2 UTHIMOTHI 4 - IsiNdebele 2012 Translation

¹ Ngiyakuyala ngiqinisile phambi kwakaZimu noKrestu Jesu ozakugweba abaphilako nabafileko nangokuvela kokubonakala kwakhe nombuso wakhe, ngithi:

² Tjhumayela ilizwi, ulungele ukulizwakalisa kusikhathi esifaneleko nanyana kungasiso: Sola, ukhalimele, ukhuthaze ngokubafundisa ngesineke esikhulu

³ ngombana siyeza isikhathi lapho abantu bangeze bakhambisana khona nefundiso ephilileko. Kunalokho bazozibuthelelela abafundisi kobana banelise ubuzikazikani beendlebe zabo.

⁴ Bazokufulathela iqiniso badlhemadlheme ngemva kweenolwana.

⁵ Kodwana wena zigobe ezintweni zoke, unyamazele ebunzimeni, wenze umsebenzi womvangeli, uphelelisele ukusebenza kwakho.

⁶ Mina-ke sengilungele ukuphalaka njengomhlabelo; isikhathi sami sokugoduka sesifikile.

⁷ Ngilwile ukulwa okuhle, ngiliqedile ibanga lami, ngilondile ukukholwa.

⁸ Kwanje sengibekelwe isihlohlo sokulunga iKosi emgwebi olungileko ezanginikela sona mhlokho; kungasingimi kwaphela kodwana nabo boke abalangazelela ukubonakala kwayo.

Isibawo sokugcina

⁹ Yenza msinyana uze lapha uzongibona

¹⁰ ngombana uDemasi ngokuthanda zephasi lanamhlanje, ungitjhiyile waya eThesalonika; uKresikesi uye eGalatiya, uTitosi eDalimathiya.

¹¹ NguLukasi kwaphela engihlezi naye. Uthathe uMarkosi uze naye lapha ngombana ulisizo emsebenzinami.

¹² UThirhikhu ngimthume e-Efesu.

¹³ Nawuzako, ungiphathele isambatho sami engasitjhiya kuKaripo eTrowasi. Yewungiphathele neencwadi zami, khulukhulu imisongo.

¹⁴ Kambe u-Alekzandra, umkhandi wedzila wangenzela phasi; iKosi iyombuyisela ngemisebenzakhe.

¹⁵ Umlemuke nawe ngombana wajamelana khulu namezwi wethu.

¹⁶ Akakho noyedwa owangisekelako mhlana ngiziphendulela kokuthoma ekundleni, kodwana boke bangisukela; kwanga lokho angeze kwabalelwa kibo.

¹⁷ Kodwana iKosi yaba nami yangipha amandla ukuze kumenyezelwe ngami umlayezo ngokupheleleko nabatjhili boke bawuzwe. Ngalokho ngephulwa emlonyeni webhubezi.

¹⁸ IKosi iyongihlenga ingikhuphe kikho koke okumbi, ingise embuswenayo wezulwini ngiphephile. Akube kiyo iphazimulo ngokungapheliko. Amen.

Ukulayelisa nesibusiso

¹⁹ Ungilotjhisele kuPriska no-Akhwila kanye nendlu ka-Onesiforu.

²⁰ U-Erastu wasala eKorinte, uTrofimu yena ngamtjhiya agula eMiletu.

²¹ Yeke phuthuma uze lapha ubusika bungakangeni! Bayakulotjhisa abo-Ebhulu noPudesi, uLinusi, uKlawudiya nabo boke abazalwana.

²² IKosi ayibe nommoyakho. Umusa weKosi ube nani noke!