2 USAMYELA 23 - IsiNdebele 2012 Translation

Ingoma ethi “Amezwi wokugcina wakaDavida”

¹ Le yingoma yokugcina eyathonywa nguDavida: Ikulumo kaDavida umsa kaJese, ikulumo yendoda eyaphakanyiswa khulu; indoda ezeswe nguZimu kaJakopo, umtloli weengoma ezihle khulu kwa-Israyeli.

² UMoya kaSomnini wakhuluma ngami; amezwakhe gade aselimini lami.

³ UZimu ka-Israyeli wakhuluma, iDwala laka-Israyeli lathi kimi: Obusa abantu ngokulunga, obusa ngokwesaba uZimu,

⁴ ufana nomkhanyo wokuphuma kwelanga ekuseni elinganalifu, unjengomkhanyo wokwembula kwezulu elivuselela utjani ehlabathini.

⁵ Ukubusa kwami kukhambisana nentando kaZimu; wenze isivumelwano esingapheliko nami, esiqinileko nesingasoze sephulwa.

⁶ Kodwana abambi bafana nesithukghu sameva esisitjhulweko: Asithintwa ngezandla.

⁷ Ofuna ukusiwola usebenzisa isikghopholo nanyana umphini womkhonto, sitjhiswa besilahlelwe khonapho.

Iingorho zakaDavida

⁸ Lawa mabizo weengorho zakaDavida: UJotjheba-Bhasitjhebethi umTarhikemoni gade amrholi wesiqhema sabathathu esaziwako. Wabulala abantu abamakhulu abunane ngesilembe ngehlandla linye.

⁹ Ingorho yesibili kwakungu-Eliyazari umsa kaDodo umArhorhi. Wabengomunye wesiqhema sabathathu ebegade sinoDavida mhla batjhijila amaFilista nahlangene ukuyokulwa. Abantu bakwa-Israyeli babaleka,

¹⁰ kodwana yena wajama wamadlha amaFilista isandla sakhe besakokorana phezu kwesabula. USomnini wehlisa ukuhlula okukhulu mhlokho. Amabutho abuyela ku-Eliyazari arhabele ukuyokukhuthuza iindumbu kwaphela.

¹¹ Ingorho yesithathu kwakunguTjhama umsa ka-Agiye umHarari. AmaFilista ahlangana eLerhi lapha gade kunesimu yeenhlumaya khona. Kwathi lokha amabutho wakwa-Israyeli nabaleka amaFilista,

¹² uTjhama yena waba nesibindi, wajama phakathi kwesimu. Wayivikela, wamadlha phasi amaFilista ngapha nangapha. USomnini wakwehlisa njalo-ke ukuhlula okukhulu.

¹³ Godu kwakunesiqhema samatjhumi amathathu. Ngesikhathi sokuvuna, kwaphuma iingorho ezintathu kezimatjhumi amathathu zeza kuDavida erharheni le-Adulamu, khonapho ipi yamaFilista yayihlome emRhobeni wabeZimu.

¹⁴ Ngesikhatheso uDavida gade aserholweni, umkhambathi wamaFilista useBhethe-Lehema.

¹⁵ UDavida womela amanzi wathi: “Uthi ngomile na, inga kungaba nomuntu ongayongikhelela amanzi wokusela emthonjeni ohlanu kwesango leBhethe-Lehema!”

¹⁶ Nje-ke iingorho ezintathu kezimatjhumi amathathu zaratha phakathi kwamaFilista zayokukha amanzi emthonjeni ohlanu kwesango leBhethe-Lehema zawaletha kuDavida. Kodwana uDavida wala ukuwasela, esikhundleni salokho, wawathulula phambi kwakaSomnini wathi:

¹⁷ “Kosami, angeze bengithome! Kuzakuba ngathi ngisela iingazi zabantu abadele ukuphila kwabo.” Yeke uDavida azange asawasela. Zazinjalo-ke iindaba zeengorho ezintathwezi.

¹⁸ U-Abitjhayi umnakwabo kaJowabi umsa kaTseruya bekayikulu yesiqhema samatjhumi amathathu. Wabulala abantu abamakhulu amathathu ngomkhonto. Ngalokho waduma njengeengorho ezintathu ezakhelela uDavida amanzi.

¹⁹ Waduma khulu bewadlula iingorho ezimatjhumi amathathu. Waba yindunazo, kodwana idumo lakhe azange lidlule lezintathu zokuthoma.

²⁰ UBhenaya weKhabitsiyeli umsa kaJehojada isihlabani sengorho, gade adume ngezinto ezinengi. Wamadlha amadoda amabili okuthiwa “mabhubezi wakwaMowabi.” Nguye godu owangena ngemgodini wabulala ibhubezi mhlana kukhithika igabhogo.

²¹ Godu wamadlha itsitsirimba yomGibhide. UmGibhide wabephethe umkhonto, kodwana uBhenaya wamdumela kunjalo ngentonga. Wahluthula umkhonto esandleni somGibhide wambulala ngawo.

²² Zazinjalo-ke iindaba zakaBhenaya umsa kaJehojada, naye waduma njengeengorho ezintathu zesibili.

²³ Wahlonitjhwa khulu phakathi kwabamatjhumi amathathu, kodwana azange abalwe kilabo abathathu bokuthoma. UDavida wambeka bonyana alawule amancusakhe.

²⁴ Hlangana nabamatjhumi amathathu gade kunalaba: U-Asayeli umnakwabo kaJowabi, u-Elirhanana umsa kaDodo weBhethe-Lehema,

²⁵ uTjhama weRharodi no-Elikha weRharodi,

²⁶ uRheletsi wePalethi, u-Ira umsa ka-Ikhetjhi weTekhowa,

²⁷ u-Abiyezeri we-Anatothi, uMebunayi weRhutjha,

²⁸ uTsalmoni we-Arhorhi, uMaharayi weNethofa,

²⁹ uRhelebi umsa kaBhahana weNethofa, u-Ithayi umsa kaRibayi weGibeya kwaBhenjamini,

³⁰ uBhenaya wePirathoni, uHidayi wangemirhobeni yeGahatjha,

³¹ u-Abi-Alboni we-Araba, u-Azimavethe weBharirhumi,

³² u-Eliyarhiba weTjhalibhoni, uJatjheni weRhuni, uJonathani

³³ umsa kaTjhama weHarari, u-Arhiyamu umsa kaTjharari we-Arari,

³⁴ u-Elifelethi umsa ka-Arhasibayi weMahaka, u-Eliyamu umsa ka-Arhitofeli weGiloni,

³⁵ uRhetsiro weKarameli, uPaharayi we-Arabi,

³⁶ u-Yigala umsa kaNathani weTsoba, uBhani weGadi,

³⁷ uTselekhe umAmoni, uNarharayi weBhiyerothi, usonkhande kaJowabi umsa kaTseruya,

³⁸ u-Ira weJetere noGarebe weJetere

³⁹ kanye no-Uriya umHite. Bebamatjhumi amathathu nalikhomba nasele baboke.