2 UTHIMOTHI 2 - IsiNdebele 2012 Translation

Ibutho elithembekileko lakaKrestu Jesu

¹ Nje-ke wena ndodanami, qina emseni okuKrestu Jesu.

² Lokho owangizwa ngikufundisa phambi kwabofakazi abanengi, kudlulisele ebantwini abathembekileko abazakwazi nabo ukukufundisa abanye.

³ Hlanganyela ekuhluphekeni njengebutho elihle lakaKrestu Jesu.

⁴ Akakho ophuma ipi khisibe usazilibazisa ngokwekhaya; ibutho liphikelela ukuthokozisa indunalo.

⁵ Ngokunjalo ophalisanako akathunjiswa unongorwana angakaphalisani ngokomthetho.

⁶ Umlimi ozibulalisa ngokulima, nguye ekufanele amukele maqangi iinthelo.

⁷ Yelela engikutjhoko ngombana iKosi izakunikela ilemuko ezintweni zoke.

⁸ Khumbula uJesu Krestu owavuswa kabafileko ongowomlibo kaDavida, ngokwevangeli lami

⁹ engihlupheka ngalo kufikela lapha ngabotjhwa khona njengeselelesi. Kodwana ilizwi lakaZimu alikabotjhwa lona.

¹⁰ Ngalokho nginyamezelela koke ngebanga labakhethiweko ukuze nabo bamukeliswe isindiso ekuKrestu Jesu kanye nephazimulo yanini nanini.

¹¹ Siliqiniso isitjho esithi: “Nangabe safa naye sizokuphila naye godu.

¹² Nasinyamezelako sizakubusa naye, nangabe siyamphika naye uyosiphika.

¹³ Nangabe asikathembeki, yena uyokuhlala njalo athembekile ngombana angekhe aziphika.”

Isisebenzi esithembekileko

¹⁴ Bakhumbuze ngalokho, ubakhalimele phambi koZimu bona bangaphosani ngamezwi ngombana akusizi ngalitho, kodwana kukhubekisa abalaleli.

¹⁵ Khuthalela bona uziveze kuZimu uthembekile, usisebenzi esingananhloni, esifundisa ilizwi leqiniso ngokutjhejisisa.

¹⁶ Ikulumo elilize nesilapheleko iphayele ngeqadi ngombana ithuwelelisa abantu ekoneni.

¹⁷ Ukukhuluma kwabo kuzakuba njengesilonda esibhibhidlhako. Phakathi kwabo nguHimenewu noFileto,

¹⁸ abaphaphalaze eqinisweni ngokuthi bathi ukuvuka kwabafileko sekwadlula, batjhabalalise nokukholwa kwabanye.

¹⁹ Nokho isisekelo sakaZimu sinzinzile, sinephawu elithi: “USomnini uyabazi labo ekungebakhe,” nokuthi: “Ngiloyo naloyo obiza ibizo leKosi akadede ebukhohlakalini.”

²⁰ Ngendlini ekulu kunezitja ekungasizo zegolide nesiliva kwaphela, kodwana zekhuni nezomdaka. Ezinye zisetjenziselwa okukhethekileko ezinye okujayelekileko.

²¹ Ngalokho nangabe umuntu uyazihlanza ezintwenezo, uzakuba sisitja esihloniphekileko esinobuphulukelo kumniniso nesilungele yoke imisebenzi emihle.

²² Balekela iinkanuko zobutjha, utjhisekele ukulunga, ukukholwa, ithando nokuthula, kanye nalabo ababiza iKosi ngehliziyo emsulwa.

²³ Iinkulumo zobudlhayela nokuphikisana okunganalwazi ukuphephe ngombana uyazi bona lokho kubanga ukurarana.

²⁴ Isisebenzi seKosi asikafaneli sibe nenturhu, kodwana asibe nomusa kibo boke nelisu lokufundisa, sinyamezele,

²⁵ sisole abaphikisana naso ngesizotha, mhlamunye uZimu angahle abaphe ithuba lokuphenduka balazi iqiniso.

²⁶ Iye, bangahle baphephe esifini sakaSathana ababanjwe kiso ngokuthunjwa kokwenza intando yakhe.