3 UJWANISI 1 - IsiNdebele 2012 Translation

Ukulotjhisa

¹ Umphathi, kuGayusi othandekako, engimthanda ngeqiniso.

² Mthandekako, kunakho koke ngikufisela bona koke kukukhambele kuhle nokobana ube nepilo ehle njengombana kunjalo ngommoyakho.

³ Ngathokoza kangangani lokha abanye babazalwana nabafika bafakaza ngokuthembeka kwakho eqinisweni, okutjho ikhambo lakho eqinisweni.

⁴ Akukho okungithokozisa kangaka ngaphandle kokuzwa bona abantwana bami bakhamba eqinisweni.

UGayusi uyabukwa

⁵ Mthandekako ukwenza ngokwethembeka koke okwenzela abazalwana nanyana bamiqhamuka nje kuwe.

⁶ Bafakazile ebandleni ngethando lakho. Nje-ke uzabe wenza kuhle nange ubakhambisa ngendlela ezakuthokozisa uZimu.

⁷ Kube ngebanga lebizo lakaJesu bona baphume, bangamukeli ilitho kabatjhili.

⁸ Nje-ke thina kufanele sibasekele abantu abanjalo ukuze sibambisane nabo emsebenzini weqiniso.

UDiyotrefe noDemetriyosi

⁹ Ngatlolela ibandla okuthileko; kodwana uDiyotrefe othanda ukuzenza mkhulu, akafuni ukusamukela.

¹⁰ Nje-ke lokha nangizako lapho, ngizokhe ngiyelelisise kuhle akwenzako nangehlebezana yamanga akhamba ayinyenyeza ngathi. Akaneliseki ngalokho, ubuye angabamukeli abazalwana begodu ukhandela labo abafuna ukwenza lokho abe abaqotjhe ngebandleni.

¹¹ Mthandekako, ungalandeli okumbi kodwana landela okuhle. Loyo owenza okulungileko ungewakaZimu, kodwana owenza ubumbi akakamboni uZimu.

¹² Boke bamkhuluma kuhle uDemetriyusi; ngitjho neqiniso liyamfakazela. Nathi godu siyambuka, nawe uyazi bona ubufakazi bethu buliqiniso.

Isiphetho

¹³ Kunengi ebengingakutlolela khona, kodwana azange ngithande ukukutlolela ngekhasi nangomsobo;

¹⁴ nje-ke ngithemba bona ngizokubona masinyana, sizakukhuluma umlomo nomlomo.

¹⁵ Ukuthula akube nawe. Abangani bayakulotjhisa. Ungilotjhisele iinini zami, omunye nomunye ngebizo lakhe.