2 UTHIMOTHI 3 - IsiNdebele 2012 Translation

Ubuhlongandlebe ngemihla yokuphela

¹ Yazi lokhu bona ngemihla yokuphela kuzokufika iinkhathi ezibudisi kwamambala.

² Abantu bazakuba ngabazithandako, abathanda imali, abazikhukhumezako, abazigqajako, abahlambalazako, abangalaleli ababelethi, abangathokoziko, abangakahlanzeki,

³ abanganathando, abangavumi ukubuyisana, abahlebako, abangazigobiko, abakhohlakeleko, abahloye okuhle,

⁴ abakhaphelako, abawalazelako, abazitjhayako, abathanda injabulo kunobanyana bathande uZimu;

⁵ banesimilo sokwesaba uZimu khisibe baphika amandla wakhona. Abanjalo ubaphephe.

⁶ Kilabo kunabakhukhutha bangene izindlu bafike bathumbe besifazana abanyariyako, abadiselwa zizono zabo nabaphethwe ziinkanuko ezahlukeneko;

⁷ bahlala bafundiswa, kodwana abafiki ekulazini iqiniso.

⁸ NjengoJanesi noJambresi bajamelana noMosi, ngokunjalo nalabo bajamelene neqiniso; kubabantu abanemikhumbulo eyonakeleko, bahlulekile ekukholweni.

⁹ Kodwana angeze bathuthuka ngombana njengendabeni yamadoda amabili la, ubudlhayela babo buzakuba setjhatjhalazini kibo boke.

Ukuyala kokugcina

¹⁰ Nje-ke wena wayilandela ifundiswami, ukuziphatha kwami, ihloswami yepilo, ukukholwa kwami, ukunyamezela kwami, ithando lami, ukuqinisela kwami,

¹¹ ukuzunywa nokutshwenywa okwangehlela e-Anthiyorhiya, e-Ikhoniyo neListra. Ukuzunywa okunje ngakunyamezelela begodu iKosi yangihlenga kikho koke lokhu.

¹² Mbala, boke abathanda ukuphila ipilo emsulwa kuKrestu Jesu bazakuzunywa.

¹³ Kodwana iinkhohlakali nabakhohlisi bazakuragela phambili ebumbini, badukisa nabo badukiswa.

¹⁴ Kodwana wena kakarela kilokho okufundileko nakilokho onesiqiniseko ngakho, ukwazi bona ukufunde kubani.

¹⁵ Kwebuntwaneni wayazi imitlolo ecwengileko enamandla yokukupha ukuhlakanipha kube kusindiswa ngokukholwa kuKrestu Jesu.

¹⁶ Yoke imitlolo iphefumulelwe nguZimu, begodu ilungele ukufundisa, ukukhalima, ukunqophisa imitjhapho nokuyala ekulungeni,

¹⁷ khona umuntu kaZimu azakufanela bona abe ngolungele ukwenza yoke imisebenzi emihle.