2 USAMYELA 5 - IsiNdebele 2012 Translation

UDavida uba yikosi yakwa-Israyeli

¹ Zoke iinkoro zakwa-Israyeli zeza kuDavida eRhebroni zathi: “Siziingazi zakho.

² Eenkhathini ezidlulileko, uSawula asese yikosi phezu kwethu, nguwe ogade udosa u-Israyeli ukuya epini. USomnini wathi kuwe, ‘Nguwe ozakwelusa abantu bami u-Israyeli begodu nguwe ozakubusa u-Israyeli.’ ”

³ Ngaleyondlela boke abaphathi bakwa-Israyeli beza ekosini uDavida eRhebroni. UDavida wenza nabo isivumelwano eRhebroni phambi kwakaSomnini; base bayamzesa waba yikosi phezu kwaka-Israyeli.

⁴ UDavida gade anamatjhumi amathathu weminyaka lokha naba yikosi, wabusa amatjhumi amane weminyaka.

⁵ ERhebroni wabusa uJuda iminyaka elikhomba neenyanga ezithandathu, kwathi eJerusalema wabusa phezu kwaka-Israyeli woke noJuda iminyaka ematjhumi amathathu nantathu.

UDavida uthumba iJerusalema

⁶ Ikosi uDavida nabantu bakhe baya eJerusalema bona basahlele amaJebusi ahlala lapho. AmaJebusi arhuwelela uDavida athi: “Awuzukungena la; ngitjho iimphofu neenrhole zizokukhandela lula.” Ngalokho bebazitjela bonyana uDavida angeze angena lapho.

⁷ Khonapho, uDavida wathumba ubuphephelo beZiyoni, okwathi ngemva kwesikhathi baba muMuzi kaDavida.

⁸ Mhlokho, uDavida wathi: “Woke ofuna ukuhlula amaJebusi, kuzakufanela bona asebenzise umsele wamanzi.” UDavida wayihloya ikulumo ethi: “Iinrhole neemphofu zizokukhandela lula.” Ngikho-nje kuthiwa: “Iimphofu neenrhole azizukungena ethempelini.”

⁹ UDavida wathuthela ebuphephelweni, wabubiza bona muMuzi kaDavida. Wakha izindlu ukusukela endundumeni ezombeleze ubuphephelo ukuya emthangaleni wedorobho.

¹⁰ Waragela phambili wakhula ngamandla ngombana uSomnini uMninimandlawoke gade anaye.

¹¹ URhiramu ikosi yeTirosi wathumela iinthunywa kuDavida kanye neengodo zomsedari nababazi, nabakhi ngelitje; bakhela uDavida isigodlo.

¹² UDavida walemuka bona uSomnini umjamise waba yikosi phezu kwaka-Israyeli, nokobana uphakamise umbuswakhe ngebanga labantu bakwa-Israyeli.

¹³ Emva kokobana uDavida asuke eRhebroni, wathatha imingena eminye nabafazi eJerusalema, wabelethelwa amadodana namadodakazi amanye.

¹⁴ Lawa mabizo wabantwana abelethelwa bona lapho: UTjhamuwa, uTjhobabi, uNathani, uSolomoni,

¹⁵ uYibhurhari, u-Elitjhuwa, uNefegi, uJafiya,

¹⁶ u-Elitjhama, u-Eliyada no-Elifelethi.

UDavida uhlula amaFilista

¹⁷ Kwathi lokha amaFilista nezwa bona uDavida uzeswe bonyana abe yikosi yakwa-Israyeli, aphuma woke ayomzuma. Kodwana uDavida wezwa ngalokho waya ebuphephelweni.

¹⁸ Lokha amaFilista nasabalala emRhobeni waBezimu,

¹⁹ uDavida wabuza uSomnini wathi: “Ngingawasahlela amaFilista na? Uzawanikela ezandleni zami?” USomnini wamphendula wathi: “Iye khamba, ukuwanikela ngizawanikela amaFilista ezandleni zakho.”

²⁰ Yeke uDavida waya eBhali-Peratsimu, wawahlula lapho amaFilista, bewathi: “USomnini urhurhule izitha zami njengamanzi agobhoza arhurhule koke.” Ngebangelo, indawo leyo yabizwa bona yiBhali-Peratsimu.

²¹ AmaFilista atjhiya abosingazimu bawo lapho, uDavida nabantu bakhe babadobha.

²² Godu amaFilista akhuphuka asabalala ngemRhobeni waBezimu.

²³ UDavida wabuza uSomnini, yena wamphendula wathi: “Unganqophi kibo, kodwana bazombe ngemuva bese ubasahlela ngaphambi kwemithi yebhalisamu.

²⁴ Masinyana-nje nawizwa itjhada lamagadango ngaphezu kwemithi yebhalisamu, rhaba ngombana uSomnini uzabe akhamba phambi kwenu ukumadlha ipi yamaFilista.”

²⁵ UDavida wenza njengombana uSomnini amyalile, wamadlha amaFilista indlela yoke kusukela eGeba ukuya eGezeri.