ABAKHOKHELI 10 - IsiNdebele 2012 Translation

UTola noJayire baba bakhokheli

¹ Ngemva kokuhlongakala kwaka-Abimeleki, uTola umsa kaPuwa omsa kaDodo indoda yakwa-Isakari, watjhaphulula u-Israyeli. Wahlala eTjhamiri ngeentatjaneni zakwa-Efrayimu.

² Yena wakhokhela ama-Israyeli iminyaka ematjhumi amabili namithathu. Ngemva kwalapho wahlongakala, wabulungwa eTjhamiri.

³ Ngemva kwakhe kwaba nguJayire umGiliyadi owakhokhela ama-Israyeli iminyaka ematjhumi amabili namibili.

⁴ Gade anamadodana amatjhumi amathathu agade akhwela abodumbana abamatjhumi amathathu. Amadodana lawo gade aziinduna zemizi ematjhumi amathathu enarheni yakwaGiliyadi, ebizwa bona yiRhavothi-Jayire bekube namhlanje.

⁵ UJayire wahlongakala, wabulungwa eKhamoni.

Ama-Israyeli agandelelwa ma-Amoni namaFilista

⁶ Ama-Israyeli godu enza ubumbi phambi kwakaSomnini. Alotjha aboBhali nabo-Atjhitarothi, abosingazimu be-Aramu, beTsidoni nebeMowabi kanye nabosingazimu bama-Amoni nebamaFilista. Afulathela uSomnini, azange amlotjhe.

⁷ Itukuthelo kaSomnini yavutha phezu kwaka-Israyeli, wawanikela esandleni samaFilista nesandleni sama-Amoni.

⁸ AmaFilista nama-Amoni agandelela abe agadangela ama-Israyeli umnyaka lowo. Kwaba minyaka elitjhumi nobumnane izizwezi zigandelela woke ama-Israyeli angaphetjheya kweJordani eGiliyadi, enarheni ebegade ingeyama-Amori.

⁹ Ama-Amoni ayama iJordani kobana nawo ayokulwa kwaJuda, kwaBhenjamini kanye nekumbeni ka-Efrayimu. Ngalokho ama-Israyeli aba sesizini elikhulu.

¹⁰ Ama-Israyeli alilela uSomnini athi: “Sonile phambi kwakaSomnini ngombana sifulathele uZimethu salotjha aboBhali.”

¹¹ USomnini wathi kiwo: “Azange nginitjhaphulule esandleni samaGibhide nama-Amori, ama-Amoni namaFilista na?

¹² Godu nagandelelwa maTsidoni, ama-Amalekhi namaMawoni nangililela, nganitjhaphulula esandleni sawo.

¹³ Khonapho ningifulathele nalotjha abosingazimu, ngalokho angeze bengisanitjhaphulula.

¹⁴ Khambani niyokulilela abosingazimu enibakhethilekwabo. Batjeleni banitjhaphulule esizini lenwelo.”

¹⁵ Ama-Israyeli athi kuSomnini: “Siyavuma, sonile. Besithi uSomnini akenze nanyana yini ayithandako ngathi. USomnini akhe asitjhaphulule kube kanye.”

¹⁶ Nje-ke alahla abosingazimu abaphakathi kwawo, athoma ukulotjha uSomnini. USomnini waba nesirhawu ngesizi lama-Israyeli.

¹⁷ Ama-Amoni abizelwa epini, ahloma amatendawo eGiliyadi. Ama-Israyeli nawo ahlangana ndawonye, ahloma amatendawo eMitsipha.

¹⁸ Abarholi babantu beGiliyadi bakhuluma bodwa bathi: “Nakungaba nomuntu ongathoma ntange alwe nama-Amoni, uzakuba yinduna yabo boke abahlali beGiliyadi.”