ABAKHOKHELI 11 - IsiNdebele 2012 Translation

UJafta usindisa ama-Israyeli

¹ UJafta umGiliyadi gade ayingorho. Uyise bekunguGiliyadi, kodwana unina gade ayingwadla.

² Umfazi kaGiliyadi naye wambelethela amadodana. Kuthe lokha amadodana lawo nakhulako, aqotjha uJafta athi kuye: “Angeze waba nesabelo emzini kababa ngombana uyindodana yomfazi omunye.”

³ UJafta wabaleka kubafowabo wayokuhlala enarheni yeThobu. Wafika lapho wabuthelela imigulukudu, yamlandela.

⁴ Ngemva kwesikhathi ama-Amoni alwa no-Israyeli.

⁵ Kwathi lokha ama-Amoni nathoma ukulwa no-Israyeli, abaphathi bakwaGiliyadi bakhamba bayokuthatha uJafta enarheni yeThobu,

⁶ bathi kuye: “Yewize uzokuba mrholethu ukuze silwe nama-Amoni.”

⁷ Kodwana uJafta wathi kubaphathi bakwaGiliyadi: “Angithi beningizonda benangiqotjha emzini kababa! Alo, kubayini-ke sele nigijimela kimapha naninomraro?”

⁸ Abaphathi bathi kuye: “Iye, khona kunjalo. Nokho-ke size kuwe. Nange unganamba nathi, ulwe nama-Amoni lawa, uzakuba mrholethu kilo loke lakwaGiliyadi.”

⁹ UJafta wathi ebaphathinabo: “Naningibuyisela ekhaya bona ngiyokulwa nama-Amoni bese uSomnini uwanikela esandleni sami, nitjho bona ngizaba mrholenu na?”

¹⁰ Abaphathi bathi: “Iye, uSomnini uzakuba ngufakazi phakathi kwethu, sizakwenza okutjhoko.”

¹¹ Yeke uJafta wakhamba nabaphathi bakwaGiliyadabo. Abantu bakhona bamenza ihloko nomrholabo. UJafta wabuyelela amezwakhe phambi kwakaSomnini eMitsipha.

¹² UJafta wathumela iinthunywa ekosini yama-Amoni wathi: “Ngigomeni yakho kobana ungabeze uphume ipi uzokulwa nenarhami na?”

¹³ Ikosi yama-Amoni yaphendula iinthunywezo yathi: “Ngombana u-Israyeli naphuma eGibhide wathatha inarhami ukusuka e-Arinoni ukuya eJabokhi ukuyokufika eJordani. Yeke ibuyise ngokuthula.”

¹⁴ Godu uJafta wathumela iinthunywa ekosini yama-Amoni

¹⁵ wathi kiyo: “Nakhu okutjhiwo nguJafta: U-Israyeli azange athathe inarha yakwaMowabi namkha yama-Amoni,

¹⁶ kodwana kwathi naphuma eGibhide, waratha erhalawumbeni wanqomba elwandle lomGaba wafika eKhadetjhi.

¹⁷ U-Israyeli wathumela umlayezo ekosini yakwa-Edomu wathi, ‘Sibawa usivumele sidlule enarhenakho.’ Kodwana ikosi yakwa-Edomu yaqinisa ihloko. Godu wathumela ilizwi ekosini yakwaMowabi, nayo yakhunyalala. Yeke u-Israyeli wahlala eKhadetjhi.

¹⁸ Ukusuka lapho wakhamba phakathi kwerhalawumbapho, wazombeleza inarha yakwa-Edomu neyakwaMowabi wabe wafika ngepumalanga yenarha yakwaMowabi. Wahloma amatendakhe ngehlangothini le-Arinoni. Azange ayame i-Arinoni, okumkhawulo wakwaMowabi, kobana abeke inyawo lakhe enarheni yakwaMowabi.

¹⁹ U-Israyeli wathumela ilizwi kuSirhoni ikosi yama-Amori, egade iphethe eRhetjhibhoni wathi kiyo, ‘Ngibawa ukudlula enarhenakho ngiye keyami.’

²⁰ Kodwana ikosi uSirhoni azange ithembe u-Israyeli bonyana angadlula enarhenayo. Yeke, yabuthelela abantu bayo ndawonye, yahloma amatende eJahatsi yalwa no-Israyeli.

²¹ USomnini uZimu wakwa-Israyeli wanikela uSirhoni nabo boke abantu bakhe esandleni saka-Israyeli, wamhlula. Yeke u-Israyeli wathatha yoke inarha yama-Amori ebegade ahlala lapho.

²² Wathatha woke umkhawulo wama-Amori ukusuka e-Arinoni ukuya eJabokhi nokusuka erhalawumbeni ukuya eJordani.

²³ Ngalokho-ke uSomnini uZimu wakwa-Israyeli waqotjha ama-Amori phambi kwabantu bakhe, ama-Israyeli. Alo, wena ufuna ukuwathathela ilifa lawo na?

²⁴ Wena wamukela okuphiwa ngusingazimakho uKemotjhi. Nathi-ke sizakulonda yoke inarha uSomnini uZimethu ayimuke abanye phambi kwethu wasinikela yona.

²⁵ Kghani wena ubona inga ungcono kunoBhalakhi umsa kaTsipori ikosi yakwaMowabi? Yena zange akhe ajamelane no-Israyeli namkha alwe naye.

²⁶ Kubayini ungazange ulinge uthathe umkhawulo lowo eminyakeni emakhulu amathathu le ngesikhathi ama-Israyeli asahlala eRhetjhibhoni nemizanenayo ne-Aroweri nemizanenayo kanye nakiwo woke amadorobho aseligwini le-Arinoni?

²⁷ Ngalokho-ke angikakoni mina, kodwana wena uyangona ngokuphuma ipi bona ulwe nami. USomnini omugwebi uzakuqunta namhlanje phakathi kwama-Israyeli nama-Amoni.”

²⁸ Kodwana ikosi yama-Amoni azange ilalele umlayezo kaJafta agade awuthumele kiyo lowo.

²⁹ UMoya kaSomnini wehlela kuJafta, wadlula kwaGiliyadi nakwaManase wadlulela eMitsipha eseGiliyadi, ukusuka lapho wanqomba kuma-Amoni.

³⁰ UJafta wenza isifungo kuSomnini wathi: “Nange uSomnini anganikela ama-Amoni esandleni sami,

³¹ nanyana yini ephuma emnyango wekumbami ukungihlangabeza ekufikeni kwami, nangibuya ukuyohlula ama-Amoni, kuzakuba ngokwakaSomnini. Ngizakwenza ngakho umhlabelo wokutjhiswa.”

³² Yeke uJafta wayamela ngaphetjheya kuma-Amoni kobana alwe nawo. USomnini wawanikela esandleni sakhe.

³³ Wawamadlha ukusuka e-Aroweri ukuya esifundeni seMinithi nokuyokufika e-Abela-Keramimi. Wabulala abantu abanengi bewathumba nemizi ematjhumi amabili. Yeke ama-Amoni aguqiswa ma-Israyeli.

³⁴ UJafta wabuyela ekhaya eMitsipha. Baba-ke, nakho-ke ahlangatjezwa yindodakazakhe igida ngabosotjherere neentanga zayo. Umntazana loyo gade ayithorwanakhe, ngaphandle kwakhe uJafta gade anganandodana namkha indodakazi.

³⁵ Wathi lokha nambonako, wadabula izambatho zakhe, wathi: “Maye ndodakazami! Ungiqede amandla! Alo, sekube nguwe ongifaka emrarweni ongaka! Ngirhabe ngakhuluma kuSomnini, nje-ke angisakwazi ukujika amezwami.”

³⁶ Yona yathi kuyise: “Baba, nakube wathembise uSomnini, yenza lokho okuthembise uSomnini ngami ngombana uSomnini ukubuyiselele ezitheni zakho, ama-Amoni.”

³⁷ Emva kwalokho yathi kuyise: “Nginesibawo sinye phambi kwakho: Ngibawa ungitjhaphulule iinyanga ezimbili ngiye eentabeni ngiyokulilela ubuntombi bami, mina neentanga zami.”

³⁸ UJafta wathi: “Kulungile, khamba.” Watjhaphulula indodakazakhe iinyanga ezimbili. Yakhamba kanye neentanga zayo kobana iyokulilela ubuntombi bayo eentabeni.

³⁹ Ekupheleni kweenyanga ezimbili, yabuyela kuyise. Wenza ngayo umhlabelo njengombana afunga kuSomnini. Indodakazi leyo beyingazange yembulele indoda amabhayi. Ukusuka ngesikhatheso kwaba mkhuba kwa-Israyeli

⁴⁰ bonyana amadodakazi wakwa-Israyeli minyaka yoke akhambe ayokulilela indodakazi kaJafta umGiliyadi amalanga amane.