2 USAMYELA 3 - IsiNdebele 2012 Translation

¹ Ipi hlangana nendlu kaSawula nendlu kaDavida yathatha isikhathi eside. UDavida waya ngokuya akhula emandleni, indlu kaSawula yaya ngokuya iphelelwa mamandla.

Amadodana kaDavida

² UDavida wabelethelwa amadodana eRhebroni: Izibulo lakhe ku-Arhinowami weJizriyela bekungu-Amnoni;

³ yesibili nguKiliyabu ku-Abigeyili umfelokazi kaNabhali weKarameli; yesithathu kungu-Absalomu kuMakha, indodakazi kaTalimayi ikosi yeGetjhuri;

⁴ yesine ngu-Adoniya kuRhagithi; yesihlanu kunguTjhefathiya ku-Abitala;

⁵ yesithandathu kunguYitriyamu, emfazini kaDavida u-Egila.

U-Abineri uzihlanganisa noDavida

⁶ Ngesikhathi kusekhona ipi phakathi kwendlu kaSawula nendlu kaDavida, u-Abineri waqinisa isikhundla sakhe endlini kaSawula.

⁷ USawula gade anomngena, ibizo lawo bekunguRitsipha indodakazi ka-Aya. U-Itjhi-Bhotjhethi wabuza u-Abineri wathi: “Ungeneleni emabhayini nekhohlo lakababa na?”

⁸ U-Abineri wasilingeka khulu ngombuzo ka-Itjhi-Bhotjhethi, bewaphendula wathi: “Udlumbana bona mina ngikhotha uJuda na? Kusukela ekuthomeni ngithembekile endlini kayihlo uSawula, nakubafowabo nebakhozini bakhe, nawe akhange ngikunikele kuDavida. Alo, wena namhlanje ungibeka umlandu ngomfazi tle!

⁹ UZimu uyangizwa, dumbana ngife mina Abineri, nangingenzi njengombana uSomnini athembisa uDavida, wathi,

¹⁰ ‘Ngizokususa umbuso endlini kaSawula, ngijamise isihlalo sobukhosi bakaDavida phezu kwaka-Israyeli noJuda, kusukela kwaDani ngetlhagwini bekube seBheritjheba ngesewula.’ ”

¹¹ U-Itjhi-Bhotjhethi akhange asaba nesibindi sokukhupha ilizwi ku-Abineri ngombana gade amesaba.

¹² U-Abineri wathumela iinthunywa zakhe kuDavida bona zifike zithi: “Inarha le akusingeyakho yoke na? Wena yenza isivumelwano nami, mina ngizakusiza ukubuyisa woke u-Israyeli bona abe ngakuwe.”

¹³ UDavida wathi: “Kulungile, ngizakwenza isivumelwano nawe. Kodwana kunye engikufuna kuwe: Ungezi kimapha, nawungezi noMikali indodakazi kaSawula, lokha nawuzongibona.”

¹⁴ UDavida wathumela iinthunywa ku-Itjhi-Bhotjhethi, wathi: “Nginikela umkami uMikali, engazizuzela yena ngekhulu lamajwabu wamaFilista.”

¹⁵ Nje-ke u-Itjhi-Bhotjhethi wakhupha umyalo bona uMikali asuswe emyeninakhe uPaltiyeli umsa kaLayitjhi.

¹⁶ UPaltiyeli wakhamba nomkakhe, wamlandela ngemuva indlela yoke alila, bekwaba seBharhurimu. Yeke u-Abineri wathi kuye: “Buyela ekhaya!” Wajika-ke.

¹⁷ Kuthe kusesenjalo, u-Abineri wakhuluma nabaphathi bakwa-Israyeli wathi: “Sekusikhatjhana nifuna ukubeka uDavida bona abe yikosenu.

¹⁸ Yeke, kwenzeni-ke lokho! Angithi uSomnini wathembisa uDavida wathi, ‘Ngencekwami uDavida ngizakusindisa abantu bami u-Israyeli ezandleni zamaFilista nezandleni zezitha zabo zoke.’ ”

¹⁹ U-Abineri waya ngokwakhe wayokukhuluma nebakwaBhenjamini. Kwathi emva kwalokho waziyela yena kuDavida eRhebroni, wamhlebela uDavida bonyana woke u-Israyeli nendlu yoke yakwaBhenjamini bayavuma bona abe yikosi.

²⁰ U-Abineri wafika namadoda amatjhumi amabili kuDavida eRhebroni. UDavida wabenzela umgidi.

²¹ U-Abineri wathi kuDavida: “Kosami, yithi ngikhambe ngiyokubiza woke u-Israyeli ahlangane ekosinamapha ukuze enze isivumelwano nekosi bese ikosi ibusa phezu kwenarha yoke eyithandako.” Nje-ke, uDavida walayelisana no-Abineri; bahlukana ngokuthula.

U-Abineri uyabulawa

²² Khonokho ngemva kobana u-Abineri ahlukene noDavida ngokuthula eRhebroni, kwafika uJowabi neviyo lakaDavida. Bebabuya ukuyokusahlela, beza nepango enengi.

²³ Kwathi bona uJowabi namabutho woke agade anaye bafike, watjelwa kwathiwa: “Kazi u-Abineri umsa kaNeri gade eze ekosini, ikosi imlisile wakhamba, bahlukana ngokuthula.”

²⁴ Nje-ke uJowabi waya ekosini wafese wathi: “Yendoda! Walisa inyoni yaphapha? Qala u-Abineri gade akuwapha. Alo, umliseleni akhambe? Ukhambile-ke!

²⁵ Uyamazi u-Abineri umsa kaNeri loya, gade azele ukuzozihlolisa nokuzokuqala imikhambakho ukuze afunyane koke okwenzako.”

²⁶ Kuthe bona uJowabi ahlukane noDavida, wathumela iinthunywa zalandela u-Abineri, zambuyisa asele asemthonjeni womunga. Kodwana uDavida gade angazi litho ngalokho.

²⁷ Kwathi lokha u-Abineri nafika eRhebroni, uJowabi wamdosela ngeqadi kwesango, yaba sengathi uyokukhuluma naye ngemsitheleni. Khonapho, wamhlaba emathunjini wafa. Lokhu wakwenza abuyiselela ukufa komfowabo u-Asayeli.

²⁸ Emva kokobana kwenzekile lokho, uDavida wezwa, bewathi: “Bekube nini nanini, mina nombuswami, asinamlandu phambi kwakaSomnini ngeengazi zaka-Abineri umsa kaNeri.

²⁹ Kwanga iingazi zakhe zingawela ezandleni zakaJowabi nendlini yoke kayise! Kwanga indlu kaJowabi ingeze yahlala inganamuntu onenjovela, olunyiweko, onekhwekhwe, orholopheleko nofela epini nanyana otlhoga ukudla.”

³⁰ (Vele uJowabi nomnakwabo u-Abitjhayi babulala u-Abineri ngombana naye wabulala u-Asayeli umfowabo epini eGibiyoni.)

³¹ Yeke uDavida wathi kuJowabi nebantwini boke agade anabo: “Tlebhulani izambatho zenu nembathe iinzilo nikhambe nilila phambi kwaka-Abineri.” Ikosi uDavida ngekwayo yakhamba ngemva komkghadi.

³² Bangcwaba u-Abineri eRhebroni. Ikosi uDavida yahlaba isililo ethuneni laka-Abineri, nabantu boke balila nayo.

³³ Ikosi yakhalela ingoma yesililo ngo-Abineri, yathi: “Abineri, ufeleni njengesidlhadlha?

³⁴ Izandla zakho bezingakabotjhwa, neenyawo zakho zingakakinatwa. Uwe njengomuntu owa phambi kwabantu abakhohlakeleko.” Isizwe soke sarhahlawula ngo-Abineri.

³⁵ Yeke boke abantu beza bancenga uDavida bona adle intwanyana kusesemini; kodwana uDavida wenza isifungo wathi: “NgoZimu ngiqinisile ngithi, akunanto engizayinuka ilanga lingakatjhingi.”

³⁶ Boke abantu bakubona lokho bathaba; yoke into eyenziwa yikosi yabathabisa tle.

³⁷ Nje-ke mhlokho boke abantu, iye u-Israyeli woke wazi bona ikosi gade inganasandla ekubulaweni kwaka-Abineri umsa kaNeri.

³⁸ Ikosi uDavida yathi eviyweni layo: “Kuyabonakala bonyana kuwe ikosana nomuntu omkhulu kwa-Israyeli namhlanjesi.

³⁹ Nanyana ngiyikosi ezesweko namhlanje, nokho ngisesebuthakathaka kobana ngingajamelana namadodana kaTseruya. USomnini uzakubuyisela umenzi wesono njengokwezenzo zakhe ezimbi.”