2 UTHIMOTHI 1 - IsiNdebele 2012 Translation

Ukulotjhisa

¹ UPowula umpostoli wakaKrestu Jesu ngokwentando kaZimu ngokuya ngeenthembiso zepilo kuKrestu Jesu,

² kuThimothi, indodanami ethandekako. Akube mumusa, isirhawu nokuthula kwakaZimu uBaba noKrestu Jesu iKosethu.

Ukuqina isibindi nokungabi neenhloni

³ Ngiyamthokoza uZimu engimlotjha ngesazelo esimsulwa njengombana abokhokho bami gade basenza. Ngikukhumbula njalo emithandazwenami emini nebusuku.

⁴ Ngokukhumbula iinyembezi zakho, ngilangazelela ukukubona khona ihliziywami izakuzala ithabo.

⁵ Godu ngikhunjuzwa ukukholwa kwakho kweqiniso, iye, ukukholwa okwathoma kwaba kugogwakho uLowisi nonyoko uYunike, engineqiniso bona kuhlezi kuwe.

⁶ Ngalokho ngiyakukhumbuza bona uvuselele isiphiwo sakaZimu esikuwe ngokubekwa izandla zami

⁷ ngombana uZimu akhange asiphe ummoya wobutjhatjha, kodwana wamandla, wethando nowokuzikhalima.

⁸ Nje-ke ungabi neenhloni ngokufakaza ngeKosi nangami mina sibotjhwa sayo, kodwana hlanganyela nami ebuhlungwini ngebanga levangeli, uzeyame ngamandla kaZimu,

⁹ owasisindisa bewasibiza ngebizo elicwengileko, kungasi ngemisebenzi yethu kodwana ukuya ngokwehloso nomusa wakhe. Umusa lo sanikelwa wona ngoKrestu zingakabi ukuba khona iinkhathi,

¹⁰ kodwana kwanjesi sewambulelwe ngokufika koMsindisi wethu uKrestu Jesu, owaqeda ukufa waletha ukuphila nokungabhubhi ekukhanyeni ngevangeli.

¹¹ Ngebanga levangeli ngakhethwa bona ngibe mtjhumayeli, mpostoli nomfundisi;

¹² kungalokho ngisebunzimeni obungaka. Nokho-ke anginanhloni ngombana ngiyamazi loyo engikholwa kuye, begodu ngiyethemba bona unamandla wokulonda lokho okubekwe kimi bekube mhlokho.

¹³ Bambelela esifundweni esiphilileko owasizwa kimi ngokukholwa nangethando elikuKrestu Jesu.

¹⁴ Okuhle okubekwe kuwe, kulonde ngoMoya oCwengileko ohlala kithi.

¹⁵ Uyazi bona boke abase-Asiya sebangihlanukele, ngitjho aboFigelo no-Erimogenesi.

¹⁶ Kwanga iKosi ingaba nomusa endlini ka-Onesiforu ngombana bephele angivusela begodu angananhloni ngami njengombana bengibotjhiwe.

¹⁷ Iye, lokha nakaseRoma wangibhudula bewangifunyana.

¹⁸ Kwanga iKosi ingenza kobana azuze umusa weKosi mhlokho! Begodu nawe wazi kuhle bona kungangani alotjha ngakho e-Efesu.