2 USAMYELA 8 - IsiNdebele 2012 Translation

Izipi nombuso kaDavida

¹ Kwathi emva kwalokho uDavida wamadlha amaFilista; wawalawula ngokuwathathela iintambo zokubusa ezandleni zawo.

² Waragela phambili wamadlha nebakwaMowabi. Wabalalisa umjeje phasi ehlabathini wabalinganisa ngentambo. Boke abalinganiseka ngobude bentambo kabili bebabulawa bese kuthi abalinganiseke kanye baliswe. Yeke amaMowabi asebenzela uDavida abe aletha nemithelo kuye.

³ Ngaphezu kwalokho uDavida wamadlha noHadadi-Ezeri umsa kaRerhobi ikosi yeTsoba lokha uHadadi-Ezeri nasathi ubuyisa amandlakhe wokulawula iindawo ezimagegana nomlambo iYufrathe.

⁴ UDavida wathumba kuHadadi-Ezeri amajoni weenyawo aziinkulungwana ezimatjhumi amabili nabakhweli abayikulungwana namakhulu alikhomba. Wakhupha ikhulu lesipani seenjomani zeenkarana kwathi eziseleko waziqunta imisipha yeenqatha.

⁵ Kwathi lokha ama-Arami weDamaseku nezako bona asize uHadadi-Ezeri ikosi yeTsoba, uDavida warhadla phasi iinkulungwana ezimatjhumi amabili nambili zawo.

⁶ Wajamisa iinqhema zamajoni embusweni wama-Arami eDamaseku. Ama-Arami asebenzela uDavida abe aletha nemithelo kuye. USomnini wapha uDavida ukuhlula koke lapha akhamba khona.

⁷ UDavida wathatha iinlanda zegolide egade kungezeenduna kaHadadi-Ezeri waziletha eJerusalema.

⁸ Ikosi uDavida yathatha idzila enengi eBhetharhi neBherothayi ekumimizi egade ingekaHadadi-Ezeri.

⁹ Lokha uToyi ikosi yeRhamathi ezwa bona uDavida uhlule loke ibutho lakaHadadi-Ezeri,

¹⁰ wathumela uJoramu indodanakhe kuDavida ukumbingelela nokumkwakwazela ekuhluleni kwakhe ipi kaHadadi-Ezeri ngombana uHadadi-Ezeri bekahlala alwa naye. UJoramu waphathela uDavida izipho zesiliva, igolide kanye nedzila.

¹¹ UDavida wanikela ngeziphezo kuSomninini njengombana bekenzile ngesiliva negolide agade alithumbe kizo zoke izizwe azihlulileko.

¹² Izizwezi gade kuma-Arami, amaMowabi, ama-Amoni, amaFilista kanye nama-Amalekhi. Wanikela nangepango ayifunyene kuHadadi-Ezeri umsa kaRerhobi ikosi yeTsoba.

¹³ Ekubuyeni kwakaDavida epini, wamadlha iinkulungwana ezilitjhumi nobunane zama-Edomu ngemRhobeni weTswayi. Lokhu kwamenza waduma khulu.

¹⁴ Wajamisa iinqhema zamajoni kilo loke lakwa-Edomu. Ama-Edomu woke amsebenzela. USomnini wapha uDavida ukuhlula koke lapha akhamba khona.

¹⁵ UDavida wabusa phezu kwaka-Israyeli woke, wagweba ngokulungileko boke abeza kuye ngemiraro.

¹⁶ UJowabi umsa kaTseruya gade amphathi webutho; uJehotjhafathi umsa ka-Arhiludi kungusosiba;

¹⁷ uTsadokhi umsa ka-Arhithubi no-Arhimeleki umsa ka-Abiyatari bekubaphristi; uSeraya angumabhalana;

¹⁸ uBhenaya umsa kaJehoyada gade aphethe amaKereti namaPeleti; abesa bakaDavida nabo bebabaphristi.