ABAKHOKHELI 1 - IsiNdebele 2012 Translation

Ama-Israyeli athatha amafa wawo

¹ Incwadi le iphathelene nokwenzeka ngemva kokuhlongakala kwakaJotjhuwa. Ngaphambi kobana ahlongakale ama-Israyeli abuza kuSomnini athi: “Ngubani ozakukhuphuka qangi ayosilwela namaKanana?”

² USomnini wathi: “Kuzakwenyuka bakwaJuda. Qalani, nginikele inarha ezandleni zabo.”

³ BakwaJuda bathi kebakwaSimiyoni abafowabo: “Yenyukelani nathi enarheni esabelwe yona ukuze silwe namaKanana. Nathi sizakwenyukela nani enarheni enabelwe yona.” Yeke bakwaSimiyoni bakhamba nabo.

⁴ BakwaJuda benyuka-ke, uSomnini wanikela amaKanana namaPerizi ezandleni zabo. Bamadlha iinkulungwana ezilitjhumi eBhezekhi.

⁵ Bathi basamadlhana nawo eBhezekhapho, bafumana u-Adoni-Bhezekhi, bamsahlela.

⁶ U-Adoni-Bhezekhi loyo wabaleka kodwana bamgijimisa, bambamba, bamqunta abothubha nabothubhakghuru bakhe.

⁷ Nje-ke u-Adoni-Bhezekhi wathi: “Amakhosi amatjhumi alikhomba aquntwe abothubha nabothubhakghuru gade aphele adobhelele iintshutshurwana ngaphasi kwetafulami, ngalokho uZimu ungibetha ngezami.” Walethwa eJerusalema, wahlongakalela lapho.

⁸ BakwaJuda nabo balwa neJerusalema, bayithumba, bayimadlha ngesabula, bayithungelela ngomlilo.

⁹ Ngemva kwalokho abantu bakwaJuda balwa namaKanana ebegade ahlala eentabeni, ngesewula yenarha nangeTjhefela.

¹⁰ BakwaJuda basahlela amaKanana ebegade ahlala eRhebroni. (Ekuthomeni iRhebroni bekuthiwa yiKhiriyathi-Ariba.) Bahlula uTjhetjhayi, u-Arhimani noTalimayi khonapho.

¹¹ Ukusuka lapho basahlela abahlali beDebhiri. (Ekuthomeni iDebhiri bekuthiwa yiKhiriyathi-Seferi.)

¹² Ngesikhatheso uKalebi wathi: “Nanyana ngubani omadlha iKhiriyathi-Seferi, ayithumbe, ngizamnikela u-Akisa indodakazami abe mkakhe.”

¹³ U-Otiniyeli umsa kaKhenazi, ongumfowabo omncani kaKalebi, wayithumba. UKalebi wamnikela indodakazakhe u-Akisa bona abe mkakhe.

¹⁴ Ekufikeni kwaka-Akisa ku-Otiniyeli gade amyenge bonyana akhombele uyise isimu. Kodwana kuthe nabafika kuyise, u-Akisa asehla kudumbanakhe, uKalebi wathi kuye: “Ufuna ngikwenzeleni?”

¹⁵ Yena waphendula wathi: “Ngibawa isipho. Ubaba ungibeke ngesewula yenarha eyomileko, yeke akangiphe indawo enamanzi.” Nje-ke uKalebi wamnikela indawo enamanzi emibundwini nangemirhobeni.

¹⁶ Iinzukulwana zomukhwe kaMosi, okutjho amaKheni, zakhuphuka nabantu bakwaJuda zisuka edorobheni lamasundu zaya ngerhalawumbeni lakwaJuda elingesewula yenarha eduze ne-Aradi. Zahlala lapho nabantu bakhona.

¹⁷ BakwaJuda bakhamba nebakwaSimiyoni abafowabo, basahlela amaKanana ebegade ahlezi eTsefathi bawahlula, babhubhisa nya indawo leyo. Yeke ibizo ledorobhelo kwathiwa yiRhorima.

¹⁸ Godu bakwaJuda bathatha iGaza nemikhawulwayo, i-Atjhikheloni nemikhawulwayo kanye ne-Ekhironi nemikhawulwayo.

¹⁹ USomnini waba nebakwaJuda bebathumba inarha yangeentabeni, kodwana azange bakghone ukuqotjha abahlali bekangala ngombana gade baneenkarana zepi zesimbi.

²⁰ IRhebroni yanikelwa uKalebi njengombana kwatjho uMosi. Kuhlekuhle nguye owaqotjha amadodana amathathu ka-Anakhi ebegade ahlala lapho.

²¹ BakwaBhenjamini azange baqotjhe amaJebusi ebegade ahlala eJerusalema. Yeke amaJebusi lawo ahlala nabantu bakwaBhenjamini eJerusalema bekube kunamhlanje.

²² Ikumba kaJosefa nayo yenyuka, yasahlela iBhethe-Eli. USomnini waba nayo.

²³ BakwaJosefa bathumela iinhloli zayokuhlola iBhethe-Eli. Ngesikhatheso ibizo ledorobheli bekuthiwa yiLuzi.

²⁴ Iinhloli zabona umuntu aphuma ngedorobheni zathi kuye: “Nange ungasikhombisa intunja yokungena ngedorobhenapha, sizakuba nomusa kuwe.”

²⁵ Yeke wazikhombisa indawo yokungena. Zafese zamadlha idorobho ngesabula. Zasindisa umuntu loyo nomzakhe woke.

²⁶ Umuntu loyo waya enarheni yamaRhithi wafese wakha idorobho walithiya bona yiLuzi, okulibizo lalo bekube kunamhlanje.

²⁷ BakwaManase azange baqotjhe abahlali beBhethe-Tjhani nemizanayo, iTanaki nemizanayo, abahlali beDori nemizanayo, abahlali beJibiliyamu nemizanayo nabahlali beMegido nemizanayo. Ngaleyondlela amaKanana aragela phambili ngokuhlala enarheni leyo.

²⁸ Lokha ama-Israyeli naba namandla, akatelela amaKanana ngomsebenzi, kodwana azange awaqotjhe.

²⁹ Bakwa-Efrayimu azange baqotjhe amaKanana ebegade ahlala eGezeri. Ngaleyondlela aragela phambili ngokuhlala phakathi kwabo.

³⁰ BakwaZebuloni nabo azange baqotjhe abahlali beKhithironi namkha abahlali beNahaloli. Ngaleyondlela amaKanana aragela phambili ngokuhlala phakathi kwabo. Bawakatelela ngomsebenzi.

³¹ Bakwa-Atjheri nabo azange baqotjhe abahlali be-Ako, abahlali beTsidoni, be-Arhilaba, be-Akziba, beRhelibha, be-Afekhi namkha beRerhobho.

³² Ngaleyondlela bakwa-Atjheri bahlala hlangana namaKanana, okubahlali benarha ngombana azange bawaqotjhe.

³³ NebakwaNafitali nabo azange baqotjhe abahlali beBhethe-Tjhemetjhi nabahlali beBhethe-Anathi, kodwana bahlala hlangana namaKanana, okubahlali benarha. Abahlali beBhethe-Tjhemetjhi nebeBhethe-Anathi bakatelelwa ngomsebenzi.

³⁴ Ama-Amori asunduzela bakwaDani emuva ngenarheni yangeentabeni ngombana azange abavumele ukwehlela ekangala.

³⁵ Ama-Amori aphumelela ukuhlala eHari-Rheresi, e-Ayaloni neTjhalibimu, kodwana isandla sekumba kaJosefa sanzinza phezu kwawo akatelelwa ngomsebenzi.

³⁶ Umkhawulo wama-Amori wawuthoma emkghotheni we-Akhirabhimu ukuya eSela ukhuphukele phezulu.