2 USAMYELA 22 - IsiNdebele 2012 Translation

UDavida udumisa uZimu

¹ UDavida wadumisa uSomnini ngokuvuma ingoma le lokha uSomnini namsindisa esandleni sazo zoke izitha zakhe ngitjho nakuSawula.

² Wabhina wathi: USomnini ulidwala lami, isiphephelo sami nomsindisami.

³ UZimami ulirholo lami engiphephela kilo; usihlangu sami namandla wesindiswami; uyisikami, isiviko sami nomenyelami. Nakibondwendweni uyangisindisa.

⁴ USomnini ufanele ukudunyiswa: Nangilila kuye ungisindisa ezitheni zami.

⁵ Ngenganyelwa magagasi wokufa, iinrhurhula ezibhubhisako zafuna ukungigubuzesa.

⁶ Iinkawule zezindla bezingirarele; ngabandamelwa zizifu zokufa.

⁷ Ematlhuwenami ngalilela uSomnini, ngarhuwelela uZimami. Wezwa ilizwi lami asethempelini lakhe, isililo sami safika eendlebeni zakhe.

⁸ Iphasi ladengezela begodu lahlengezela, iinsekelo zamazulu zasikinyeka, zathuthumela ngombana gade asilingekile.

⁹ USomnini nasilingekileko ufana nentabamlilo ethunya intuthu nekhafula amalangabi nekehla.

¹⁰ Wavula amazulu wehlela phasi; ngaphasi kweenyawo zakhe kuthe kupe amafu anzima tshu.

¹¹ Kwaba ngathi uphapha ngekerubhi emafini, isiwuruwuru saba ngasuthi maphiko aphapha ngawo.

¹² Wagubuzeswa lilifu elinzima njengesisitho, namafu wezulu amnyama wemkayini.

¹³ Ebuphaziphazini bobukhona bakhe kwamekeza, kwaphambana imibani.

¹⁴ USomnini waduma asemafini, kwezwakala ilizwi longoPhezulu.

¹⁵ Wadubula imisubi kwaphadlhalala izitha zami, zadiyazeliswa kumekezela kobuphaziphazi bombani.

¹⁶ Lokha uSomnini navuthela ummoya ngeempumulo, akhalima, ukuzika kwelwandle kwambuleka, iinsekelo zephasi zanekeka ebaleni.

¹⁷ Welula isandla sakhe aphezulu wangidzwebula; wangenyula emanzini azikileko.

¹⁸ Wangisindisa esitheni sami esinamandla nebajamelanini bami egade banamandla kunami.

¹⁹ Bangithelekela ngelanga lehlekelele, kodwana uSomnini waba msizami.

²⁰ Wangikhupha emkghothweni wangibeka etjhatjhalazini, wangisindisa ngombana angithanda.

²¹ USomnini wangivuza ngombana nginganamlandu; wangisiza ngombana ngimsulwa.

²² Iye ngilondile iindlela zakaSomnini; azange ngenze okumbi ngokuhlanuka uZimu.

²³ Ngihlala ngilonda imithethwakhe; azange ngiphambuke emiyalwenakhe.

²⁴ Bengisolo ngiphetha ilizwi lakhe, ngizilondile ngaba kude necala.

²⁵ USomnini wangivuza ngombana nginganamlandu, ngimsulwa phambi kwakhe.

²⁶ Somnini, uziveza uthembekile kabathembekileko, uziveza umsulwa kabamsulwa,

²⁷ nakohlanzekileko uziveza uhlanzekile, kodwana oneengwegwe akaphunyurhi kuwe.

²⁸ Usindisa abazithobileko, uqaphela abazigqajako ubehlise.

²⁹ Ukukhanya kwami wena Somninami, utjhugulula ubumnyama engikibo ubenze ukukhanya.

³⁰ Ngesizo lakho angeze ngakhisimela; ngoZimami ngingagiriza umthangala wedorobho.

³¹ UZimu akaphosisi, ilizwi lakaSomnini alisoleki. USomnini usiphephelo sabo boke ababalekela kuye.

³² Ngubani uZimu ngaphandle kwakaSomnini? Ngubani idwala ngaphandle kwakaZimu?

³³ NguZimu ongihlomisa ngamandla nowenza indlelami ilunge.

³⁴ Ungenza ngiqhanase njengehlangu, angivumele ngijame eenqongolweni.

³⁵ Ubandulela izandla zami ukulwa, imikhonwami ikghona ukucupha umsebe wekoporo.

³⁶ Ukungivikela kwakho kungenza ngihlule; nawuphendula imithandazwami ngiqina idolo.

³⁷ Ugangadela indlelami, bonyana ngingatshinyeki iingogoriyana.

³⁸ Ngagijimisa izitha zami ngazifihliza; azange ngijike zingakafi zoke nya.

³⁹ Ngaziqoba nya, zaparalala zangasavuka; zarabhalala ngaphasi kweenyawo zami.

⁴⁰ Wangihlomisa ngamandla wokulwa, wathobisa izitha zami phambi kwami.

⁴¹ Wenza izitha zami bona zifulathele ipi, ngarhayila amanabami.

⁴² Zarhuwelela zifuna isizo, kodwana azange kube khona ongazisindisa; zalilela uSomnini, kodwana azange aziphendule.

⁴³ Ngazitshidlha zasileka kwanga lithuli lehlabathi; ngazigadanga njengeensila zeendledlana.

⁴⁴ Somnini, ungisindisile nangisahlelwa sisizwe sekhethu, wangenza ngaba yihloko yezizwe ezitjhili. Abantu bakosobantu bayangikhothamela,

⁴⁵ nemiqhamuka iyathuthumela phambi kwami, yenze engikutjhoko.

⁴⁶ Imiqhamuka iyangesaba, iza itatazela kusukela esiphephelweni sayo.

⁴⁷ USomnini uyaphila! Alidunyiswe idwala lami! Akaphakanyiswe uZimu, olidwala nomsindisami!

⁴⁸ UnguZimu ongibuyiselelako, obeka izizwe ngaphasi kwami,

⁴⁹ ongithukulula ezitheni zami. Ungiphakamisela ngaphezu kwezitha zami, angisindise kibondwendweni.

⁵⁰ Nje-ke ngizakudumisa, Somninami, hlangana nezizwe; ngibhine iingoma zokudumisa ebizweni lakho.

⁵¹ Unikela ikosi ayibekileko ukuhlula okukhulu; akhombise umusa ongapheliko kabazesiweko bakhe, kuDavida neenzukulwana zakhe isiphelani.