2 USAMYELA 6 - IsiNdebele 2012 Translation

UDavida uletha umfaji wesivumelwano eJerusalema

¹ UDavida wabuya godu wahlanganisa boke abakhethiweko kwa-Israyeli, baba ziinkulungwana ezimatjhumi amathathu sebaboke.

² UDavida wasuka nabo boke abantwabo bakhamba bayokuthatha umfaji kaZimu eBhala kwaJuda. Umfaji lowo ungodumileko. Ubukhona bakaSomnini uMninimandlawoke buhlala emfajinapho hlangana namakerubhi.

³ Bakhweza umfaji kaZimu phezu kwekoloyana etja, bawukhupha endlini ka-Abinadaba ebigade iphezu kwentatjana. U-Uza no-Arhiyo abantwanabomntwana ka-Abinadaba batjhayela ikoloyana etja leyo

⁴ ithwele umfaji kaZimu. U-Arhiyo wakhamba pambi kwayo hlanu kweenkomo.Bawuthatha njalo-ke umfaji kaSomnini endlini ka-Abinadaba.

⁵ UDavida nendlu yoke yakwa-Israyeli bebathabile phambi kwakaSomnini, bancinza imihlobohlobo yamaharibha eyenziwe ngesigodo somsayipurusi, balilisa abosotjherere, amafahlawana neewahlo.

⁶ Kuthe nabafika eselelweni seNakhoni, u-Uza welula isandla wabamba umfaji kaZimu ngombana ikoloyana yakhahlumezeka lokha iinkomo nazifika edwalenapho.

⁷ Ubukhali bakaSomnini bavuthela u-Uza ngebanga lesenzo sakhe sokungahloniphi; ngebangelo uSomnini wamumadlha phasi wafela khonapho eqadi komfaji kaZimu.

⁸ UDavida wakhathazeka ngebanga lokobana uSomnini aphahlaze u-Uza. Yeke wathiya indawo leyo bona yiPeretsi-Uza. Ibizwelo lisajamile nanamhlanjesi.

⁹ Mhlokho uDavida wesaba uSomnini bewadlumbana wathi: “Alo, ngingawusa njani umfaji kaSomnini kwami?”

¹⁰ Ngalokho gade angakazimiseli bona athathe umfaji kaSomnini ubenaye eMzini kaDavida. Kunalokho, wawuphambukisa wawusa endlini ka-Obede-Edomu umGathi.

¹¹ Umfaji kaSomnini wahlala iinyanga ezintathu endlini ka-Obede-Edomu umGathi. USomnini wambusisa nendlwakhe yoke.

¹² Ikosi uDavida yabikelwa bonyana uSomnini ubusise indlu ka-Obede-Edomu nakho koke anakho ngebanga lomfaji kaZimu. Yeke uDavida wehla wakhuphula umfaji kaZimu endlini ka-Obede-Edomu wawuletha eMzini kaDavida ngethabo.

¹³ Kwathi lokha abathwele umfaji kaSomnini sebathethe amagadango asithandathu, wanikela ngekunzi nangekonyana elinonisiweko.

¹⁴ UDavida gade embethe iphuraphura yomphristi kwaphela. Wahlaba iinsondo phambi kwakaSomnini ngokuzimisela okukhulu.

¹⁵ Ngaleyondlela uDavida nendlu yoke yakwa-Israyeli bakhuphula umfaji kaSomnini ngetjhada lokuvuma nangokuliliswa kwepalapala.

¹⁶ Kuthe lokha umfaji kaSomnini nawungena eMzini kaDavida, uMikali indodakazi kaSawula wabukela ahlole ngefesidere. Uthe nabona ikosi uDavida athamba, agida phambi kwakaSomnini, wamnyaza.

¹⁷ Baletha umfaji kaSomnini ngetendeni uDavida agade alihlomele wona, bawubeka endaweni ekhethekileko. UDavida wanikela ngomhlabelo wokutjhiswa nangomhlabelo wetjhebiswano phambi kwakaSomnini.

¹⁸ Emva kobana aqedile ngemihlabelo leyo, wabusisa abantu ebizweni lakaSomnini uMninimandlawoke.

¹⁹ Omunye nomunye esiqubuthwini sakwa-Israyeli, amadoda nabafazi, waphiwa isikwa esindulungu, amakwapa wesundu namakwapa wamadiribe. Abantu baphadlhalala-ke, babuyela emakhaya.

²⁰ Kuthe lokha uDavida nabuyela ekhaya bona abusise indlwakhe, uMikali indodakazi kaSawula waphuma bona amhlangabeze, wamtshima wathi kuye: “Ikosi yama-Israyeli yazibonakalisa-ke namhlanjesi! Yazineka bhunubhunu phambi kwamakhobokakazi weenceku zayo kanjengombana bekuzokwenza omunye nomunye umuntu ongazisiko.”

²¹ UDavida wathi kuMikali: “Bengigida phambi kwakaSomnini owakhetha mina kunokobana akhethe uyihlo nanyana omunye wendlu yakhe. Ngigide ngombana uSomnini ajamisa mina bona ngibe mbusi wesizwe sakhe, u-Israyeli.

²² Ngisazozehlisa khulu kunalokhu, bengizilulaze: Ngizozehlisa ngamakhobokakazi okhulume ngawo la, ngihlonipheke kiwo.”

²³ UMikali indodakazi kaSawula akhange abe nomntwana bekwaba sekufeni kwakhe.