nguwe umuntu okhulume nomkami lo na?” Wathi: “Iye, ngimi.”

¹² UManowarhi wathi: “Lokha amezwakho nazalisekako, uzokuphila ipilo enjani umsana loyo begodu yini azoyenza epilweni?”

¹³ Ingilozi kaSomnini yathi kuManowarhi: “Koke engikutjele umkakho kumele akuyelele.

¹⁴ Angagomi litho elibuya esidiribeni, angaseli iwayini namkha isiselo esidakako. Angagomi litho elingakahlambuluki. Akatjheje koke engimyale ngakho.”

¹⁵ UManowarhi wathi engilozini kaSomnini: “Ngiyakukhombela, bengithi asikubambezele kancani, sikulungisele imbuzana.”

¹⁶ Ingilozi kaSomnini yathi kuManowarhi: “Iye, ungahle ungibambezele, nokho yazi bonyana angizogoma litho lakho. Kodwana nawufuna ukulungisela uSomnini umhlabelo wokutjhiswa, ungakwenza lokho.” UManowarhi gade angazi bonyana umuntu loyo yingilozi kaSomnini,

¹⁷ yeke wathi kuye: “Konje ubaba ngubani ibizo? Sengibuza ngombana kuzakuthi amezwakho nazalisekileko bese sikuthumelela isibiko.”

¹⁸ Ingilozi kaSomnini yathi: “Kubayini ungibuze ibizo lami? Liligugu khulu.”

¹⁹ Yeke uManowarhi wathatha imbuzana nomnikelo weenthoro, wenzela uSomnini umnikelo phezu kwedwala. USomnini wenza imikarisomraro phambi kwakaManowarhi nomkakhe:

²⁰ Kuthe lokha ilangabi e-aldarini nalenyukela phezulu, ingilozi kaSomnini yakhuphuka ngalo. UManowarhi nomkakhe gade baqalile nakwenzeka lokho. Bahloma iinhloko phasi.

²¹ Ingilozi kaSomnini azange isazibonakalisa kuManowarhi nomkakhe godu. Kuthe lokha uManowarhi nalemuka bonyana gade kuyingilozi kaSomnini,

²² wathi kumkakhe: “Ngambala sizokufa ngombana sibone uZimu.”

²³ Kodwana umkakhe wathi: “Nakube uSomnini bekafuna ukusibulala, bekangeze amukela umhlabelo wokutjhiswa nomnikelo weenthoro ezandleni zethu namkha asibonise koke lokhu namkha asibikele iindaba ezinje.”

²⁴ Umfazi loyo wabeletha indodana, wayithiya bona nguSamsoni. Wakhula umsana, uSomnini wambusisa.

²⁵ UMoya kaSomnini wathoma ukumthinta aseMarhane-Dani hlangana neTsora ne-Etjhitawoli.